Read Achang LUKA 20 Bible Online

LUKA 20 - Achang bible

LUKA 20

¹Dvnyeih gas nyang yhenmuh mas dius jens lyis jyauh zis yahge gausyis dang taiq kyoh nyeis dah uhlyis, Phudyei uhjyung jens, maussauh lhaih bang yahge logis jens nyah jyank mas lyih las,

²Nvng gas chah vmingh yah haih zis kuot lah? Nvng lyis haih vmingh hank dyei zis ngamoq lyis taiq kyoh aq, ge.

³Nyang nyamoq lyis phuk taiq zis gas, Ngos eq namoq lyis dvja nyei bah, ngos lyis phuk taiq geh.

⁴Yohan dah jeisnyhop cho ka Mangso[8] mhayah nghuot lah? Dius masyah nghuot lah, ge.

⁵Nyamoq nyang changh xamgoh las, Yang maukhung mhayah nghuot oen taiq lyis gas, Housoeh lyis namoq, nyang lyis chamus ma lomsjingh goh lah, ge das.

⁶Nghuot laus eq yang dius masyah nghuot oen lhyi ka, dius dvnganh gas yang lyis lukgoq yah doeuh das: khasoeh ge lyis Yohan ka lvpe nghuot yvlyis nyamoq jingh, ge.

⁷Housoeh las nyamoq phuk taiq zis gas, Khamha yah nghuot zis ngamoq ma seq, ge.

⁸Yesu nyamoq lyis taiq zis gas, Ngos haih muh chah vmingh yah kuot zis namoq lyis ma taiq kyoh das, ge.

⁹Hauh thang lhyi, nyang dius jens lyis haih dangtoeuq yah taiq zoh loh zis gas, Dius dvyuk zvbiq dvkhyam ba tsungh toh lho lha, khyam muh zwi bang lyis tsoeuh dyei khoq las, nyang gas we mau mas nyangh shoq loh nyeis.

¹⁰Shishenh jweh lyis, khyam mha dah zvbiq shih gvmboms nyang lyis dyei bas jungh ge, khyam tsoeuh zwi bang jyank mas jyeidwis dvyuk nhang kat. Nghuot laus eq khyam tsoeuh zwi bang gas nyang lyis bat las, gungskom nhang kat.

¹¹Nyang gohtoeu jyeidwis dvyuk lyis doms nhang kat. Nyang lyis eq nyamoq bat, vxoq vcaiq shoeuhshih las gungskom nhang kat.

¹²Somh vyuk nhang lhyi, nyang lyis eq dvmtap las, khat thuq tyamp.

¹³Hauh thang lhyi zvbiq khyam sain taiq zis gas, Ngos khasoeh kuot das lah? Ngos jyetdap, ngah lo lyis nhang kat das, nyang lyis gas nyamoq phauh nyang mvbeh, ge.

¹⁴Nghuot laus eq, khyam tsoeuh zwi bang nyang lyis nyvng lyis, nyamoq nyang changh taiq goh zis gas, Haih soeu ka yhenzis zom das soeu nghuot. Hauh yhenzis gas yah zis nghuot bas jungh, nyang lyis sat goh, ge.

¹⁵Nyamoq gas, nyang lyis zvbiq khyam nghe pheh she thuq las sat. Housoeh las zvbiq khyam sain ka nyamoq lyis khasoeh kuot das lah?

¹⁶Nyang jweh los las hauh khyam tsoeuh zwi bang lyis mhont las, zvbiq khyam ka gohyhamh bang lyis dyei das, ge. Hauh zis xauhgyo bang gas, Heisoeh ma nghuot bas jungh, tsain ge.

¹⁷Nyang nyamoq lyis yoeuh las taiq zis gas, Housoeh lyis gas, yhen tsuk bang peq tyamp dah luklom gas, yhenthunk lukzains bweh los goeus, ge lhaih toh zis gas cha ge lah?

¹⁸Hauh lukzains thoq mas gyoh soeu hank laus eq dyis tyamp das. Hank thoq mas laus eq hauh zis gyoh lyis gas phih soeh nhoeuq tyamp das, ge.

¹⁹Hauh dangtoeuq gas, phudyei uhjyung jens yahge maussauh lhaih bang lyis toeuq las taiq yvlyis nyamoq seqgyo las, hauh uhlyis yangh nyang lyis nyhik das zis sont nyeis. Nghuot laus eq dius jens lyis gyuk.

²⁰Housoeh las nyamoq gas, jyoeng guons kuot dah joh yoeuh bang lyis lhom nhang zis gas, nyang cha taiq yvlyis nyhik las, nyang lyis yomsoq yahge vmingh yoh dah mungh zau jyank mas yoh kyauh tyamp das xiklyis nghuot.

²¹Nyamoq, nyang lyis nyei zis gas, Svra eh, nvng gas dius dah nyoqnho lhyi ma yoeuh dan khyvlyis jyauh las Mangso dah lyi jus jus jyauh nyeis zis lyis ngamoq seq.

