Read Achang LUKA 22 Bible Online

LUKA 22 - Achang bible

LUKA 22

¹Lhuiq Kat Pwe ge nyhink dah bicheih ma kat ohlhyoq zo pwe jweh ni los nyeis.

²Hauh uhlyis phudyei uhjyung jens yahge maussauh lhaih bang gas, nyang lyis khasoeh yoh sat das dah cho tsain xamgoh nyeis. Nghuot laus eq nyamoq gas dius jens lyis gyuk nyeis.

³Hauh shvhoeu lhyi dvci aiq yuk mas Iskarot ge dah Yudas jyank mas Satan wvng las,

⁴nyang thuq loh las phudyei uhjyung jens yahge zau jens jyank mas, nyang lyis khasoeh yoh phanhlyen dyei das cho, nyamoq yah e xamgoh nyeis.

⁵Hauh bang gas gaus las ngwis dyei das xiklyis xamxonh.

⁶Nyang nyamoq yah xamxonh las moqjens ma nyeis uhlyis nyang lyis yoh phanhlyen dyei das toeuh xo nyeis.

⁷Lhuiq Kat Pwe yvnglo sat phudyei las bicheih ma kat ohlhyoq zo pwe shishenh jweh los.

⁸Housoeh yvmvyah nyang gas, Petru yahge Yohan lyis xik pheh nhang lha taiq kat zis gas, Yang zo das xiklyis Lhuiq Kat Pwe loh sont langh geh, ge.

⁹Hauh aiq yuk nyang lyis nyei zis gas, Nvng ngamoq lyis khamha loh sont toh dyei langh nhang mes lah, ge.

¹⁰Nyang nyah aiq yuk lyis taiq zis gas, Nah aiq yuk wugungs mas wvng loh lyis jywang dvng soeu dvyuk yah xauhgoh das: hauh soeu wvng loh dah yhen khau mha chank wvng loh geh.

¹¹Hauh yhensain lhyi, Ngos ngah changlo jens yah Lhuiq Kat Pwe zo das dah boenghdoq yvp khah zis nghuot lah, ge Svra nyei nhang, oen taiq geh.

¹²Housoeh lyis nyang sont toh dah yhenthoq yvpmuh dvyvp tuonh shet das, yah nyhenshang houmha ba sont toh langh geh, ge.

¹³Nyah aiq yuk loh lyis nyang taiq kat vgus nyvng las, hau Lhuiq Kat Pwe nyenhcon lhyi tsain ba sont toh.

¹⁴Shishenh jweh las nyang gas lvgyo jens yah dvgeh kihgus mas joqyos yoeus.

¹⁵Nyang nyamoq lyis taiq zis gas, Ngos shanghsenh zis ma xauh shih lyis namoq yah dvgeh haih Lhuiq Kat Pwe svsoh zo shuk mes.

¹⁶Ngos namoq lyis taiq zis gas, Mangso munghdan mas doms xauh zo shishenh jweh shoq, ngos haih yvlyis ma zo das, ge.

¹⁷Nyang kom lhyi yoeus las jyehjuh chungh lho lha taiq zis gas, Haih zis lyis yoeus las namoq mas gvm geh.

¹⁸Ngos namoq lyis taiq bah, Mangso munghdan jweh los shoq, ngos zvbiq shih mas zis ma shuk lo das, ge.

¹⁹Hauh thang lhyi ohlhyoq yoeus las jyehjuh chungh lho lha khyiq dyei las taiq zis gas, Haih zis gas namoq xiklyis dyei tyamp dah ngah gungs nghuot. Ngos lyis soh das xiklyis haih zis kuot geh.

²⁰Houyah dvyhangteh nyamoq dye zo thang lhyi kom lhyi yoeus las taiq zis gas, Haih zis gas namoq xiklyis huot tyamp, ngah suih yah kuot toh dah thanghchvp vsaiq nghuot.

²¹Nghuot laus eq yoeuh aq, ngos lyis phanhlyen das soeu dah loq gas haih kihgus mas ngah loq yah dvgeh nghuot.

²²Cangsoeu Lo gas toeuq toh zis yah dvyhangteh loh lo das; nghuot laus eq nyang lyis phanhlyen soeu ka mvtanhzoe nghuot, ge.

²³Hauh uhlyis nyamoq eq hauh cho kuot das zis hank nghuot das au, ge tsain nyei goh nyeis.

²⁴Hauh thoq lyis changlo jens mas zes kuh soeu hank nghuot nyeis au lhyeh, ge nyamoq taiq phyen goh nyeis yvmas,

²⁵Nyang nyamoq lyis taiq zis gas, Gohnyau hwankti jens gas nyamoq xauh guon bang lyis kyukzo nhantzo. Nyamoq lyis vmingh dyei bang eq, nyamoq nyang gungs lyis jyehjuh yhensain nghuot ge taiqzo.

