Read Achang LUKA 5 Bible Online

LUKA 5 - Achang bible

LUKA 5

¹Dvlhain ka Yesu Genesaret thomh yvm mas yap joq dah uhlyis moqjens gas Mangso dang gyo yoeus das xiklyis nhoenk los.

²Hauh uhlyis nyang gas jyank yvm mas lhyik aiq koeuq joq yvlyis nyvng. Oeng nhoh bang gas lhyik masyah thuq las nyho tsain cheih nyeis.

³Nyang gas Simon dah lhyik khau mha wvng lho lha, tungyos masyah dvtsiq we loh das xiklyis Simon lyis sang. Housoeh nyang tsung lha moqjens lyis jyauh.

⁴Nyang dang dye taiq lyis Simon lyis taiq zis gas, Jeis nauh yvmas ywi las nyho doeuh aq, ge.

⁵Simon nyang lyis phuk taiq zis gas, Yhensain eh, ngamoq nyens gonh kuot nyung goeus, nghuot laus eq nah dang masyah ngos nyho doeuh bah, ge.

⁶Nyamoq nyho doeuh zis yah dvyhangteh oengdoq nyoshoq xauh doeuh yoeus las nyho eq juiq bah ge loh.

⁷Housoeh nyamoq gas gohtoeu lhyik mas dah loeuzomh jens lyis los bos pangh das xiklyis uk nyeis. Nyamoq los las lhyik aiq koeuq mas dyingh las nyop loh bah ge loh.

⁸Simon Petru hauh zis nyvng lyis, Yesu dah khyeiyang mas gyuis gyoh las taiq zis gas, Yhensain eh, ngah jyank masyah gang loh aq: Khasoeh ge lyis ngos gas yaunos wons soeu nghuot, ge.

⁹Khasoeh ge lyis nyamoq oengdoq hounyhoq tsain xauh yoeus yvmvyah, nyang eq, nyang yah dvgeh bang dvnganhmoq eq mauh.

¹⁰Simon dah oengnhoh changh Zebedi dah lotang Yaku yahge Yohan eq tsain mauh. Yesu Simon lyis taiq, Vgyuk, gvshih masyah nvng dius nhoh das, ge.

¹¹Nyamoq lhyik lyis jyankyvm mas dvp loh lho lhyi, nyamoq vyhang dvnganh tsain toh khoq las nyah thang mha chank loh.

¹²Nyang wugungs dvkoeuq mas nyeis lyis, yoeuh aq, dvgungs yah mvnggvng dap soeu dvyuk Yesu lyis nyvng lyis, dupaiq las dung zis gas, Yhensain eh, nvng bauh nghuot lyis gas ngos lyis yoh thyauhlhyang los nhang, ge.

¹³Hauh uhlyis Yesu gas nyang nyah loq yhuonh kat las, nyang lyis tanh uhlyis yah, Ngos mes, nvng thyauhlhyang los aq ge lho lhyi, houjang nyah gungs mas mvnggvng gas dyuk loh.

¹⁴Yesu gas, hank lyis eq ma taiq kyoh das xiklyis khyangh com lho lha taiq zis gas, Loh aq, gohyhamh bang dah xiklyis kanghjyoeng nghuot bas jungh, phudyei soeu jyank mas nah gungs loh chixoeuq aq, Moshe lyi vgus, nvng thyauhlhyang los goeus gvng mas loh phudyei khoq aq, ge.

¹⁵Nghuot laus eq Yesu dah cho ka zes hoeuh loh. Dius moqjens gas nyah dang gyo yoeus das zis yahge nos yhoh yoeus das xiklyis tsain zain los.

¹⁶Nghuot laus eq nyang gas mhanhdyvp pheh thuq loh las shvmanh dung nyeis.

¹⁷Dvnyeih gas, nyang nyamoq lyis jyauh nyeis lyis, Galile mau, Yuda mau yahge Yerusalem, wus khanghmuh mas dah Pharishe jens yahge lyi svra jens eq, nyah nvm thaq los tsung toh. Nyamoq lyis gis los nhang das xiklyis Yhensain dah yomsoq gas nyah jyank mas bos joq.

¹⁸Yoeuh aq, gungsjen shei soeu dvyuk lyis yhetyos masyah nyamoq dvng lyih las, nyah xikkhonh mas wvng das xiklyis cho tsain xo.

