Read Achang LUKA 8 Bible Online

LUKA 8 - Achang bible

LUKA 8

¹Hauh thang lhyi khanyhank ma nyangh lyis nyang gas Mangso munghdan gausyis dang lyis taiq hoeuh uhjyangh wus yahge wukhau khanghmuh jweh loh. Changlo dvci aiq yuk moq eq nyang yah dvgeh nghuot.

²Yius kuq zis yahge noslom nyoshoq masyah gis los nhang zis xauh dah vmesbih jens dvyhamh, yius nyhet doeu thuq loh goeus dah Magdala ge soeu Mari;

³Herod dah ziszom Khuza dah yhensain nyhiq Yoana yahge Susana, gohtoeu nyoshoq moq eq nyamoq yoh zisyos yah nyang lyis phuqsoe uhjyangh nyang yah dvgeh tsain chank yenh.

⁴Wugungs khanghmuh masyah dah dius phung nyah jyank mas huom los lyis, nyang dangtoeuq yah taiq zis gas,

⁵Jyo khyoq soeu ka nyah jyo nyau sanh das xiklyis thuq loh. Nyang sanh kat lyis dvkhamh gas chokhyoh mas gyoh las svbih yah nang nheh zis yahge mau dang nghoq jens yah lyih kui zo tyamp.

⁶Dvyhamh gas lukjvp yos mas gyoh loh. Hauh zis gas yuk los laus eq nyeissoq ma nam yvmvyah nyhauh loh.

⁷Dvyhamh gas zoeu gyomh mas gyoh loh, hauh zis gas zoeu zains yah dvgeh yuk kuh los las hauh yvlyis huop tyamp.

⁸Gohtoeu ka nyeisjvng gis yvmas gyoh las, yuk kuh los lyis vshih eq dvxo huon je los. Nyang haih zis dye taiq lyis, Gyo yoeus das no dap soeu ka xauhgyo bas jungh, ge.

⁹Nyah changlo jens nyang lyis nyei zis gas, Haih dangtoeuq gas cha ge mes lah, ge.

¹⁰Nyang taiq zis gas, Maukhung munghdan dah nghop toh cho ka namoq lyis seq nhang goeus. Nghuot laus eq gohyhamh bang lyis gas ngos dangtoeuq yah dvtaiq. Housoeh nyamoq yoeuh laus eq ma nyvng, gyo laus eq ma seqgyo, ge.

¹¹Gvshih haih dangtoeuq gas heisoeh nghuot: jyo nyau gas Mangso dah Dang nghuot.

¹²Cho mha gyoh zis gas, hauh zis lyis xauhgyo lyis nyamoq lomsjingh las khyuot yoeus zis ma xauh das xiklyis, yius los las nyamoq nhaiqlom mas dah dang lyis yoeus tyamp zis xauh bang nghuot.

¹³Luk thoq mas gyoh zis gas, nyamoq hau dang xauhgyo lyis gausyis zis yah dang lyis lhom yoeus laus eq vnyet ma chent yvmvyah, dvyoq kyingh lomsjingh las shiwu zis xauh lyis nungsdoms loh bang nghuot.

¹⁴Zoeu gyomh mas gyoh zis gas, xauhgyo thang lhyi chiq cho, dis los cho yahge pyo cho yah huop las mos dah vshih ma shih bang nghuot.

¹⁵Nghuot laus eq nyeisjvng gis yvmas gyoh zis gas, gis dah ehnyet yah dang lyis gyo yoeus lho lha wontang zwi zains toh las jhen zis yah vshih shih bang nghuot.

¹⁶Nyibung lyis tuonh las dang yah nghop toh zis hank ma bos, jungjeis mas eq hank ma kat toh: wvng los bang bvng zis nyvng das xiklyis nyibung gus mas dvgyangh tuonh toh.

¹⁷Khasoeh ge lyis, ma chixoeuq shoq gauh shung toh zis cha eq ma bos; ma seq ma nyvng shoq nghop toh zis cha eq ma bos.

¹⁸Housoeh yvmvyah namoq khasoeh xauhgyo zis lyis zaih nyeis geh. Khasoeh ge lyis, yoh bang lyis lung dyei das; ma yoh bang jyank masyah gas nyamoq yoh joq teh zis yangh yoeus tyamp dyei das.

¹⁹Hauh uhlyis nyah ungwes yahge nyah vwik jens gas nyah jyank mas jweh lyih las dius puk thoeu yvmvyah nyah jyank mas ma tsain yoh wvng loh.

