Read Achang LUKA 7 Bible Online

LUKA 7 - Achang bible

LUKA 7

¹Yesu dius jens lyis dvnganh dye jyauh goeus ya, Kaperna-um wus mas wvng loh.

²Hauh uhlyis jes dvxo guon zau jyetdap dah jyeidwis gas nos las shei loh nyeis.

³Nyang Yesu dah loeus xauhgyo las, Yuda jens dah logis jens lyis Yesu jyank mas, nyah jyeidwis lyis lyih lhoq gis dyei das xiklyis sang nhang kat.

⁴Nyamoq Yesu jyank mas jweh lyis, nyang lyis khyoeuq taiq zis gas, Nvng haih zis kuot dyei das xiklyis nyang gas mon yih soeu nghuot.

⁵Nyang gas yah vnyau lyis jyetdap yvmvyah, yah xiklyis lyi jungs eq dvkoeuq kuot dyei soeu nghuot, ge.

⁶Housoeh las Yesu gas nyamoq yah dvgeh chank loh. Nyang hauh yhen yah khahweq ma we yvmas jweh lyis, jes dvxo guon zau gas nyah dyenschangh lyis yah taiq nhang kat zis gas, Yhensain eh, nvng lyis ma thauqkhyi lo goeus jungh, nvng ngah yhen nyhangh mau khau mas wvng das zis ngos ma mon.

⁷Housoeh ngos eq nah jyank mas lyih das zis ma mon oen ngos nghamh; nghuot laus eq nah dang dvkhonh yah taiq kat aq. Housoeh lyis ngah jyeidwis gis los das.

⁸Khasoeh ge lyis ngos gas vmingh khau mha dah dius dvyuk nghuot las, ngah o mha eq jeslo jens nyeis: ngos haih soeu lhyi, Loh aq, oen lhyi nyang loh. Gohtoeu dvyuk lyis, Los aq, oen lhyi nyang los. Ngah jyeidwis lyis, Haih zis kuot aq, oen lhyi nyang kuot, ge.

⁹Yesu gas hauh zis xauhgyo lyis, nyang lyis mauh las nyah thang mha chank yenh bang lyis lhain yoeuh las, Ngos namoq lyis taiq bah, Israel dius nyau mas yangh hei iq lomsjingh zis ngos ma nyvng, ge.

¹⁰Hau nhang kat zis xauh bang yhen mha doms jweh loh lyis, hauh jyeidwis gas gis nyeis langh goeus zis lyis nyvng.

¹¹Ma nyangh lyis [2] nyang gas Na-in ge dah wukhau mha loh lyis nyah changlo jens yahge moqjens eq nyang yah dvgeh loh.

¹²Nyang wus khomh jweh ni los lyis, Yoeuh aq, chauhmuh dvyuk dah loloeu loteh shei lha mvng tsain dvng nyhop loh: wugungs dius nyoshoq eq nyang yah dvgeh nghuot.

¹³Yhensain ka hauh chauhmuh lyis nyvng lyis nhaiq yoeuh nyen las, nyang lyis, Vngaus, ge.

¹⁴Nyang loh las, koncaih lyis tanh lho lhyi, mvng dvng bang gas no yap joq. Housoeh nyang gas, Loyvm phoq eh, ngos nvng lyis taiq bah, Toq aq, ge.

¹⁵Shei soeu ka toq tsung lha dang jis los. Housoeh Yesu gas nyah ungwes lyis kyauh kat.

¹⁶Dvnganhmoq gyuk los las, nyamoq Mangso lhyi chungh zoh lyis yah taiq zis gas, Lvpe zainsmuh dvyuk yamoq mas thuq los goeus; Mangso ka nyah dius lyis lyih komh yenh, ge.

¹⁷Housoeh las hai nyah loeus gas Yuda mau gonh yahge hauh vyvm vwi mas tsain taiq hoeuh loh.

¹⁸Yohan dah changlo jens gas hauh cho dvnganh Yohan lyis loh taiq kyoh.