¹⁹Nghuot laus eq dius sunk nyo yvmvyah nyang lyis khasoeh kuot las dvng hwank das cho xo ma nyvng las, nyamoq gas yhenkhung mha doq loh las yhenkhung phank lho lha, hauh soeu lhyi nyah yhetyos yah dvgeh moqphung vgungs, Yesu dah xikkhonh mas juons khyoq kat.

²⁰Nyang nyamoq dah lomsjingh nhaiqlom lyis nyvng lyis nyang lyis taiq zis gas, Buisnoms eh, nah yaunos khyuot dyei goeus, ge.

²¹Hauh uhlyis maussauh lhaih bang yahge Pharishe moq gas, heisoeh loeusmus soqzo dang taiq soeu ka hank nghuot lah? Mangso kyingh ma nghuot lyis gas, yaunos hank yoh khyuot dyei lah, ge.

²²Nghuot laus eq nyamoq nghamh zis lyis Yesu seq yvmvyah, nyamoq lyis phuk taiq zis gas, Namoq ehnyet mas chamus housoeh tsain nghamh goh lah?

²³Nah yaunos khyuot dyei goeus oen zis yahge, Toq yap las suh loh aq, oen zis kha khonh zes taiq lwis lah?

²⁴Nghuot laus eq cangsoeu Lo gas nyeisjvng thoq mas yaunos yoh khyuot dyei dah vmingh yoh zis gas namoq seq das xiklyis hauh gungsjen shei soeu lhyi, Ngos nvng lyis taiq bah, Toq aq, nah yhetyos yoeus las nah yhen pheh loh aq, ge.

²⁵Houjang nyang nyamoq xikkhonh masyah toq las, nyah yhetyos yoeus lho lha Mangso lhyi chungh uhlyis yah nyah yhen pheh loh.

²⁶Nyamoq dvnganhmoq mauh dvn las Mangso lhyi chungh nyeis; nyamoq gyuk las taiq zis gas, Khvnyhik ngamoq muh gohtseq nyvng goeus, ge.

²⁷Hauh thang lhyi nyang thuq loh lyis khoengh khywi jang mas Lewi ge dah khoengh khywi soeu tsung toh zis lyis nyvng las nyang lyis, Ngah thang mha chank los aq, ge.

²⁸Nyang gas dvnganh toh khoq las nyah thang mha chank loh.

²⁹Lewi gas Yesu lyis nyah yhen mha pwe zainsmuh dvkoeuq kuot dyei; houmha khoengh khywi bang yahge gohtoeu nyoshoq moq dvgeh tsung toh.

³⁰Housoeh las Pharishe moq yahge nyamoq dah maussauh lhaih bang dvyhamh gas, Namoq khoengh khywi bang yahge yaunos wons bang yah dvgeh chamus zo shuk goh lah, ge nyah changlo jens lyis tsain lop.

³¹Yesu nyamoq lyis phuk taiq zis gas, Yanghzan bang gas mvcheih lastsiang ma chah, nos bang dvchah.

³²Dan bang lyis khi das xiklyis ngos lyih zis ma nghuot; yaunos wons bang nhaiqlom thaiq das xiklyis dvnghuot, ge.

³³Nyamoq, nyang lyis taiq zis gas, Yohan dah changlo jens gas Pharishe dah changlo jens teh dvsoq soq lyis womkyi lha shvmanh dung; nghuot laus eq nah changlo jens gas zo shuk nyeis, ge.

³⁴Nyang nyamoq lyis taiq zis gas, Nyi hwank pwe los bang lyis, nyamoq loloeu saiq yah dvgeh nyeis shih lyis wom yoh kyi nhang das lah?

³⁵Nghuot laus eq, loloeu saiq lyis nyamoq jyank masyah shwih loh buisnyeis jweh los das, hauh uhlyis nyamoq womkyi das, ge.

³⁶Nyang nyamoq lyis dangtoeuq dvkoeuq taiq zis gas, Dyi saiq masyah misseh chuiq las dyi tyang mha hank ma pho; housoeh kuot lyis gas, dyi saiq eq juiq las, vcauh eq dyisaiq seh yah ma phi goh das.

³⁷Zvbiq saiq eq shohyeis thung cauh mas hank ma kat, shohyeis thung cauh mas zvbiq jeis saiq kat lyis gas, zvbiq jeis saiq gas hau thung lhyi juiq nhang zis yah zvbiq shuon lha shohyeis thung eq monh das.

³⁸Nghuot laus eq zvbiq saiq lyis gas shohyeis thung saiq mas kat chah.

³⁹Zvbiq vcauh shuk goeus soeu ka vsaiq lyis ma o: Khasoeh ge lyis vcauh gas gis ge taiq, ge.