²⁰Housoeh nyang lyis taiq los zis gas, Nah ungwes yahge nah vwik jens nvng yah xauhgoh mes las nghe mha los tsain yap joq, ge.

²¹Nyang nyamoq lyis phuk taiq zis gas, Mangso dang lyis xauhgyo las, hauh yvlyis chank kuot bang gas ngah ungwes yahge ngah vwik jens nghuot, ge.

²²Dvnyeih gas nyang nyah changlo jens yah dvgeh lhyik khau mha wvng tsung lha nyamoq lyis taiq, Yang thomh thyitvp pheh goeu e goh, ge nyamoq goeu loh.

²³Housoeh nyamoq goeu loh nyeis lyis Yesu gas yhet joq. Houmha lyeismuh jyang muot yvmvyah chont mas jeis dyingh los las, nyamoq gudwvng bah ge.

²⁴Housoeh las nyamoq gas nyang lyis loh nhauh uhlyis yah taiq zis gas, Svra eh, svra eh, ngamoq shei bah ge loh nyeis, ge. Housoeh nyang toq las lyeis yahge jeisphauq lyis nyho lho lhyi, hauh zis gas tam loh las sam joq.

²⁵Nyang nyamoq lyis taiq zis gas, Namoq dah lomsjingh zis gas khalhye gah, ge. Hauh uhlyis nyamoq gyuk mauh las, Haih soeu ka hank nghuot lah? Lyeis yahge jeisphauq lyis taiq kat lyis, nyah domsyos tsain gyo, ge nyang changh nyang tsain taiq goh.

²⁶Nyamoq gas Galile thyitvp Gerasa[3] ge dah mau mas jweh loh.

²⁷Nyang tungyos pheh thuq suh loh lyis houmha hauh wus mas dah yius kuq dah yukgis dvyuk yah xauhgoh. Hauh soeu ka shishenh nyangh nyangh dyimis ma wuot, yhen mha eq ma nyeis, lopkhyam mha kyingh dvnyeis.

²⁸Nyang Yesu lyis nyvng yah dvyih kaiq zis yah xikkhonh mas gop las, Nyhang thank Mangso dah Lo Yesu eh, Nvng ngos yah cha sen lah? Nvng ngos lyis ma shoeuhshih das xiklyis ngos dung, ge thwe zainsmuh yah taiq.

²⁹Khasoeh ge lyis Yesu gas hauh yius lyis hauh dius yuk jyank masyah thuq loh das xiklyis vmingh dyei yvmvyah nghuot. Vlhain lhain nyang lyis kuq las shamjvng yah twih las kyomh kyomh toh lyis eq, lang phaiq thyet las yius gas nyang lyis mhanhdyvp pheh shwih loh loh mus.

³⁰Yesu nyang lyis nyei zis gas, Nah nyings cha nghuot, ge. Nyang gas, Nyoshoq nghuot: Khasoeh ge lyis nyah vkhau mha yius nyoshoq lungh joq.

³¹Nyamoq lyis noq thank dwang chuk buiq mas ma khat tyamp das xiklyis nyang lyis dung.

³²Hauh jingkank mas wuq dvjens bot zo nyeis: nyamoq gas hauh wuq jens mas wvng nhang aq, ge nyang lyis vmingh sang nyeis las nyang gyo dyei.

³³Hauh uhlyis yius jens gas dius jyank masyah thuq las wuq jens mas tsain wvng loh. Wuq jens gas gammhung mhayah tyauq gyoh las thomh mas ciang shei.

³⁴Wuq yoeuh bang hauh zis nyvng yvmvyah cangh loh las, wugungs yahge wukhau mha loh tsain taiq kyoh.

³⁵Nyamoq eq bweh goeus cho lhyi yoeuh das xiklyis thuq loh las Yesu jyank mas jweh lyis, vkhang yius thuq loh goeus dah dius gas yos yos lyis dah ehnyet teh, dyimis wuot las Yesu dah khyeiyang mas tsung toh zis lyis nyamoq nyvng las gyuk.

³⁶Hauh zis lyis nyvng bang gas, vkhang yius kuq soeu lhyi khasoeh kuot las gis los nhang zis nyamoq lyis taiq kyoh.

³⁷Hauh uhlyis Gerasa mau vyvm vwi mas dah somhloh moqjens dvnganhmoq gas, nyang lyis nyamoq jyank masyah thuq loh das xiklyis tsain dung: Khasoeh ge lyis nyamoq svsoh gyuk. Nyang gas chont khau mha wvng tsung lha tauh loh.