²⁶Nghuot laus eq namoq gas housoeh ma nghuot; namoq mas zes kuh soeu ka zes ngis soeu yhangteh nghuot las, uhjyung ka phuqsoe soeu teh nghuot chah.

²⁷Womjus mas tsung toh soeu yahge phuqsoe soeu hank zes kuh lah? Wom jus mas tsung toh soeu ma nghuot lhyeh? Nghuot laus eq ngos gas namoq mas phuqsoe soeu teh nghuot nyeis.

²⁸Namoq gas, ngos yaukyenh uhlyis, ngos yah dvgeh nyeis bang nghuot.

²⁹Ngah Uwus ngos lyis munghdan dyei zis yah dvyhangteh, ngos namoq lyis dyei.

³⁰Namoq gas ngah munghdan mas, ngah kihgus mas yoh zo shuk das zis yahge soetuon tank mas tsung lha, Israel dvci aiq nyau lyis soetuon das, ge.

³¹Housoeh las Yhensain taiq zis gas, Simon, Simon Satan gas namoq lyis sunghso khyink teh khyink mes nyeis.

³²Nghuot laus eq nah lomsjingh ehnyet ma dyoq das xiklyis, ngos nvng lyis shvmanh dung dyei. Nah nhaiqlom thaiq las doms lhain soh los lyis, nah vmang vnoeuh moq lyis thukxank nyeis aq, ge.

³³Petru taiq zis gas, Yhensain eh, ngos gas nvng thung gyoh laus eq, shei chah laus eq nvng yah dvgeh loh das xiklyis cicont nghuot, ge.

³⁴Nyang taiq zis gas, Petru, ngos nvng lyis taiq bah, khvnyens gyoq ma tuon shih lyis nvng, ngos lyis ma seq, ge somh lhain he tyamp das, ge.

³⁵Nyang nyamoq lyis doms taiq zis gas, Ngos namoq lyis ngwis thung, bvtmuh yahge thyvkoq ma bos bos nhang kat lyis dvja ja vchah goh lah, ge. Nyamoq gas, Cha eq ma chah, ge.

³⁶Nyang taiq zis gas, Gvshih gas ngwis thung yoh soeu ka yoeus chi aq, bvtmuh eq houyah dvyhangteh wons aq, moengsa ma yoh soeu ka dyi ungh las wis chi aq.

³⁷Ngos namoq lyis taiq bah, O mha dah dang gas ngos mas nyuk los chah. Houka, Nyang lyis gas lyi lhyweq bang mas bos suon kat goeus; jyoengh ngah cho lhaih toh zis gas nyuk los, ge.

³⁸Nyamoq taiq zis gas, Yoeuh aq, moengsa aiq chamh joq, ge. Nyang gas, Hauh zis luk goeus, ge.

³⁹Hauh thang lhyi nyang gas, vjangh gyangh doq dah Tsanlun boms mas doq loh. Nyah changlo jens eq nyah thang mha chank loh.

⁴⁰Joqyos mas jweh las nyang nyamoq lyis taiq zis gas, Shiwu yvmas ma wvng loh das xiklyis shvmanh dung nyeis geh, ge lho lha,

⁴¹nyamoq nyeis masyah luk dvlom doeuh ko loh las, phvluk zomhgyuis lho lha shvmanh dung zis gas:

⁴²Uwus eh, nvng bauh lyis gas, haih kom ngah jyank masyah yoeus tyamp dyei aq, nghuot laus eq ngah ehnyet ma nghuot, nah ehnyet dvnghuot bas jungh, ge.

⁴³Loeuswons soeu dvyuk maukhung mhayah thuq los las nyang lyis yomdyei nyeis.

⁴⁴Nyah ehnyet loh thank nyung daus zis yah dvgeh yomkat las shvmanh dung nyeis lyis, nyah gywesjeis eq nyeisjvng mas suih zoq gyoh teh gyoh nyeis.

⁴⁵Shvmanh dung masyah toq las nyah changlo jens jyank pheh loh lyis, nyamoq gas nhaiqkuk ehnyet yah yhet joq zis lyis loh nyvng.

⁴⁶Nyang nyamoq lyis taiq zis gas, Namoq chamus yhet joq goh lah? Shiwu yvmas ma bos loh das xiklyis toq las shvmanh dung nyeis geh, ge.

⁴⁷Housoeh taiq nyeis shih lyis, yoeuh aq, moqjens yah dvgeh, dvci aiq yuk mas dvyuk nghuot dah Yudas ge soeu ka, nyamoq xik mas loh las, Yesu lyis bvlot tanh das xiklyis nyah jyank mas ni loh.

