Read Achang LYI 11 Bible Online

LYI 11 - Achang bible

LYI 11

¹YHENSAIN, nah Mangso lhyi jyet zis yah vjangh nyah lyi chank aq.

²Nyang yah dvgeh namoq thungh phuh las xuq los cho lhyi khvnyhik soh geh. Houka namoq dah loshang jens ma nghuot. Namoq haih thungh phuh cho bos bang dvnghuot. Namoq gas YHENSAIN dah kuhxing cho, nyah yomsoq, nyah yomzains yahge

³nyah yomsoq muh lyis nyvng goeus. Nyang Egutu hwankti yahge nyah dvmau gonh kuot cho lhyi namoq nyvng goeus.

⁴Egutu jesphung namoq lyis chank khat los uhlyis YHENSAIN ka Egutu jesphung yah dvgeh nyamoq dah nyang, nyang lhyingh lyis Thomh Nes mas nyhop tyamp zis yah nyamoq dvnganh lyis khasoeh tomh tyamp yvlyis namoq nyvng goeus.

⁵Heimha ma jweh los shih lyis mhanhdyvp mas YHENSAIN namoq xiklyis kuot dyei cho namoq seq.

⁶Ruben vkoq mas dah Eliab lotang Dathan yahge Abiram lyis cha kuot cho doms soh aq: Houka yuk khanghmuh dah nyoqlvtjvng mas nyeisjvng nhuot haq los las nyamoq yahge nyamoq yhenbang, zvng, nyamoq dah jyeidwis jens, gaunyhauq dvnganh lyis nyhau tyamp.

⁷Namoq gas YHENSAIN kuot dah kuhxing muh lyis nyvng bang tsain nghuot.

⁸Khvnyhik ngos namoq lyis dyei dah lyi dvnganh lyis chank geh. Housoeh lyis namoq wvng bah ge dah mau mas jeislvng goeu las loh yoh nyeis das.

⁹Housoeh lyis YHENSAIN namoq dah phauh thyeih moq yahge nyamoq dah vshih jens lyis dyei das ge dangthoengh toh, hau nyeis coeu bos las gis dah mau mas nyangh shoq xauh nyeis das.

¹⁰Namoq loh nyeis bah ge mau gas, namoq xikpheh nyeis khoq Egutu mau yah ma doeusgoh. Namoq houmha jyo khyoq lyis jeis khyoh yomkat kuot chah.

¹¹Namoq wvng loh bah ge mau gas, langhkhau jingkank yah dyingh las mau jeis yoh dah mau dvnghuot.

¹²YHENSAIN, namoq dah Mangso hauh mau lyis loqzamh zwi las zvn gonh hauh yvlyis zungh yoeuh nyeis.

¹³Housoeh las khvnyhik ngos namoq lyis dyei dah tyingtoh dang lyis chank geh. YHENSAIN, namoq dah Mangso lhyi jyet zis yah, namoq dah nhaiqlom dvnganh yah nyang lyis phuqsoe geh.

¹⁴Nvng housoeh kuot lyis nyang nah maunyeis mas cungh thuq zoh yahge zvn wvng zoh chah nyeis uhlyis mau wus khyoq dyei das. Housoeh houmha nah xiklyis jyo, zvbiq yahge tsanlun coeu yoh das.

¹⁵Namoq gaunyhauq xiklyis mhanh, namoq o dah zonoms dvnganh yoh das.

¹⁶Nvng nvnyang gungs lyis mhuih zis yah YHENSAIN mhayah ma whang loh, gohtoeu mangso lyis ma paiq phuqsoe loh das zis zaih nyeis aq.

¹⁷Nvng housoeh kuot lyis, YHENSAIN namoq lyis nhaiqyo das las nah maunyeis gas kyuk las jyo ma yoh yuk shoq mau lyis zwi toh das. Nyang namoq lyis gis dah mau dyei toh laus eq, namoq houmha lvnyap shei loh das.

¹⁸Hai tyingtoh dang lyis namoq nhaiqlom yahge dyos mas soh nyeis geh. Soh das nyhenshang hauh zis nah loqyom mas twih, ngelang mas tap toh geh.

¹⁹Hauh zis namoq dah lo jens lyis jyauh geh. Namoq yhen mha nyeis uhlyis, nghe pheh thuq loh uhlyis, no nyeis uhlyis, muh zwi nyeis uhlyis hauh cho taiq geh.

²⁰Nvng hauh zis nah yhen khomh bungs mas, khyam khomh mas lhaih toh aq.

²¹Housoeh lyis YHENSAIN, namoq dah Mangso namoq dah phauh thyeih moq lyis dyei das ge dangthoengh toh dah mau mas nvng yahge namoq dah lo jens nyangh shoq xauh nyeis das. Namoq houmha nyeisjvng vtoeu mha maukhung joq dvchank xauh nyeis das.

²²Ngos namoq lyis dyei dah lyi dvnganh lyis lomluk luk chank geh. YHENSAIN namoq Mangso lhyi jyet zis yah nyang tying toh zis dvnganh kuot geh. Nyang lyis lomluk geh.

²³Housoeh lyis namoq jweh zis yah dvyhangteh nyang hauh dius nyau lyis khat tyamp das. Namoq gas namoq thoq lyis kuhxing lha yomsoq zes bos dah vnyau yah sen dah mau mas nyeis das.

²⁴Namoq suh lai los dah maunyeis dvnganh namoq zis nghuot das. Namoq dah maunyeis gas mautyi pheh mhanhdyvp masyah mautsung pheh Lebanon boms jweh shoq, Buisthuq pheh Uphrat lvng masyah buiswvng pheh Mediteranean Thomh jweh shoq dvm.

²⁵Namoq loh ya loh dah mau mas YHENSAIN namoq Mangso ka houmha bang lyis nyah dangthoengh toh vgus nyamoq lyis gyuk nhang das. Housoeh hank eq namoq lyis ma yoh tomp toh.

²⁶Khvnyhik ngos namoq lyis shvmanh zis yahge nhoengh zis khyen yoeus nhang.

²⁷Khvnyhik ngos namoq lyis dyei toh, YHENSAIN namoq Mangso dah tyingtoh dang domsyos gyo lyis gas shvmanh zis xauh das.

²⁸Nghuot laus eq namoq haih tyingtoh dang ma chank, namoq xikpheh ma paiq ku dah gohtoeu mangso jens shot pheh phanh las paiq loh lyis gas nhoengh xauh das.

²⁹Namoq loh nyeis das mau mas YHENSAIN shwih wvng uhlyis, nvng hau shvmanh lyis Gerizim boms masyah taiq hoeuh las, nhoengh zis lyis Ebal boms masyah hoeuh chah.

³⁰Hauh boms aiq koeuq gas Yodan lvng buiswvng tvp, Yodan Langhkhau mha nyeis, Khanan jens dah maunyeis mas joq. Houka buiswvng pheh Giga wus nvm More mas dah gyingshang saiqzains masyah ma we yvmas joq.

³¹Namoq gas YHENSAIN, namoq dah Mangso dyei dah mau mas loh nyeis das zis Yodan lvng goeu bah ge goeus. Namoq hauh zis yoeus las houmha nyeis lyis,

³²khvnyhik ngos namoq lyis dyei dah lyi dvnganh jyoengh chank geh.