²²Ngamoq gas hwankti Kesar lyis khoengh kat das zis lyi bos lah, ma bos lah, ge.

²³Nghuot laus eq nyang gas nyamoq dah nhaiqlom guih zis seq las nyamoq lyis taiq zis gas,

²⁴Ngwis kyvp dvkoeuq ngos lyis chixoeuq geh, hauh zis hank gungslho yahge maussauh dap lah, ge. Nyamoq taiq zis gas, Kesar zis nghuot, ge.

²⁵Nyang nyamoq lyis taiq zis gas, Housoeh yvmvyah Kesar zis nghuot lyis gas Kesar lyis, Mangso zis nghuot lyis gas Mangso lhyi dyei geh, ge.

²⁶Nyamoq gas dius jens xikkhonh mas nyah dang khonh mas yobos ma nyvng zis yahge nyang phuk taiq dang lyis tsain mauh las samlo no dyuk goeus.

²⁷Hauh uhlyis, dwis toq cho ma bos ge dah Saduke dvyhamh nyah jyank mas los nyei zis gas,

²⁸Svra eh, yhensain nyhiq bos dah vmang, lo ma bos khoq shei lhyi, vmang dah chauhmuh lyis vnoeuh shoeuh las vmang dah vshih tsoq bas jungh ge Moshe ngamoq lyis lhaih toh dyei.

²⁹Gvshih houteh vmang vnoeuh nyhet yuk nyeis. Cangxeih vyuk gas nyihwank las lo ma bos shei khoq.

³⁰Aiq vyuk eq chauhmuh shoeuh las lo ma bos shei khoq.

³¹Somh vyuk eq chauhmuh shoeuh goeus. Housoeh nyhet yuk jweh shoq lo ma bos tsain shei khoq.

³²Thang thank lyis hauh vmesbih eq shei loh.

³³Housoeh yvmvyah hau dwis toq los uhlyis hauh vmesbih gas, hank dah yhensain nyhiq nghuot das lah? Khasoeh ge lyis nyang gas nyhet yuk moq yah phoengh wvng goeus, ge.

³⁴Yesu nyamoq lyis phuk taiq zis gas, Haih mungkvn lo jens gas phoengh hwank, lonyi dyeizo kuot.

³⁵Nghuot laus eq shei masyah dwis toq los las hauh mau mas jweh bang gas, phoengh hwank, lonyi dyeizo zis ma bos lo.

³⁶Nyamoq gas loeuswons bang teh nghuot las ma shei lo. Nyamoq lyis shei masyah dwis toq los nhang goeus yvmvyah nyamoq gas Mangso dah lo jens nghuot.

³⁷Shei bang lyis dwis toq los nhang cho yah sen lha Moshe ka kanghjyoeng dede chixoeuq goeus. Nyi dap nyeis dah mhanhgyomh yah sen lha lhaih toh dah Jyomp maussauh doeus mas Moshe ka Yhensain lhyi Abraham dah Mangso, Isak dah Mangso, Yakop dah Mangso, ge lui.

³⁸Khasoeh ge lyis nyang gas shei bang dah Mangso ma nghuot, dwis nyeis bang dah Mangso dvnghuot; Mangso dah xikkhonh mas haih bang dvnganh gas dwis nyeis, ge.

³⁹Hauh uhlyis maussauh lhaih bang dvyhamh nyang lyis phuk taiq zis gas, Svra eh, nvng taiq zis jus, ge.

⁴⁰Hauh thang lhyi nyamoq gas nyang lyis cha eq ma womh nyei lo.

⁴¹Nyang nyamoq lyis taiq zis gas, Khristu gas Dawi dah lo nghuot, ge nyamoq khasoeh yoh taiq lah?

⁴²Dawi nyang Chungh Dang maussauh mas, Hauh Yhensain ngah Yhensain lhyi taiq zis gas,

⁴³Ngos nah jeswus lyis nah nangte kuot shoq, Nvng ngah loqyos shot pheh tsung toh aq, ge.

⁴⁴Housoeh las Dawi gas Khristu lyis Yhensain ge lui lyis gas, nyah lo khasoeh yoh nghuot das lah, ge.

⁴⁵Hauh thang lhyi dius dvnganhmoq xauhgyo shoq nyang nyah changlo jens lyis taiq zis gas,

⁴⁶Maussauh lhaih bang lyis zaih geh: nyamoq gas dyixing wuot las suh mes. Kaih mas phauh nyang zis yah jeshuh das zis eq, lyi jungs mas gis thank tsunggus lyis eq, pwe mha gis thank joqyos lyis eq tsain o mes.

⁴⁷Chauhmuh jens dah yhen lhyi kuotzo kuot shuk las dius dah xikkhonh mas yoeuh doeus das xiklyis shvmanh xing xing dung guons kuot. Hauh bang gas zes than dah yobos dyei zis xauh das, ge.