Read Achang LUKA 4 Bible Online

LUKA 4 - Achang bible

LUKA 4

¹Hauh thang lhyi Yesu gas Gyingshang Dyos dyingh las Yodan lvng masyah tauh loh lyis, Dyos yah mhanhdyvp pheh shwih loh.

²Houmha nyeici nyeih Satan yah shiwu zis xauh; hauh buisnyeis gyo lyis nyang gas cha eq ma zo las, thang thank lyis nyang wom yuot.

³Housoeh las yius nyang lyis taiq zis gas, Nvng Mangso dah Lo nghuot lyis gas, haih lukgoq lyis ohlhyoq bweh nhang aq, ge.

⁴Yesu nyang lyis phuk taiq zis gas, Dius gas ohlhyoq yah kyingh yoh dwis nyeis zis ma nghuot, ge lhaih toh, ge.

⁵Tsai, yius gas nyang lyis boms nyhang thoq mas shwih doq loh las, mungkvn mas dah munghdan dvnganh lyis dvdvm dyvm chixoeuq.

⁶Yius gas, Haih yomsoq yahge dis cho dvnganh yah ngos nvng lyis dyei das. Khasoeh ge lyis hauh zis gas ngos lyis kyauh toh goeus las, ngos dyei mes soeu hank lyis eq yoh dyei.

⁷Nvng ngos lyis paiq lyis gas, hai dvnganh yah nah zis nghuot das, ge.

⁸Yesu nyang lyis phuk taiq zis gas, Nvng Yhensain nah Mangso lhyi paiq las, nyang lyis kyingh phuqsoe chah, ge lhaih toh, ge.

⁹Tsai, yius gas nyang lyis Yerusalem mas shwih loh las, Yhenmuh thyoh mas yap nhang lha taiq zis gas, Nvng Mangso dah Lo nghuot lyis gas hei mhayah o mha dyvm gyoh aq.

¹⁰Khasoeh ge lyis lhaih toh zis gas, Nvng lyis gomh das xiklyis Mangso ka nyah loeuswons bang lyis tying toh das.

¹¹Nah khyei lukzains mas ma thungh das xiklyis nyamoq loq yah nvng lyis po langh das, ge.

¹²Yesu phuk taiq zis gas, Nvng Yhensain nah Mangso lhyi vshi yoeuh ge lhaih toh, ge.

¹³Yius gas Yesu lyis shiwu zis dvnganh dye goeus ya, nyah jyank masyah dvyoq gang loh.

¹⁴Hou mhayah Yesu gas Galile mau pheh tauh loh. Gyingshang Dyos dah yomsoq gas nyang mas bos joq. Hauh uhlyis nyah cho dvmau yah hoeuh loh.

¹⁵Nyang nyamoq dah lyi jungs mas jyauh las nyamoq dvnganhmoq nyang lyis chungh.

¹⁶Housoeh nyang nyeis bes los dah Nazaret mas jweh loh las, nyah thungh yah dvyhangteh Yuda No Buisnyeis lyis lyi jungs mas wvng loh. Houmha nyang maussauh nghap das xiklyis toq yap.

¹⁷Lvpe Esaia maussauh dain nyang lyis dyei los las, nyang hauh yvlyis phank lyis heisoeh ge lhaih toh yvlyis nyvng.

¹⁸Yhensain dah Dyos ngah thoq mas nyeis. Khasoeh ge lyis nyungs bang lyis gausyis dang taiq kyoh das xiklyis, Nyang ngos lyis coeu juot dyei. Lhunk toh bang lyis phank kat das xiklyis, nyoqjet bang doms nyvng das xiklyis, zaiq toh las shanghsenh zis xauh bang luiq das xiklyis taiq kyoh das nyhenshang nyang ngos lyis nhang kat.

¹⁹Yhensain nhaiq doeus zvn lyis taiq hoeuh das, ge.

²⁰Dye lyis nyang hauh maussauh nyheih las uhshe soeu lhyi doms dyei lho lha tsung toh. Hauh lyi jungs mas bang dvnganh nyang lyis yoeuh tsuk toh.

²¹Housoeh nyang nyamoq lyis taiq zis gas, Hai lhaihtoh dang gas khvnyhik nyang namoq dah no mas nyuk los goeus, ge.

²²Dvnganhmoq yah nyah cho lhyi kanghjyoeng kat dyei zis yahge, nyah nhuot masyah thuq los dah jyehjuh dang lyis mauh las, Haih soeu ka Yosep dah lo ma nghuot lhyeh, ge.

