Read Achang LYI 10 Bible Online

LYI 10 - Achang bible

LYI 10

¹Hauh thang lhyi YHENSAIN ngos lyis taiq, Xik lyis dah luk lhywaq teh zis aiq koeuq bat aq, hauh zis kat das saiq kwi eq dvkoeuq kuot aq. Boms thoq ngah jyank mas doq los aq.

²Ngos hauh luk lhywaq mas xik lyis nvng doeuh khwih yvmas lhaih toh vgus doms lhaih dyei bah. Nvng hauh yvlyis kwi mha kat toh chah, ge.

³Housoeh las ngos akhesha saiq yah kwi kuot toh. Xik lyis dah luk teh zis aiq lhywaq bat chi lha boms mas doq loh.

⁴Hauh thang lhyi YHENSAIN ka xik lyis vlhain lhaih, hau dvyhangteh dang lyis hauh luk lhywaq mas lhaih. Houka namoq hau boms mas huom nyeih lyis nyang nyi masyah taiq las namoq lyis dyei dah lyi dvci nghuot. YHENSAIN hauh luk lhywaq ngos lyis dyei.

⁵Ngos eq boms masyah tauh gyoh los. Hauh thang lhyi YHENSAIN ngos lyis tying toh vgus hauh ngos kuot toh dah kwi mha hau luk lhywaq lyis tsain kat toh. Houka houmha bos joq.

⁶Housoeh Israel jens gas, Yakan dius jens yah sen dah jeisdwang jens masyah thuq las Mosera pheh loh. Houmha Aron shei lha nyhop. Nyah lo Eleaza gas, nyah joqyos mas phudyei soeu bweh los.

⁷Nyamoq hou mhayah Gudgoda pheh loh; hou mhayah jeislo lvng nyoshoq bos dah Yotbatha pheh loh.

⁸Hauh uhlyis YHENSAIN ka, Lewi vkoq mas bang lyis nyah Thanghchvp Kwi yvwons yoeus das, phudyei bang khyvlyis phuqsoe das, nyah nyings mas shvmanh das zis toeuq toh. Hauh zis gas nyamoq dah yvwons nghuot shih.[5]

⁹Housoeh yvmvyah Lewi vkoq gas gohtoeu vkoq jens xauh yoeus teh maunyeis ma xauh yoeus. YHENSAIN, nah Mangso dangthoengh toh vgus, nyamoq gas YHENSAIN dah phudyei bang kuot das toeuh xauh yoeus.

¹⁰Ngos eq xik lyis kuot teh hauh boms mas nyeici nyeih nyeici nyens nyeis: YHENSAIN ka ngah dang dvlhain doms gyo dyei las nvng lyis ma mhont.

¹¹Hauh thang lhyi nyang ngos lyis namoq lyis shwih das xiklyis taiq. Housoeh lyis nyang namoq dah phauh thyeih moq lyis dyei das ge dangthoengh toh dah mau lyis yoh sain das, ge.

¹²Gvshih, Israel jens eh, YHENSAIN, namoq dah Mangso cha sang zis gyo yoeus geh. YHENSAIN lhyi paiq las nyang tying toh zis dvnganh kuot geh. Nah nhaiqlom dvnganh yah nyang lyis jyet geh, phuqsoe geh.

¹³Namoq dah vkyuh xiklyis khvnyhik ngos namoq lyis dyei nyeis dah lyi dvnganh chank aq.

¹⁴Nyhang thank maukhung yangh YHENSAIN yah sen; nyeisjvng yahge houmha zis dvnganh eq nyah zis nghuot.

¹⁵Nghuot laus eq YHENSAIN ka namoq dah phauh thyeih moq lyis svsoh jyetdap las gohtoeu dius jens gungsthaiq namoq lyis khyen yoeus. Housoeh namoq gas nyang khyen yoeus dah dius jens nghuot joq.

¹⁶Housoeh las gvshih masyah YHENSAIN lhyi domsyos gyo geh. Nhaiqlom lyis vthyoh tyomh geh, nhaiqlom vthan lo.

¹⁷YHENSAIN, namoq dah Mangso ka mangso jens dvnganh thoq lyis zes, yomsoq dvnganh thoq lyis zes. Nyang gas kuhxing lha Yomzains bos las domsyos gyo gis soeu nghuot. Nyang gas nyoqnho ma khyen, khauwhot ma zo.

¹⁸Nyang gas chauhmuh chauhlo jens lyis pangh, yah dius jens yah nyeis dah lvbaus lyis eq jyet zis yah zonoms yahge dyimis dyei.

¹⁹Housoeh yvmvyah namoq lvbaus lyis jyetdap cho chixoeuq geh: khasoeh ge lyis namoq eq Egutu mas lvbaus nghuot ku.

²⁰Nvng YHENSAIN, nah Mangso lhyi gyukwoms aq. Nyang lyis kyingh paiq aq, Nyang lyis lomluk zis yah nvng dangthoengh toh lyis nyah nyings kyingh yoeus aq.

²¹Nyang gas nah Mangso nghuot las nyang lyis chungh aq. Nyang gas nah xiklyis kuhxing lha mauh loqmuh kuot dyei yvlyis nah nyoqjeih yah nyvng goeus.

²²Nah Phauh thyeih moq Egutu mas e uhlyis dius nyhetci yuk dvnghuot. Nghuot laus eq gvshih gas YHENSAIN, nah Mangso nvng lyis maukhung mha kyi nyhoq je los nhang goeus.