⁴⁸Yesu nyang lyis taiq zis gas, Yudas eh, nvng gas cangsoeu Lo lyis bvlot tanh zis yah phanhlyen nyeis vnghuot lah, ge.

⁴⁹Yesu yah dvgeh nyeis bang gas, bweh los das cho lhyi yoeuh seq las nyang lyis taiq zis gas, Yhensain eh, ngamoq moengsa yah vzan das lah, ge.

⁵⁰Dvyuk gas Phudyei Zainsmuh jyeidwis dah loqyos no zan thyet dyei.

⁵¹Yesu phuk taiq zis gas, No geh, ge hauh no lyis nyang tanh zis yah doms gis nhang.

⁵²Yesu gas jweh los dah phudyei uhjyung jens, yhenmuh gomh zau jens yahge logis jens lyis taiq zis gas, Namoq gas khyanktau nyhik das teh, ngos lyis nyhik das xiklyis moengsa, dunghkuq chi lha los lhyeh?

⁵³Yhenmuh mas nyeih yau nyeih ngos namoq yah dvgeh nyeis uhlyis gas namoq ngos lyis ma nyhik, nghuot laus eq gvshih gas namoq dah shishenh nghuot joq zis yah dvyhangteh, mauchuot dwang dah yomsoq eq nghuot, ge.

⁵⁴Hauh dius jens gas Yesu lyis nyhik las Phudyei Zainsmuh dah yhen mha tsain shwih loh. Petru eq nyamoq yah we we masyah chank loh.

⁵⁵Ganthoq khau mha nyi khat las tsung toh yvmas Petru eq bos.

⁵⁶Housoeh nyikhyomp yvm mas tsung toh zis lyis jyeidwis nyelo dvyuk nyvng lyis, nyang lyis jeih jeih yoeuh las, Haih soeu eq Yesu yah dvgeh zis nghuot, ge.

⁵⁷Petru he lha taiq zis gas, Nyelo eh, nyang lyis ngos ma seq, ge.

⁵⁸Dvxa lhyi gohtoeu dvyuk eq Petru lyis nyvng las, Nvng eq haih bang mas zis nghuot ge lyis, Petru gas, Vbusbih eh, ngos ma nghuot, ge.

⁵⁹Dvshishenh ko doms nyangh thang lhyi, gohtoeu dvyuk taiq zis gas, Haih soeu eq jyoengh nyang, nyang yah dvgeh zis nghuot. Nyang Galile dius eq nghuot, ge.

⁶⁰Petru doms taiq zis gas, Vbusbih eh, nvng cha taiq zis ngos ma seq, ge. Housoeh taiq yah dvyih gyoq tuon los.

⁶¹Hauh uhlyis Yhensain ka Petru lyis lhain yoeuh kat: Gyoq ma tuon shih lyis nvng ngos lyis somh lhain he tyamp das, ge dah Yhensain dang lyis Petru soh los yah dvyih,

⁶²Petru nghe pheh thuq las svsoh ngaus.

⁶³Yesu lyis nyhik toh bang gas, nyang lyis lyuk las tsain jwangh.

⁶⁴Nyah nyoq lyis nghop dyei las lyuk zis yah, nyang lyis taiq zis gas, nvng lyis lyuk zis hank nghuot lah? Lvpe pe aq, ge.

⁶⁵Gohtoeu dah loeusmus soqzo dang eq nyoshoq Yhensain lhyi sang gyuon shih.

⁶⁶Nyoq nyvng los lyis, dius jens dah logis jens, phudyei uhjyung jens, maussauh lhaih bang tsain huom lha, Yhensain lhyi hauh huom pheh shwih e lha taiq zis gas,

⁶⁷Nvng Khristu nghuot jyoeng lhyi ka ngamoq lyis taiq aq, ge. Yesu nyamoq lyis taiq zis gas, Ngos taiq lyis eq namoq jingh das zis ma nghuot.

⁶⁸Ngos nyeidang lyis eq namoq ma phuk taiq, ngos lyis kat kat das zis ma nghuot.

⁶⁹Gvshih masyah cangsoeu Lo gas Mangso Yomsoq dah loqyos shot pheh tsung das, ge.

⁷⁰Nyamoq dvnganhmoq gas, Housoeh lyis nvng Mangso dah Lo nyang nghuot lhyeh, ge tsain nyei. Nyang gas, Ngos hauh soeu nghuot ge namoq taiq nyeis, ge.

⁷¹Housoeh hauh bang taiq zis gas, Yang gohtoeu chah kanghjyoeng chah shih lah? Yvnyang nyah nhuot masyah xauhgyo goeus, ge.