Read Achang LUKA 2 Bible Online

LUKA 2 - Achang bible

LUKA 2

¹Hauh buisnyeis gyo lyis mungkvn gonh dius nyings lhaih das xiklyis Kesar Agustu dah dang kyoh kat.

²Haih dius nyings lhaih zis gas, Siria mau mas Kureni mungh zau kuot uhlyis, cangxeih vlhain nghuot.

³Hauh uhlyis dius dvnganhmoq gas, nyings lhaih das xiklyis yuk khanghmuh vsainnyang wus pheh tsain loh.

⁴Housoeh Yosep eq, Dawi dah nyei nyet nghuot yvmvyah, Galile mau Nazaret wus masyah Yuda mau Betlehem ge, Dawi dah wugungs pheh loh.

⁵Nyah yhensain nyhiq duot das xiklyis kwank toh dah Mari yah dvgeh nyings kat das xiklyis loh. Mari gas ung mha loshang chi.

⁶Nyah zomh houmha nyeis dah uhlyis, Mari loshang khoeu das buisnyeis jweh los las,

⁷yukgis lomons lyis khoeu lha, misseh yah lyet las lang khau mha lhain toh: khasoeh ge lyis nyah zomh xiklyis hau boengh doq yhen mha joqyos ma bos.

⁸Hauh wuxom pa mha yvng yoeuh bang gas, nyenh lyis nyamoq dah yvng tsomh uhlyis yah nyeis.

⁹Yoeuh aq, Yhensain dah loeuswons soeu ka, nyamoq jyank mas jweh las, Yhensain dah phunk gas, nyamoq dah vyvm vwi mas bvng joq: housoeh las nyamoq gas svsoh gyuk.

¹⁰Loeuswons soeu nyamoq lyis taiq zis gas, Vgyuk goh, Yoeuh aq dius dvnganhmoq xiklyis gaus thank dang ngos namoq jyank mas wons lyih.

¹¹Khvnyhik Dawi wugungs mas namoq xiklyis khyuot yoeus soeu khoeu los. Hauh soeu ka Yhensain Khristu nghuot.

¹²Namoq xiklyis vlho ka haih zis nghuot. Loshang lhyi shipu yah lyet las lang mas lhain toh zis lyis namoq nyvng das, ge.

¹³Hauh loeuswons soeu yah dvgeh, loeuswons bang moqjens nyetlos nyettant thuq los las Mangso lhyi chungh zis gas:

¹⁴Nyhang thank thoq mas Mangso ka phunk bos nyeis bas jungh, Nyeisjvng mas eq nyang nhaiqdoeus bang jyank mas nyenstap zis joq bas jungh, ge.

¹⁵Hauh loeuswons bang nyamoq jyank masyah maukhung pheh tauh loh thang lhyi, yvng yoeuh bang dvyuk yah dvyuk taiq goh zis gas, Yang gvshih Betlehem jweh shoq e lha, bweh los goeus zis yahge Yhensain yang lyis seq nhang zis yah dvyhangteh, e tsain yoeuh goh, ge.

¹⁶Housoeh nyamoq lvnyap e lha, Mari yahge Yosep lyis eq, lang mas lhain toh dah loshang lyis eq tsain nyvng.

¹⁷Housoeh nyamoq nyvng lho lhyi, haih loshang dah cho, nyamoq lyis taiq kyoh khoq dah dang lyis tsain hoeuh loh.

¹⁸Yvng yoeuh bang taiq dah dang lyis xauhgyo bang dvnganhmoq gas mauh.

¹⁹Nghuot laus eq Mari gas haih cho dvnganh yvlyis comh yoeus las nyah ehnyet mas nghamh yoeuh nyeis.

²⁰Yvng yoeuh bang nyamoq lyis taiq zis yah dvyhangteh, nyamoq xauhgyo, xauh nyvng dah cho dvnganh gvng mas Mangso dah phunk lyis chungh las tauh loh.

²¹Xet nyeih dyingh las nyang lyis vthyoh tyomh dyei lyis, nyang ung mha ma bos shih lyis yah loeuswons soeu nyings dyei toh vgus, nyang lyis Yesu ge nyhink.

²²Moshe dah lyi yah dvyhangteh nyamoq dah cheihshang chah dah buisnyeis dyingh los lyis, nyah zomh gas Yhensain lhyi kyauh das xiklyis nyang lyis Yerusalem mas shwih e.

²³Cangxeih khoeu dah yukgis lo khanghmuh lyis Yhensain xiklyis gyingshang oen yoh taiq das, ge Yhensain dah lyi mas lhaih toh vgus nghuot.

²⁴Yhensain dah lyi mas taiq zis yah dvyhangteh, khotjyauh dvzomh, nghuot ya, guzoe lo dvzomh yah lomhxangh lainh.

²⁵Yoeuh aq, Yerusalem mas Simon ge soeu dvyuk nyeis. Nyang gas dan las lomsjingh cho mha wontang soeu nghuot las Israel lyis nhaiqtaink dyei das cho lhyi nghamhloms nyeis soeu nghuot. Gyingshang Dyos eq nyah thoq mas nyeis.

²⁶Simon gas Yhensain dah Khristu lyis ma nyvng dvchank ma shei das ge, Gyingshang Dyos yah chixoeuq zis xauh.