²³Housoeh las nyang nyamoq lyis taiq zis gas, Namoq gas ngos lyis, Lastsiang eh, nvnyang gungs lyis yhohzo aq; ngamoq xauhgyo ku vgus, Kaperna-um mas kuot teh nvnyang mau mas eq kuot xoeuq aq, ge sodang yah tsain taiq los das, ge.

²⁴Nyang taiq zis gas, Ngos namoq lyis jyoengh taiq bah, lvpe lhyi nyah choq thyet mau mas lhom yoeus zis ma bos, ge.

²⁵Nghuot laus eq ngos namoq lyis jyoengh taiq bah, Eliya zaih lyis maukhung lhyi somh zvn lhamhmuh khyuk khyvp mau ma wus las, mau gonh mas panghkhauq gyoh los lyis Israel vnyau mas chauhmuh nyoshoq nyeis khoq ku.

²⁶Nghuot laus eq Sidon mau Zarephat mha dah chauhmuh dvyuk mas lai las gohyuk hank jyank mas eq Eliya lyis ma nhang kat.

²⁷Lvpe Elisha zaih lyis eq Israel mau mas mvnggvng dap bang nyoshoq nyeis khoq; Siria dius Naman mas lai las nyamoq mas gohyuk hank eq ma yoh thyauhlhang los, ge.

²⁸Haih dang xauhgyo lyis lyi jungs mas bang dvnganh gas nhaiqlom dyis zis yah,

²⁹toq las nyang lyis wus nghe pheh khat thuq las nyamoq wus kuot toh dah jing mhung mhayah vtauh khyvlyis duon thyet khyoq das ge tsain shwih loh.

³⁰Nghuot laus eq nyang gas nyamoq dah vjo masyah thuq las loh lo.

³¹Yesu gas Galile mau Kaperna-um wus mas loh las, Yuda No Buisnyeis lyis nyang dius jens lyis jyauh.

³²Nyang gas vmingh yah taiq yvmvyah nyamoq gas nyang jyauh cho lhyi mauh.

³³Hauh uhlyis lyi jungs mas yius kuq dah dius dvyuk nyeis, nyang gas yomkat kaiq las,

³⁴Nazaret phoq Yesu eh, nvng ngamoq yah cha sen lah? Nvng ngamoq lyis mhont das xiklyis los lhyeh? Ngos nvng hank nghuot zis seq; Nvng gas Mangso dah Gyingshang Soeu nghuot, ge.

³⁵Hauh uhlyis Yesu gas nyang lyis, Tsoek! nyah jyank masyah thuq loh aq, ge nyho. Housoeh las yius gas hauh soeu lhyi dvm ma dap nhang nhang nyamoq vgungs mas toeulhain tyamp khoq las nyah jyank masyah thuq loh.

³⁶Housoeh las dvnganhmoq mauh las nyamoq nyang changh taiq goh nyeis zis gas, Haih zis gas chah dang nghuot au lhyeh? Zaudang yah eq, yomsoq yah eq yius lyis taiq kat las nyamoq thuq loh, ge.

³⁷Housoeh las hauh mau vyvm vwi joqyos khyiq khanghmuh mas nyah cho tsain taiq hoeuh loh.

³⁸Nyang lyi jungs masyah thuq loh las, Simon dah yhen mha wvng loh. Houmha Simon dah yuknyih gungs svsoh ngeh las nos nyeis. Nyamoq gas nyah nyhenshang Yesu lyis sang.

³⁹Housoeh las nyang nyah nvm mas yap las hauh nos lyis nyho tyamp lho lhyi nyang gungs ngeh zis gis los. Nyang houjang toq las nyamoq lyis daih.

⁴⁰Buis wvng zoh lyis noslom vja ja yah nos moq yoh bang dvnganh gas hauh bang lyis nyah jyank mas shwih lyih; nyang gas nyamoq yuk khanghmuh dah thoq mas loq kih dyei las gis los nhang.

⁴¹Yius jens eq, nyoshoq moq masyah, Nvng gas Mangso dah Lo nghuot, ge kaiq las tsain thuq loh. Nyamoq gas nyang Meshia nghuot yvlyis seq yvmvyah nyang nyamoq lyis dang ma yoh jis lo shoq nyho.

⁴²Nyoq nyvng los lyis nyang gas mhanhdyvp pheh loh. Dius jens gas nyang lyis chank xo lha, nyah jyank mas jweh lyis, nyang lyis nyamoq jyank masyah ma gang loh das xiklyis tomp.

⁴³Yesu nyamoq lyis taiq zis gas, Gohwus gohthomh mas eq Mangso munghdan gausyis dang ngos loh taiq kyoh chah: khasoeh ge lyis hauh nyhenshang ngos lyis nhang kat, ge.

⁴⁴Housoeh nyang gas dvmau gonh mas dah lyi jungs mas tsain taiq hoeuh.