Read Achang LUKA 21 Bible Online

LUKA 21 - Achang bible

LUKA 21

¹Housoeh nyang yoeuh kat lyis, dis bang ziskwi mha vlu tsain kat nyeis yvlyis nyvng las,

²thunkcent aiq kyvp kat, nyungs dah chauhmuh dvyuk lyis eq nyang nyvng.

³Nyang taiq zis gas, Ngos namoq lyis jyoengh taiq bah, hai nyungs dah chauhmuh gas nyamoq dvnganhmoq thoq lyis zes nyo shoq kat goeus.

⁴Khasoeh ge lyis hauh bang dvnganhmoq gas, nyamoq magons magoh yoh masyah vlu kat. Nghuot laus eq nyang gas vshoh vjyen masyah nyah kang khoeu das zis dvnganh kat goeus, ge.

⁵Dius dvyhamh gas yhenmuh lyis yungh dah luk yahge dyei toh dah jyungshuk yah shunk toh zis lyis taiq nyeis lyis nyang taiq zis gas,

⁶Gvshih namoq nyvng nyeis, luk dvlom thoq mas dvlom ci toh dah haih goeu gas, dvlom thoq mas dvlom kih toh zis ma bos lo das buisnyeis jweh los das, ge.

⁷Nyamoq, nyang lyis nyei zis gas, Svra eh, hauh zis gas khanhamp nghuot das lah? Hauh cho bweh ni los lyis chah vlho nghuot das lah, ge.

⁸Nyang taiq zis gas, Namoq mhuih khwangh zis ma xauh bas jungh, zaih geh: khasoeh ge lyis, nyoshoq moq ngah nyings yoeus las, Ngos gas Khristu nghuot; hauh shishenh jweh ni los goeus, ge vguons kuot taiq los das: housoeh las namoq hauh bang thang mha vchank loh goh.

⁹Namoq gas moeng dyoq zis yahge gomloeus toq cho xauhgyo lyis vgyuk vdvn goh: Hauh cho ka xik bweh los das. Nghuot laus eq thang thank zis gas ma jweh los shih, ge.

¹⁰Tsai, nyang nyamoq lyis taiq zis gas, Dius dvnyau yah dvnyau, munghdan dvkoeuq yah dvkoeuq zan goh das.

¹¹Joqyos vdeh deh mas maunyeis gvgis dwis las, panghkhauq, yomh jweh los das. Maukhung mhayah eq gyukphoh zis yahge vlho zainsmuh bweh thuq los das.

¹²Nghuot laus eq hauh cho dvnganh ma bweh shih lyis, ngah nyings gvng mas svbih yah namoq lyis nyhik las shoeuhshih, lyi jungs mas kyauh tyamp las thung lhunk, hwankti yahge guon bang dah xikkhonh mas shwih loh zis tsain xauh das.

¹³Housoeh teh zis gas namoq kanghjyoeng kat das dah toeuh bweh los das.

¹⁴Housoeh yvmvyah namoq khasoeh toeuh das zis, xik lyis yah ma nghamh toh noh zis namoq nhaiqlom mas tsain kat chi geh.

¹⁵Khasoeh ge lyis jeswus namoq lyis ma yoh taiq ung, dang uh ma yoh lhomh das nyhenshang ngos namoq lyis nhuot mas joeui dyei das.

¹⁶Namoq dah nyhiphoq, vmang vnoeuh, vnyau vhuh yahge dyenschangh jens gas namoq lyis phanhlyen das. Namoq mas dvyhamh lyis gas sat das.

¹⁷Ngah nyings gvng mas dvnganhmoq namoq lyis hoeng los das.

¹⁸Nghuot laus eq namoq dah cam dvkhvt eq dyoq das zis ma nghuot.

¹⁹Namoq gas jhen zis yah namoq dah kang khyuot yoeus zis xauh das.

²⁰Yerusalem wugungs lyis jeswus yah lhaink toh zis lyis namoq nyvng goeus ya, hauh wugungs dyoqbis bah ge goeus zis lyis namoq seq toh lo geh.

²¹Hauh uhlyis Yuda mau mas nyeis bang gas boms pheh phang loh bas jungh. Wugungs khau mha nyeis bang gas thuq loh bas jungh. Wuxom mha nyeis bang eq wus vkhau mha ma wvng los bas jungh.

²²Khasoeh ge lyis hauh buisnyeis lyis gas, lhaih ya lhaih toh dang nyuk los das las, haih buisnyeis gas lvto phuk das buisnyeis nghuot.

²³Hauh buisnyeis lyis loshang gungs nghuot bang yahge lonoeuh nauh gvmshuk bang gas mvtanhzoe nghuot! Khasoeh ge lyis hauh mau mas gyukluklvsonh shohjyen zis xauh las, haih dius nyau thoq mas nhaiqlom dyis zis jweh das.

²⁴Nyamoq gas moengsa yah dyoqbis das, dius nyau khanghmuh yah nyhik shwih loh zis xauh das. Gohnyau bang dah shishenh ma thank dvchank Yerusalem gas gohnyau bang yah nang zaiq toh zis xauh das.

²⁵Hauh uhlyis buis, lhamhmuh yahge kyi mha eq vlho thuq los das; thomh yahge jeisphauq toq thwe gvng mas munghdan gas mauh las,

²⁶hauh nyeisjvng mas bweh los zis lyis yoeuh las, dius jens gyuk zis yah chuot lains loh das. Khasoeh ge lyis maukhung mha dah yomsoq nonh los das.

²⁷Hauh uhlyis Cangsoeu Lo gas, yomsoq yahge phunk zainsmuh yah jyommauh yah gyoh los zis lyis nyamoq nyvng das.

²⁸Haih vyhang bweh zoh los lyis, namoq uhloms nghank las yoeuh kat geh: khasoeh ge lyis namoq dah khyuot yoeus cho jweh ni los goeus.

²⁹Nyang nyamoq lyis dangtoeuq yah taiq zis gas, Namoq maiphang zains yahge gohtoeu saiqzains dvnganh zis lyis yoeuh geh:

³⁰Saiq nyuk tuot los zis nyvng goeus ya, zvn wvng los zis lyis namoq nyang yoh seq.

³¹Houyah dvyhangteh hai bweh los dah vyhang lhyi nyvng lyis, Mangso munghdan gas jweh ni los goeus zis seq geh.

³²Ngos namoq lyis jyoengh taiq bah, Haih zis ma nyuk los dvchank haq caiq ma lai das.

³³Maukhung nyeisjvng lai loh laus eq ngah dang gas ma lai loh das.

³⁴Namoq gas vsainnyang dah gungs lyis zaih nyeis geh. Namoq gas, zo lais shuk lais pwe kuot gvng mas nyeisjvng thoq mas dah chiqjyen yvmas shishenh vthank nhang goh. Hauh buisnyeis gas lhyik baiq teh namoq mas nyetlos nyettant thungh phuh los das.

³⁵Khasoeh ge lyis, hauh buisnyeis gas nyeisjvng gonh mas nyeis ya nyeis bang thoq mas jweh los das.

³⁶Housoeh yvmvyah hai bweh los das dah cho dvnganh masyah namoq luiq las, cangsoeu Lo dah xikkhonh mas yoh yap das xiklyis, vjangh shvmanh dung las zungh nyeis geh, ge.

³⁷Housoeh Yesu gas nyeih lyis yhenmuh mas jyauh nyeis. Nyenh lyis gas thuq las Tsanlun ge dah boms mas loh nyeis.

³⁸Dius dvnganh nyah dang lyis gyo yoeus das nyhenshang nvpsangh yah yhenmuh mas tsain los.