²⁷Thungh yah dvyhangteh kuot dyei das nyhenshang nyhiphoq gas Yesu lyis shwih e lhyi, nyang eq Dyos yah yhenmuh mas jweh lyih los.

²⁸Nyang gas hauh loshang lyis nyah loq mas po chi lha Mangso lhyi chungh zis gas,

²⁹Yhensain eh, nah dang vgus nah jyeidwis lyis nyenstap zis yah shei nhang lo aq:

³⁰Khasoeh ge lyis nah khyuot yoeus cho lhyi ngah nyoqjeih yah nyvng goeus.

³¹Dius dvnganhmoq xikkhonh mas hauh zis nvng sont toh dyei.

³²Gohnyau bang lyis pank dyei das dah bvng zis yahge Nah vnyau Israel dah phunk nyhenshang nghuot, ge.

³³Nyah cho yah sen zis lyis taiq gvng mas, Yosep yahge nyah ungwes gas gyo mauh.

³⁴Simon gas nyamoq lyis shvmanh dyei lho lha nyah ungwes Mari lyis taiq zis gas, Haih loshang ka Israel dius jens nyoshoq dyoqbis zis xauh das cho yahge khyuot yoeus zis xauh das xiklyis Mangso khyen toh soeu nghuot. Nyang lyis dius nyoshoq yah ngoek tyamp das, Mangso jyank mas dah vlho nghuot las nghop toh dah nghamh cho lhyi phank xoeuq das.

³⁵Nah sainh lyis eq shamthoh teh dah chiqjyen cho yah thauh kyank dyei zis xauh das, ge.

³⁶Hou mhayah Asher vnyau Phanuel dah lonyi Anna ge dah lvpe vmesbih dvyuk nyeis. Nyang gas svsoh mang goeus: lonyi uhlyis yah nyhet zvn kyingh nyah yhensain phoq yah zomh nyeis las,

³⁷zvnlom xetci nyei zvn bos shoq chauhmuh muh nyeis. Nyang gas yhenmuh yah ma gang, womkyi lha shvmanh dung zis yah nyeih nyenh Mangso lhyi phuqsoe nyeis.

³⁸Nyang eq hauh shishenh lyis los las Yhensain dah jyehjuh lyis chungh las, Yerusalem wugungs lyis khyuot yoeus das cho lhyi nghamhloms bang dvnganhmoq lyis nyah cho taiq kyoh.

³⁹Nyah zomh gas Yhensain dah lyi yah dvyhangteh dye kuot lho lhyi, nyamoq nyang dah wugungs Nazaret mas tauh loh.

⁴⁰Hauh loshang ka kuh bes, yombos los las joeui yah dyingh joq. Mangso dah nhaiqdoeus soeu bweh nyeis.

⁴¹Gvshih nyah nyhiphoq gas, zvn yau zvn Lhuiq Kat Pwe Yerusalem mas loh.

⁴²Yesu dvci aiq zvn jweh lyis, pwe dah thungh yah dvyhangteh, nyamoq eq Yerusalem pheh doq loh.

⁴³Pwe buisnyeis lai loh thang lhyi tsain tauh loh lyis, loshang Yesu gas Yerusalem mas gyoh nyeis khoq; hauh zis lyis nyah ungwes uwus gas ma seq.

⁴⁴Nyang dius phung mha bos, ge nghamh las, dvnyeih gyung cho loh thang lhyi, buisnoms sainhchangh yahge seq goh bang mas nyang lyis tsain xo.

⁴⁵Nyah zomh gas nyang lyis ma nyvng lyis Yerusalem mas doms loh las nyang lyis xo.

⁴⁶Housoeh somh vnyeih lyis, nyang lyis yhenmuh khau mha svra moq dah vgungs mas tsung lha gyo yoeus las nyei goh nyeis zis lyis nyvng.

⁴⁷Nyah dang lyis xauhgyo bang dvnganhmoq gas, nyang seqgyo cho lhyi eq, nyang phuk taiq dang gvng mas eq tsain mauh.

⁴⁸Nyah ungwes uwus nyang lyis nyvng lhyi tsain mauh las nyah ungwes nyang lyis taiq zis gas, Lo eh, chamus nvng ngamoq lyis heisoeh kuot lah? Yoeuh aq, nah uwus yahge ngos gas nvng lyis sainhkhoh las xo nyeis, ge.

⁴⁹Nyang nyamoq lyis taiq zis gas, Chamus namoq ngos lyis xo goh? Ngos gas ngah Uwus dah yhen mha nyeis chah yvlyis namoq ma seq goh lhyeh, ge.

⁵⁰Nghuot laus eq nyang nyah aiq yuk lyis taiq dah dang lyis nyah aiq yuk ma seqgyo.

⁵¹Housoeh nyang gas nyamoq yah dvgeh loh las Nazaret mas jweh lyis nyamoq sang dang gyo las nyeis. Nghuot laus eq nyah ungwes gas hauh dang dvnganh zis lyis nyah nhaiqlom mas comh toh.

⁵²Yesu gas gungs bes yvmas thyoh bes, joeui bos los las, Mangso xikkhonh mas eq, dius xikkhonh mas eq nyoqnho ngelang bos los.