Read Achang LUKA 3 Bible Online

LUKA 3 - Achang bible

LUKA 3

¹Hwankti Kesar guon zis dvci oeng vzvn lyis Pontu Pilat gas Yuda mau lyis, Herod gas Galile mau lyis, nyah vnoeuh Yuda gas Ituria yahge Trakoni lyis, Lisani gas Abili lyis guon nyeis uhlyis,

²Anna yahge Kayapa gas phudyei zainsmuh tsain nghuot. Hauh uhlyis, Mangso dah dang gas mhanhdyvp mas nyeis, Zekharia dah lo Yohan jyank mas jweh los.

³Nyang gas Yodan lvng vwi vyvm dvkhauyah jweh las yaunos masyah nhaiqlom thaiq zis yah jeisnyhop kham geh, Mangso ka namoq dah yaunos khyuot dyei das, ge taiq hoeuh nyeis.

⁴Lvpe Esaia dah maussauh mas lhaih toh vgus, mhanhdyvp mas dvyuk kaiq nyeis dah thwe ka, Yhensain dah cho lhyi tsain sont toh geh; Nyah chokhyoh lyis soq dan geh.

⁵Langhkhau khanghmuh yoh tyink das, Boms khanghmuh, jing khanghmuh lyis chink khyoq das; Cho yauhyot lyis yoh xiq das, Cho guih lyis yoh lhoq dan das.

⁶Cangsoeu dius dvnganh Mangso dah khyuot yoeus cho lhyi nyvng das, ge.

⁷Yohan ka nyah jyank mas jeisnyhop kham das xiklyis tsain los dah dius moqjens lyis taiq zis gas, Ywimuhtsanh vnyau eh, jweh los das dah nhaiqlom dyis masyah cangh das zis namoq lyis hank yah taiq kyingh goh lah?

⁸Housoeh yvmvyah nhaiqlom thaiq zis yah mon yih dah vshih shih geh. Namoq ehnyet mas Abraham gas namoq dah phauh thyeih nghuot, oen vtaiq zo goh; khasoeh ge lyis, ngos namoq lyis taiq bah, Mangso ka haih lukzains masyah Abraham xiklyis lo jens yoh thuq los nhang.

⁹Gvshih yangh wuzung gas saiqzains khyei mha toh goeus. Housoeh yvmvyah gis dah vshih ma shih dah vzains khanghmuh lyis thoeuq las nyi mas kat das.

¹⁰Dius jens nyang lyis nyei zis gas, Housoeh lyis ngamoq cha kuot das lah, ge.

¹¹Nyang nyamoq lyis phuk taiq zis gas, Thoq dyi aiq dung yoh soeu ka ma yoh soeu lhyi gvm dyei bas jungh; zonoms yoh soeu eq vgus housoeh kuot bas jungh, ge.

¹²Khoengh khywi bang eq jeisnyhop kham das ge nyah jyank mas lyih las taiq zis gas, Svra eh, ngamoq cha kuot das lah, ge.

¹³Nyang nyamoq lyis taiq zis gas, Toeuq toh dah vgus masyah jyeq las vkhywi yoeus goh, ge.

¹⁴Jeslo jens eq nyang lyis nyei zis gas, Ngamoq cha kuot das lah, ge. Nyang nyamoq lyis phuk taiq zis gas, Hank lyis eq lyi ma bos khyvlyis ngwis vlhyent yoeus goh; ma jus khyvlyis zau vkauq goh, namoq nyang dah uhkung phauh yah nhaiqtap geh, ge.

¹⁵Dius jens gas, Yohan ka Meshia mvbeh, ge nghamhloms zis yah nyamoq ehnyet mas tsain nghamh yoeuh nyeis.

¹⁶Yohan nyamoq dvnganhmoq lyis phuk taiq zis gas, Ngos gas namoq lyis jeis mas jeisnyhop dyei: nghuot laus eq ngah thoq lyis yombos soeu dvyuk ngah thang mha los nyeis. Ngos gas nyah thyvkoq twih phui das zis yangh ma mon. Nyang gas namoq lyis Gyingshang Dyos yah eq, nyi yah eq jeisnyhop dyei das.

¹⁷Nyang nyah thanjang mas guk lhank das xiklyis hauq chi toh. Nyang gukmos lyis jyi mha kat toh las, guksom lhyi ka ma jom nyi mas ngheq das, ge.

