Read Achang LUKA 23 Bible Online

LUKA 23 - Achang bible

LUKA 23

¹Housoeh somci moqmuh dvnganhmoq yah toq las, nyang lyis Pilat jyank mas shwih e.

²Haih soeu ka dius jens lyis chowhang shwih whang lha, vsainnyang gas Khristu ge dah hwankti nghuot, ge Kesar lhyi khoengh ma kat noh, ge tung zis ngamoq nyvng, ge zau tsain kauq.

³Pilat nyang lyis nyei zis gas, Nvng Yuda hwankti nghuot lhyeh, ge. Nyang phuk taiq zis gas, Nvng taiq nyeis, ge.

⁴Pilat gas, Ngos haih dius yuk mas chah yobos eq ma nyvng, ge phudyei uhjyung jens yahge moqjens lyis taiq.

⁵Nghuot laus eq hauh bang zes kaiq las taiq zis gas, Haih dius yuk gas Galile mau masyah xi lha Yuda mau khyiq khanghmuh, haih joqyos mas jweh shoq jyauh las shwih hoeu, ge.

⁶Pilat haih zis xauhgyo yah dvyih, Haih dius yuk gas Galile dius nghuot lhyeh, ge nyei.

⁷Hwankti Herod guon dah yvmas soeu nghuot zis seq yah dvyih, nyang lyis hauh hwankti jyank mas shwih kat nhang. Hauh shvhoeu lhyi Herod eq Yerusalem mas nyeis.

⁸Herod gas Yesu lyis nyvng lyis svsoh gaus: khasoeh ge lyis nyah cho xauhgyo yvmvyah nyang lyis nyvng mes zis nyangh goeus. Chixoeuq dah vlho dvkoeuq koeuq lyis xauh nyvng das, ge nghamhloms nyeis.

⁹Herod gas nyang lyis dang nyoshoq nyei laus eq, nyang gas cha eq ma phuk taiq.

¹⁰Phudyei uhjyung jens yahge maussauh lhaih bang gas toq las, nyang lyis yobos khoek khoek taiq huon.

¹¹Herod gas nyah jesphung yah dvgeh Yhensain lhyi jwangh nyhap zis yah nyang lyis kyi kyi bvng dah dyi gvmhuot las Pilat jyank mas doms shwih dyei kat.

¹²Hauh nyenhyo Herod yahge Pilat gas buisnoms bweh los: xikpheh gas nyang changh nyang jes dvnghuot.

¹³Pilat gas Phudyei uhjyung jens yahge zauguon jens, dius jens lyis khi tsainh las taiq zis gas,

¹⁴Haih soeu ka dius jens lyis chowhang shwih whang soeu teh namoq ngah jyank mas shwih los las, yoeuh aq, namoq nyang dah xikkhonh mas ngos nyang lyis nyei yoeuh goeus. Nghuot laus eq, namoq nyang lyis yobos huon zis yah dvyhangteh, ngos nyang mas yobos ma nyvng.

¹⁵Ngos namoq lyis Herod jyank mas eq nhang kat goeus: Herod eq yobos ma nyvng. Yoeuh aq, haih soeu ka shei mon dah yobos cha eq ma kuot toh.

¹⁶Housoeh yvmvyah ngos haih soeu lhyi lyuk las kat kat das, ge.

¹⁷(Khasoeh ge lyis, hauh pwe mha thung lungh bang dvyuk yuk lyis ma lhuiq kat ma gis nghuot.)

¹⁸Somci moqmuh gas, Hauh soeu lhyi toh las nyamoq lyis Baraba lhuiq kat dyei aq, ge dvyih dvyot tsain kaiq sang.

¹⁹(Baraba gas wugungs lyis jausxo, coeuh kang nhang dah yobos, dius sat dah yobos gvng mas thung gyoh soeu nghuot.)

²⁰Pilat gas Yesu lyis lhuiq kat mes las dvlhain doms taiq.

²¹Nyamoq kaiq zis gas, Nyang lyis tapzains mas taplhangh aq, taplhangh aq, tsain ge.

²²Pilat gas, Hauh soeu ka cha cu lah? Ngos nyah jyank mas shei das yobos dvkoeuq eq ma nyvng, ge somh vlhain jweh shoq taiq. Housoeh las ngos nyang lyis lyuk las kat kat das, ge.

²³Dius jens gas hauh soeu lhyi tapzains mas taplhangh tyamp das xiklyis yomkat tsain kaiq nyeis las, hauh bang thwe yahge phudyei uhjyung jens dah thwe kaiq ung tyamp.

²⁴Pilat eq nyamoq dung zis yah dvyhangteh bweh shoq dang thang thyet dyei.

²⁵Coeuh kang nhang dah zis yahge dius sat yobos gvng mas thung lhunk toh soeu lhyi nyamoq o zis yah dvyhangteh lhuiq las, Yesu lyis gas nyamoq o khyvlyis kyauh tyamp.

²⁶Yhensain lhyi shwih thuq loh dah uhlyis, Kureni mhanhdyvp wukhau mhayah los langh dah Simon lyis nyvng lyis, nyhik las Yesu thang mha tapzains bos wuq nhang.

²⁷Yesu thang mha chank loh dah dius somci moqmuh mas, Yhensain gvng mas ngausdyeis ngausnhvp mus bang vmesbih jens dvyhamh bos.

²⁸Hauh bang lyis Yesu lhain yoeuh las taiq zis gas, Yerusalem lonyi jens eh, namoq ngah nyhenshang vngaus goh, namoq nyang xiklyis yahge namoq dah lo jens xiklyis ngaus geh.