³⁸Nghuot laus eq yius cangh thuq loh goeus soeu ka, nyang yah dvgeh nyeis das xiklyis nyang lyis khyoeuq nyeis. Nghuot laus eq Yesu gas nyang lyis nhang kat uhlyis yah taiq zis gas,

³⁹Nah yhen mha tauh loh las, Mangso nvng lyis kha iq kuot dyei goeus zis loh taiq hoeuh aq, ge. Nyang eq loh las Yesu nyah xiklyis kha iq kuhxing zis kuot dyei goeus zis lyis dvwus gonh, joqyos khanghmuh mas taiq hoeuh loh.

⁴⁰Housoeh Yesu tauh loh lyis, dius jens gas nyang lyis gauslaus zis yah lhom yoeus: Khasoeh ge lyis nyamoq dvnganhmoq gas nyang lyis tsain langh nyeis.

⁴¹Yoeuh aq, Yairu ge, lyi jungs uhjyung dvyuk los las, Yesu dah khyeiyang mas gyuis las, nyah yhen mha los das xiklyis khyoeuq nyeis.

⁴²Khasoeh ge lyis, dvci aiq zvn ko dah nyah lonyi loteh gas shei loh nyeis. Nyang e loh nyeis lyis moqjens yah nyang lyis duon nyhenh los.

⁴³Dvci aiq zvn suih shuon lha nos dah vmesbih dvyuk gas, nyang yoh goeu dvnganh mvcheih lastsiang jens jyank mas yhung mhont tyamp lyis eq, hank eq nyang lyis ma thyeh yhoh gis dyei.

⁴⁴Nyah nungsthank dyithang mha tanh lho lhyi, nyang suih shuon zis houjang doms tyamp.

⁴⁵Yesu gas, Ngos lyis hank tanh, ge nyei. Dvnganhmoq yah he uhlyis, Petru yahge nyang yah dvgeh nghuot bang taiq zis gas, Svra eh, moqjens nvng lyis tsain duon nyhenh los lyis, Ngos lyis hank tanh lah, ge.

⁴⁶Yesu gas, Dvyuk ngos lyis tanh goeus, khasoeh ge lyis ngah gungs masyah yomsoq thuq loh zis ngos seq, ge.

⁴⁷Hauh vmesbih gas ma yoh zauh toh zis lyis seq goeus ya, tyik tyik nvn zis yah nyah xikkhonh mas gyuis gyoh las, nyang lyis chamus tanh zis yahge houjang nyang khasoeh gis los zis lyis taiq thuq.

⁴⁸Yesu nyang lyis taiq zis gas, Lonyi eh, nhaiq dainh lo aq, nah lomsjingh zis gas nvng lyis gis los nhang goeus; nyenstap zis yah loh lo aq, ge.

⁴⁹Nyang housoeh taiq nyeis lyis, lyi jungs uhjyung dah yhen mha bang dvyuk los las, Nah lonyi shei goeus; Svra lyis vthauqkhyi nyeis lo, ge.

⁵⁰Hauh dang Yesu xauhgyo lyis phuk taiq zis gas, Vchiq, lomsjingh ehnyet dvbos aq, housoeh lyis nah lonyi gis los das, ge.

⁵¹Housoeh nyang yhen khau mha jweh loh lyis, Petru, Yaku yahge Yohan, nyelo dah ungwes uwus masyah lai las gohyuk hank lyis eq ma wvng nhang.

⁵²Dvnganhmoq yah ngaus las hauh nyelo xiklyis shei uh tsain ngauh nyeis laus eq nyang taiq zis gas, Vngaus goh, nyang ma shei, dvyhet joq, ge.

⁵³Hauh nyelo shei goeus zis lyis tsain seq yvmvyah, nyamoq gas nyang lyis jwangh yis.

⁵⁴Nghuot laus eq nyang, nyah loq lyis zwi las, Nyelo eh, toq aq, ge lui lho lhyi,

⁵⁵nyah dyos doms los las, nyang houjang toq los. Yesu gas, nyang lyis zonoms dyei das zis nyamoq lyis taiq toh.

⁵⁶Nyah ungwes uwus gas mauh: laus eq bweh goeus cho hank lyis eq ma taiq kyoh das xiklyis, nyang nyamoq lyis khyangh com.