Read Achang LUKA 24 Bible Online

LUKA 24 - Achang bible

LUKA 24

¹Dvdaus dah cangxeih vnyeih, nvpsangh noq yah hau vmesbih jens gas, gohtoeu vmesbih jens yah dvgeh nyamoq sont toh dah xangh coeu chi lha lop pheh tsain e loh.

²Jweh lyis lop mas dah lukzains toeu phanh toh zis nyvng las,

³lop mas wvng loh lyis eq Yhensain Yesu dah mvng lyis ma tsain nyvng.

⁴Housoeh svsoh tsain mauh nyeis lyis, yoeuh aq, bvng dah dyi wuot dah dius aiq yuk, nyamoq vyvm mas yap joq.

⁵Hauh vmesbih jens gyuk yos zoh lyis yah nyeisjvng mas tsain gop joq lyis, hauh aiq yuk nyamoq lyis taiq zis gas, Dwis nyeis soeu lhyi shei bang mas chamus xo nyeis goh lah? Nyang heimha ma nyeis lo, dwis toq loh goeus.

⁶Galile mas nyeis shih yoq lyis nyang namoq lyis khasoeh taiq toh zis lyis soh geh.

⁷Cangsoeu Lo gas yaunos dap bang dah loq mas kyauh tyamp zis xauh las, tapzains mas taplhangh tyamp zis xauh thang lhyi somh vnyeih lyis dwis toq das, ge taiq toh, ge.

⁸Housoeh nyamoq gas nyang taiq dang lyis tsain soh.

⁹Lop masyah doms loh las hauh cho dvnganh, dvci dvyuk moq yahge gohtoeu dah bang lyis tsain taiq kyoh.

¹⁰Lvgyo jens lyis hauh loeuskyoh bang gas, Magdala Mari, Yaku ungwes Mari, Yoana yahge gohtoeu vmesbih jens tsain nghuot.

¹¹Nyamoq taiq dang gas lvdyoq mvnyei taiq teh dvnghuot las ma tsain jingh.

¹²Nghuot laus eq Petru gas toq las lop pheh wuih e. Lop mas jweh las gop yoeuh lyis lyet misseh dvjoq lo zis nyvng yvmvyah mauh las nyah yhen pheh tauh loh.

¹³Hauh nyeihyo nyang, Yerusalem masyah nyhet main ko we dah Ema-u wukhau pheh dius aiq yuk loh nyeis.

¹⁴Hauh nhaiqtang eq hau bweh lai loh dah cho lhyi taiq goh loh.

¹⁵Housoeh taiq goh nyeis lyis Yesu nyang nvmtanh jweh thuq los las, nyamoq dvgeh loh.

¹⁶Nghuot laus eq nyah aiq yuk gas Yesu nghuot zis ma seq das xiklyis nyoq hwah nhang.

¹⁷Nyang nyah aiq yuk lyis taiq zis gas, Nah aiq yuk gyung suh uhjyangh chah bvhwa lhah goh las nhaiqngis goh lah, ge.

¹⁸Khleopa ge soeu nyang lyis phuk taiq zis gas, Nvng gas Yerusalem mas dah boenghwus nghuot las, khvlyens bweh dah cho lhyi nvng kyingh ma seq dvmus lhyeh, ge.

¹⁹Nyang nyei zis gas, chah cho gah, ge. Nyah aiq yuk taiq zis gas, Nazaret wukhau mha dah Yesu cho nghuot. Nyang gas lvpe nghuot las, Mangso yahge dius xikkhonh mas kuot dah muh yahge taiq dang mas yomsoq bos soeu nghuot.

²⁰Hauh soeu lhyi phudyei uhjyung jens yahge ngamoq dah guon bang yah sat das xiklyis kyauh tyamp las, tapzains mas tsain taplhangh tyamp.

²¹Nyang gas Israel dius nyau lyis khyuot yoeus das soeu nghuot, oen ngamoq nghamhloms. Hauh thoq lyis haih cho bweh zis gvshih somh nyeih bos goeus.

²²Ngamoq mas dah vmesbih dvyhamh nvpsangh yah e lha,

²³Nyah mvng ma nyvng las tauh los lyis, Nyang gas dwis nyeis, ge loeuswons bang yah nyvng xoeuq dah cho los tsain taiq kyoh las nyamoq mauh nyeis.

²⁴Housoeh las ngamoq yah nyeis bang dvyhamh lop mas e yoeuh lyis eq, hauh vmesbih jens taiq teh nyvng nghuot laus eq nyamoq, nyang lyis ma nyvng, ge taiq ge, ge.

²⁵Nyang nyah aiq yuk lyis taiq zis gas, Lvpe jens dah dang dvnganh yvlyis yoh lomsjingh das joeui ma bos, nhaiqlom than bang eh,

²⁶Khristu gas housoeh teh shanghsenh kham lha nyah phunk mas yoh wvng das ma nghuot lhyeh, ge lho lha,

²⁷Moshe masyah xi lha lvpe jens dvnganh dah dang mas, nyang yah sen lha lhaih toh dang lyis nyang nyah aiq yuk lyis phui kyoh.