¹⁸Housoeh nyang gas gohtoeu taiq kyingh dang nyoshoq yah eq dius jens lyis gausyis dang taiq kyoh.

¹⁹Mau nyei boms dvboms lyis guon dah zau Herod gas nyah vnoeuh Philip dah yhensain nyhiq Herodia cho yahge, Herod kuot dah ma shop muh dvnganh gvng mas eq nyang nyho zis xauh.

²⁰Hau thang lhyi Herod gas Yohan lyis thung lhunk zis yah nyang gas zes ma gis dah muh kuot goeus.

²¹Dius jens dvnganh jeisnyhop dye kham thang lhyi Yesu eq jeisnyhop kham. Nyang shvmanh dung nyeis lyis maukhung phank los las,

²²Gyingshang Dyos gas khotjyauh gungs teh zis nyah thoq mas gyoh lyih. Hauh uhlyis maukhung mhayah thwe dvkoeuq thuq los zis gas, Nvng gas ngos jyetdap dah ngah Lo nghuot, ngos nvng lyis nhaiqdoeus, ge.

²³Yesu gas muh kuot xi loh lyis, somhci zvn ko nghuot; Nyang gas dius jens nghamh vgus, Yosep dah lo khyvlyis nghuot. Yosep gas Heli dah lo;

²⁴Heli gas Mathat dah lo; Mathat gas Lewi dah lo; Lewi gas Melki dah lo; Melki gas Yanai dah lo; Yanai gas Yosep dah lo;

²⁵Yosep gas Matathia dah lo; Matathia gas Amo dah lo; Amo gas Nahum dah lo; Nahum gas Esli dah lo; Esli gas Nagai dah lo;

²⁶Nagai gas Maat dah lo; Maat gas Matathia dah lo; Matathia gas Semein dah lo; Semein gas Yosek dah lo; Yosek gas Yoda dah lo;

²⁷Yoda gas Yoanan dah lo; Yoanan gas Resa dah lo; Resa gas Zerubabe dah lo; Zerubabe gas Shealtiel dah lo; Sheatiel gas Neri dah lo;

²⁸Neri gas Melki dah lo; Melki gas Adi dah lo; Adi gas Khosam dah lo; Khosam gas Elmadam dah lo; Elmadam gas Era dah lo;

²⁹Era gas Yoshua dah lo; Yoshua gas Elieza dah lo; Elieza gas Yorim dah lo; Yorim gas Mathat dah lo; Mathat gas Lewi dah lo;

³⁰Lewi gas Simon dah lo; Simon gas Yuda dah lo; Yuda gas Yosep dah lo; Yosep gas Yonam dah lo; Yonam gas Eliakim dah lo;

³¹Eliakim gas Melea dah lo; Melea gas Mena dah lo; Mena gas Matatha dah lo; Matatha gas Nathan dah lo; Nathan gas Dawi dah lo;

³²Dawi gas Yese dah lo; Yese gas Obed dah lo; Obed gas Boaz dah lo; Boaz gas Salmon dah lo; Salmon gas Nashon dah lo;

³³Nashon gas Aminadab dah lo; Aminadab gas Admin dah lo; Admin gas Arni dah lo, Arni gas Hezron dah lo; Hezron gas Pere dah lo; Pere gas Yuda dah lo;

³⁴Yuda gas Yakop dah lo; Yakop gas Isak dah lo; Isak gas Abraham dah lo; Abraham gas Tera dah lo; Tera gas Nahor dah lo;

³⁵Nahor gas Serug dah lo; Serug gas Reu dah lo; Reu gas Peleg dah lo; Peleg gas Eber dah lo; Eber gas Shela dah lo;

³⁶Shela gas Kainan dah lo; Kainan gas Arphaza dah lo; Arphaza gas Shem dah lo; Shem gas Noa dah lo; Noa gas Lamek dah lo;

³⁷Lamek gas Methusela dah lo; Methusela gas Enok dah lo; Enok gas Yared dah lo; Yared gas Mahalalel dah lo; Mahalalel gas Kenan dah lo;

³⁸Kenan gas Enosh dah lo; Enosh gas Set dah lo; Set gas Adam dah lo; Adam gas Mangso dah lo nghuot.