²⁹Yoeuh aq, dius thonh vmesbih gas ngelhoq: lo ma wons ku dah ung yahge vnoeuh ma jyop ku dah nauh gas phauhdap ge taiq los dah buisnyeis jweh los das.

³⁰Hauh uhlyis nyamoq gas boms lyis, Ngamoq thoq mas jingh gyoh nhiq aq, jing jens eh, ngamoq lyis nghop toh dyei aq, ge khi das.

³¹Khasoeh ge lyis vnyaus zains lyis housoeh kuot lyis, vkyuk zains gas khasoeh bweh das lah, ge.

³²Yhensain yah dvgeh khyanktau aiq yuk lyis eq sat das xiklyis shwih thuq loh.

³³Uhkhangh ge dah joqyos mas jweh lyis, tapzains mas taplhangh las, khyanktau aiq yuk lyis eq nyah loqwi loqyos dvshot dvyuk taplhangh toh.

³⁴Housoeh las Yesu taiq zis gas, Uwus eh, nyamoq kuot dah zis nyamoq ma seq yvmvyah nyamoq lyis khyuot dyei aq, ge. Nyah dyi lyis eq nyamoq doeugoh las gvm yoeus.

³⁵Dius jens eq houmha tsain yoeuh yap joq. Houmha dah zau jens Yesu lyis jwangh zis gas, Nyang gohyhamh lyis daq khyuot yoeus. Mangso khyen yoeus dah Khristu nghuot lyis gas nyah gungs nyang khyuot yoeus bas jungh, ge.

³⁶Jeslo jens los las nyang lyis shihjyen jeis dyei uhlyis yah jwangh zis gas,

³⁷Nvng Yuda Hwankti nghuot jyoeng lhyi, nvnyang gungs nvnyang khyuot yoeus zo aq, ge.

³⁸Nyah vtoeu mha maussauh lhaih toh zis gas, Haih soeu ka YUDA HWANKTI nghuot, ge Heleni, Latin yahge Hebre nyingh pheh yah tsain lhaih toh.

³⁹Tapzains mas lhangh toh dah khyanktau dvyuk eq, Nvng Khristu nghuot lyis gas nah gungs lyis nvnyang yahge ngah aiq yuk lyis eq khyuot yoeus aq, ge ma phauh ma danh sang.

⁴⁰Gohtoeu dvyuk gas nyah dyenschangh phoq lyis nyho lha taiq zis gas, Nvng eq joeng zis heinyhoq xauh nyeis goeus lyis eq Mangso lhyi ma gyuk lhyeh?

⁴¹Yah aiq yuk gas vsainnyang kuot dah yobos gvng mas mon yih khyvlyis xauh kham lha, haih soeu ka cha ma cu, ge.

⁴²Nyang Yesu lyis taiq zis gas, Yhensain eh, nah munghdan mas jweh lyis, ngos lyis soh dyei aq, ge.

⁴³Yesu nyang lyis taiq zis gas, Ngos nvng lyis jyoengh taiq bah, khvnyhik nyang nvng ngos yah dvgeh Pharadisu mas nyeis das, ge.

⁴⁴Hauh shishenh gas dvci aiq shishenh ko nghuot las, somh shishenh jweh shoq dvmau gonh mau chuot joq.

⁴⁵Buis eq soeng soeng noq las, yhenmuh khau mha gos misseh eq vgungs masyah juiq tyamp.

⁴⁶Yesu thwe zainsmuh yah taiq zis gas, Uwus eh, ngah dyos lyis nah loq khau mha kyauh goeus, ge nyang kang gyoh.

⁴⁷Hauh cho lhyi jes dvxo guon zau nyvng lyis, Haih soeu ka ehnyet dan soeu gyingh nghuot, ge Mangso lhyi chungh nyeis.

⁴⁸Hauh cho lhyi los jweh yoeuh bang gas heisoeh teh yvlyis nyvng las sainhkhonh loq bat las tauh loh.

⁴⁹Galile mau masyah Yhensain thang mha chank los dah vmesbih jens yahge nyang yah seq goh bang eq we masyah tsain yap las hau dvnganh yvlyis yoeuh nyeis.

⁵⁰Yoeuh aq, nhaiqbos zau Yosep ge soeu nyang gas gis las dan soeu dvyuk nghuot.

⁵¹Nyang gas, Arimathia mas dah Yuda dius nghuot. Nyang gas Mangso munghdan lyis langh nyeis dah nhaiqbos soeu nghuot las nyamoq xam lha kuot yvmas xam ma bos xonh soeu nghuot.

⁵²Nyang gas Pilat jyank mas wvng las Yesu dah gungs lyis sang yoeus.

⁵³Gungs lyis khyoq las jeimuh mis yah lyet lho lha hank eq ma nyhop ku shih dah lop mas e kat toh.

⁵⁴Hauh nyeih gas Yuda jens dah sont buisnyeis nghuot zis yahge Yuda No Buisnyeis eq ni los goeus.

⁵⁵Galile mau masyah, nyang yah dvgeh chank los dah vmesbih jens eq lop mas nyah mvng toh dah joqyos lyis yoeuh das xiklyis tsain los.

⁵⁶Hauh thang lhyi nyamoq doms los las, xangh coeu yahge nvm pyo zis tsain sont toh. Tyingtoh dang yah dvyhangteh Yuda No Buisnyeis lyis no nyeis.