²⁸Nyah aiq yuk loh nyeis dah wukhau nvm mas jweh lyis, nyang lai loh das teh doeus las,

²⁹nyah aiq yuk gas nyang lyis, Ngah aiq yuk yah dvgeh wukhau mha thoeng goh: buis wvng goeus, mau eq chuot goeus, ge nyang lyis khyoeuq. Housoeh las thoeng das xiklyis nyah aiq yuk yah loh.

³⁰Womjus mas nyamoq yah dvgeh tsung toh uhlyis, ohlhyoq lyis yoeus las shvmanh thang lhyi khyiq las nyah aiq yuk lyis dyei.

³¹Hauh uhlyis nyah aiq yuk nyoq bangh los las, nyang Yesu nghuot zis lyis tsain seq. Housoeh las nyang gas nyah aiq yuk jyank masyah dyuk loh.

³²Nyah aiq yuk dvyuk yah dvyuk taiq goh zis gas, Nyang cho mha yah aiq yuk yah dvgeh taiq goh los las, lhaihtoh dang vjyuk phant uhlyis, yah aiq yuk dah nhaiqlom nyi soeh ngeh vnghuot lah, ge.

³³Nyah aiq yuk gas hauh shishenh lyis nyang, Yerusalem wus pheh tauh loh las dvci dvyuk moq gas gohyhamh bang yah dvgeh nyeis zis lyis loh nyvng.

³⁴Huom nyeis bang eq, Yhensain ka jyoengh dwis toq goeus, Simon dah nyoq mas eq nyvng xoeuq, ge taiq.

³⁵Nyah aiq yuk eq cho mha bweh zis yahge ohlhyoq khyiq yvmas, nyang nghuot cho yoh seq cho lhyi tsain taiq kyoh.

³⁶Housoeh tsain taiq goh nyeis lyis, nyamoq dah vgungs mas Yesu yap las nyamoq lyis taiq zis gas, Namoq nyenstap nyeis bas jungh, ge.

³⁷Nghuot laus eq changlo jens gas sidyos lyis nyvng, ge nghamh las gyuk nyeis.

³⁸Nyang nyamoq lyis taiq zis gas, Chamus chiq nyeis goh lah? Chamus ehnyet khamkhvv goh lah?

³⁹Ngah loq ngah khyei lhyi yoeuh geh, ngos lyis zwi yoeuh geh, ngos gas gungs gyingh nyang nghuot. Sidyos gas ngos lyis nyvng teh shohyau shohkhyiq ma bos, ge.

⁴⁰Haih zis taiq lho lha, nyang nyamoq lyis nyah loq yahge nyah khyei chixoeuq.

⁴¹Hauh bang gaus las ma yoh jingh shih, dvmauh nyeis shih lyis, nyang nyamoq lyis taiq zis gas, Namoq heimha zonoms dvja ja vyoh lah, ge.

⁴²Nyamoq gas nyang lyis kank dah oengdoq dvchink yahge dyoyhei dvtap dyei lyis,

⁴³Yhensain ka yoeus las nyamoq xikkhonh mas zo.

⁴⁴Nyang nyamoq lyis taiq zis gas, Moshe dah Lyi mas eq, lvpe jens dah maussauh mas yahge Chungh Dang maussauh mas ngos lyis toeuq las lhaih ya lhaih toh dang nyuk los chah ngos namoq yah dvgeh nyeis khoq yoq lyis taiq dah dang gas, haih cho nyang nghuot.

⁴⁵Housoeh las lhaihtoh dang seqgyo das xiklyis nyamoq dah seqgyo cho lhyi phank dyei.

⁴⁶Nyang taiq zis gas, Lhaihtoh dang heisoeh ge: Khristu gas shanghsenh zis xauh las somh vnyeih lyis shei masyah dwis toq chah:

⁴⁷Yerusalem masyah xi lha, dius nyau khanghmuh lyis yaunos yoh khyuot dyei dah nhaiqlom thaiq cho lhyi nyah nyings mas yoh taiq kyoh das.

⁴⁸Namoq eq haih cho dvnganh dah kanghjyoeng tsain nghuot.

⁴⁹Yoeuh aq, ngah Uwus dah dangthoengh joq zis yah dvyhangteh, ngos namoq lyis nhang kat dyei das. Housoeh las namoq gas nyhang mha dah yomsoq ma xauh yoeus dvchank, Yerusalem mas nyeis shih geh, ge.

⁵⁰Hauh thang lhyi nyamoq lyis Bethani jweh shoq shwih loh las, nyah loq toeu lha nyamoq lyis shvmanh dyei.

⁵¹Housoeh shvmanh dyei nyeis uhlyis, nyang gas changlo jens yah gang las maukhung mha toqh yoeus zis xauh goeus.

⁵²Housoeh las nyamoq gas nyang lyis paiq las svsoh gausyis zis yah Yerusalem wus pheh tsain tauh loh.

⁵³Housoeh Mangso lhyi chunghtoq las chungh zis yah Yhenmuh mas tsain nyeis nyeis. Amen.