¹⁹Yohan gas nyah changlo aiq yuk lyis khi lha, Yesu jyank mas nhang lha taiq zis gas, Nvng gas lyih das soeu nghuot lah? Nghuot ya ngamoq gohtoeu lhyi langh shih das lah, ge.

²⁰Nyah aiq yuk eq nyah jyank mas jweh lyis, Nvng gas hau jweh los das soeu nghuot lah? Nghuot ya ngamoq gohyuk lyis langh shih das lah, ge jeisnyhop dyei soeu Yohan ngah aiq yuk lyis nah jyank mas nyei nhang kat, ge.

²¹Hauh shishenh lyis nyang, nyang gas nos bang, yomh, yius kuq bang nyoshoq lyis gis los nhang; nyoqjet bang nyoshoq lyis eq nyvng los nhang.

²²Yesu nyamoq lyis phuk taiq zis gas, Namoq nyvng las xauhgyo zis Yohan lyis loh taiq kyoh geh: nyoqjet bang nyoq nyvng los, khyei gyau bang yoh suh loh, mvnggvng dap bang thyauh lhyang loh, nojet bang no gyo los, shei goeus bang eq doms dwis los nhang zis xauh las, nyungs bang lyis gausyis dang taiq kyoh nyeis.

²³Ngos mas ehnyet dyet zis ma bos soeu hank laus eq ngelhoq, ge.

²⁴Yohan dah loeuswons bang aiq yuk loh khoq thang lhyi, Yesu gas Yohan cho dius phung lhyi taiq zis gas, Namoq mhanhdyvp pheh cha loh yoeuh goh? Lyeis muot kamh dah jvmbu lyis lhyeh?

²⁵Housoeh lyis cha loh thuq yoeuh goh? Lungphauq dyi wuot soeu lhyi lah? Yoeuh aq, nhamp dah dyimis wuot las zogis shuklhoq zo bang gas hwankti yhen mha nyeis.

²⁶Housoeh lyis cha loh thuq yoeuh goh? Lvpe lhyi lah? Nghuot goeus, ngos namoq lyis taiq bah, lvpe thoq lyis zes kuh soeu nghuot.

²⁷Yoeuh aq, nah cho sont das zis ngos ngah loeuskyoh soeu lhyi nah xik pheh nhang kat, ge lhaih toh zis gas nyah cho nghuot.

²⁸Ngos namoq lyis taiq bah, vmesbih masyah khoeu bang mas jeisnyhop dyei soeu Yohan thoq lyis kuh soeu hank ma bos. Nghuot laus eq Mangso munghdan mas ngis thank soeu ka nyah thoq lyis zes kuh, ge.

²⁹Khoengh khywi bang yahge dius jens dvnganhmoq gas, Yohan dah dang xauhgyo lyis, nyah jeisnyhop lyis tsain kham zis yah, Mangso ka dan, ge nyamoq rhen.

³⁰Pharishe jens yahge Lyi svra jens gas, Yohan dah jeisnyhop lyis ma kham yoeus, Mangso toeuq toh cho lhyi peq tyamp.

³¹Housoeh las Yhensain taiq zis gas, Haq caiq mas bang, nyamoq cha yah doeusgoh zis lyis ngos cha yah byi das lah?

³²Nyamoq gas kaih jang mas tsung lha, dvyuk yah dvyuk lui goh las, Ngamoq gas namoq lyis khvlhank muot dyei lyis eq namoq ma goh, Ngamoq kukxi lyis eq namoq ma ngaus, ge dah loshang jens yah doeusgoh.

³³Khasoeh ge lyis jeisnyhop dyei soeu Yohan gas, ohlhyoq eq ma zo, zvbiq eq ma shuk jweh los lyis namoq gas, Nyang mas yius bos, tsain ge.

³⁴Yoeuh aq, Cangsoeu Lo gas zo shuk uhjyangh lyih lyis, Womlvm soeu, zvbiq yet soeu, khoengh khywi bang yahge yaunos wons bang dah dyenschangh, tsain ge.

