Read Achang LYI 13 Bible Online

LYI 13 - Achang bible

LYI 13

¹Namoq mas lvpe, yhetmoq moq, yhetmoq pho soeu thuq los las nvng lyis yomsoq muh yahge mauh loqmuh dyei zis yah,

²namoq xikpheh ma paiq ku dah mangso lhyi loh shwih paiq phuqsoe das zis nyamoq dah yhetmoq ying los laus eq,

³nyamoq dah dang vgyo goh. YHENSAIN, namoq dah Mangso ka nyamoq lyis yhung lha namoq YHENSAIN lhyi namoq ehnyet nhaiqlom dvnganh yah vjyetdap lah, ge kyink zis nghuot.

⁴YHENSAIN thang chank las nyang lyis nyoqnho ngelang dyei geh. Nyah domsyos gyo las nyah tyingtoh dang lyis chank kuot chah. Nyang lyis paiq zis yah nyang lyis lomluk geh.

⁵Namoq jons duot nyeis Egutu masyah namoq lyis khyuot kat YHENSAIN lhyi tyi khyvlyis gomloeus toq das cho taiq dah yhetmoq pho bang, lvpe pe bang lyis gas sat chah. Housoeh teh bang gas ma gis. Nyamoq gas namoq lyis YHENSAIN tying toh dah kang dwis cho mhayah she loh mes bang nghuot. Hau ma gis cho shang tyamp das xiklyis nyamoq lyis sat chah.

⁶Nah boekyis, nah loloeu lonyi, nvng jyet dah nah yhensain nyhiq, nah hwank changh yangh nvng lyis gauh chuq yomdyei las nvng eq, nah phauh thyeih moq eq ma paiq dah gohtoeu mangso lhyi loh paiq goh, ge das.

⁷Dvyhamh gas namoq vnvm mas nyeis bang dah mangso, we mas nyeis bang dah mangso lhyi paiq goh ge yomdyei das.

⁸Nghuot laus eq nvng lyis hank yah eq vmhuih nhang, gyo yangh vgyo dyei. Nyamoq lyis nhaiqnyen cho vchixoeuq, khyamhsa vdyei.

⁹Nyamoq lyis sat geh. Nvng shih luk yah doeuh chah. Hauh thang lhyi yuk khanghmuh nyamoq lyis doeuh chah.

¹⁰Namoq jons duot nyeis Egutu masyah khyuot kat, YHENSAIN namoq Mangso jyank masyah she loh das ge yomkat bang lyis luk yah doeuh sat geh.

¹¹Housoeh lyis cha bweh zis Israel jens dvnganh xauhgyo das. Housoeh nyamoq gyuk das las hank khanhamp eq houteh ma gis zis ma doms kuot lo das.

¹²YHENSAIN namoq Mangso namoq lyis dyei dah wus mas tsain nyeis lyis, xauhgyo mvbeh,

¹³houka namoq dius nyau mas phauh ma dap bang dvyhamh nyamoq dah wus mas bang lyis namoq xik pheh khanhamp eq ma paiq ku dah mangso lhyi paiq goh ge shwih whang loh.

¹⁴Houteh loeus lamh xauhgyo lyis, nvng hauh cho vlhomuh choq yoeuh las hau ma gis cho namoq mas bweh goeus zis jyoeng nghuot lyis gas,

¹⁵hauh wus mas bang dvnganh lyis sat chah. Nyamoq dah gaunyhauq lyis eq sat chah. Hauh wus lyis shank shoq mhont chah.

¹⁶Nvng houmha nyeis bang sain dah zisyos dvnganh lyis wus vgungs talhoeu mha los boms chah. Hauh thang lhyi wus eq cheq YHENSAIN, nah Mangso lhyi ngheq dyei jyungshuk khyvlyis ngheq chah. Houka vcaiq vto dyoq gyoh joq das; khanhamp eq wus ma yoh doms kuot lo.

¹⁷Mhont das xiklyis nhoengh goeus dah vyhang nah xiklyis cha eq vyoeus toh. Housoeh lyis YHENSAIN nhaiqyo gyoh las nvng lyis nhaiqnyen cho chixoeuq das. Nah phauh thyeih moq lyis dangthoengh toh vgus, nvng lyis nhaiqnyen las nyoshoq jebais los nhang das.

¹⁸Khvnyhik ngos namoq lyis dyei, nyang tying toh zis dvnganh chank chah. Nyang jus ge taiq zis kuot aq.