³⁵Nghuot laus eq Mangso dah joeui ka jyoeng yvlyis hau joeui dah lo jens yah tuonh shet nyeis.

³⁶Pharishe dvyuk gas nyang yah dvgeh wom zo das zis nyang lyis khi; nyang eq Pharishe dah yhen khau mha wvng las womjus mas tsung toh.

³⁷Yoeuh aq, hauh wugungs mas yaunos wons dah vmesbih dvyuk gas Yesu Pharishe yhen mha wom zo das zis tsung toh zis lyis seq lyis, xangh coeu luk jywanglo dvkoeuq chi lyih las,

³⁸Nyah khyeiyang nungstsaink mas ngaus yap uhlyis yah Yesu khyei mha nyoqdyeis yah jyweq los las, nyah uhloms mas cam yah buot las nyah khyei lhyi bvlot tanh zis yah coeu juot dyei.

³⁹Nyang lyis khi dah Pharishe hauh yvlyis nyvng lyis, nyah ehnyet mas, Haih soeu lvpe nghuot lyis gas, nyang lyis tanh dah haih vmesbih gas hank nghuot zis eq, yaunos wons dah soeu nghuot zis lyis eq nyang seq wondoeus, ge.

⁴⁰Yesu nyang lyis phuk taiq zis gas, Simon eh, ngos nvng lyis taiq das zis dvja bos, ge. Nyang gas, Svra eh, taiq aq, ge.

⁴¹Yesu gas, jyeih dyei soeu dvyuk mas jyen dap soeu aiq yuk bos: dvyuk mas ngwis kyvp oengxo, gohtoeu dvyuk mas oengci nghuot.

⁴²Nyah aiq yuk gas jyen cap das zis ma yoh yvmvyah nyah aiq yuk lyis khyuot tyamp dyei goeus. Housoeh lyis hau aiq yuk mas nyang lyis khayuk zes jyetdap das lah, ge.

⁴³Simon phuk taiq zis gas, Zes nyoshoq khyuot tyamp dyei zis xauh soeu nghuot das oen ngos nghamh, ge. Nyang taiq zis gas, Nvng jus khyvlyis soetuon goeus, ge.

⁴⁴Housoeh nyang gas vmesbih jyank pheh xoeu lha Simon lyis taiq zis gas, Haih vmesbih lyis nvng nyvng ma nghuot lhyeh? Ngos nah yhen mha wvng los lyis nvng ngos lyis khyei cheih jeis ma dyei: nghuot laus eq nyang gas nyah nyoqdyeis yah ngah khyei mha taiqh dyei las, nyah cam yah buot dyei.

⁴⁵Nvng ngos lyis bvlot ma tanh, nghuot laus eq haih vmesbih gas ngos wvng los masyah ma lyen lo ngah khyei mha bvlot tanh nyeis.

⁴⁶Nvng ngah uhloms lyis coeu eq ma juot dyei, nghuot laus eq haih vmesbih gas ngah khyei lhyi xangh coeu juot dyei.

⁴⁷Housoeh yvmvyah ngos nvng lyis taiq bah, nyah yaunos nyoshoq lyis khyuot dyei zis xauh goeus yvmvyah nyang zes las jyetdap nyeis. Dvmhauh khyuot dyei zis xauh soeu ka nainlo dvjyetdap, ge.

⁴⁸Hauh vmesbih lyis eq, Nah yaunos khyuot tyamp dyei goeus, ge nyang lyis taiq.

⁴⁹Nyang yah dvgeh womjus mas tsung toh bang, nyamoq ehnyet mas taiq zis gas, Yaunos yangh yoh khyuot dyei soeu haih zis gas hank nghuot lah, ge.

⁵⁰Nyang hau vmesbih lyis taiq zis gas, Nah lomsjingh zis gas nvng lyis khyuot yoeus goeus, nyenstap zis yah loh lo aq, ge.