Read Achang LYI 14 Bible Online

LYI 14 - Achang bible

LYI 14

¹Namoq gas YHENSAIN namoq Mangso dah dius jens nghuot. Dvyuk yuk shei lhyi, nvng kuk cho chixoeuq khyvlyis nah gungs lyis gohyhamh bang kuot teh vlhyamh khangh, nghuot ya ngethe mha cam vyuk.

²Nvng gas YHENSAIN, nah Mangso yah sen. Nyang namoq lyis nyeisjvng thoq mas nyeis bang dvnganh masyah nyah dius nyau duot das zis khyen yoeus.

³YHENSAIN ma lhoq ge taiq toh zis cha eq vzo.

⁴Nvng haih gaunyhauq gis zo: noeu shoh, yvng shoh, shvbeq shoh,

⁵cvt shoh, chei shoh, ye yvng, ye beq,

⁶khyeikhu gwi las chungh mhan dah shoh gis zo.

⁷Chungh mhan laus eq khu ma gwi dah gaunyhauq shoh ma gis zo. Gola-u, thanghloq nghuot ya Shvphan ka chungh mhan laus eq khu ma gwi yvmvyah namoq xiklyis ma lhoq, oen nghamh chah.

⁸Wuq gas khu gwi laus eq chungh ma mhan lha namoq xiklyis ma lhoq oen nghamh chah. Namoq hauh gaunyhauq shoh lyis vzo goh, mvng lyis yangh vtanh goh.

⁹Xu yahge vkyvp bos dah oengdoq cha eq gis zo.

¹⁰Jeis mas nyeis zis cha laus eq xu yahge vkyvp ma bos dah shoh cha eq ma gis zo, houka namoq xiklyis ma lhoq oen nghamh chah.

¹¹Namoq lhoqshang dah nghoq shoh cha eq gis zo.

¹²Haih zis gas namoq ma gis zo dah nghoq tsain nghuot: zons, khunghbop, wuq dvng zons, zonsmuh, tingh, langda, kvnhoq, gola-u, zinyo, nghoq kywank, jeis nghoq, lot xing, tinjyih yahge phoqxik tsain nghuot.

¹⁹Dungs dap dah tungde dvnganh gas ma lhoq, hauh shoh vzo goh.

²⁰Lhoqshang dah tungde gas gis zo.

²¹Nyang pheh yah shei dah gaunyhauq shoh cha eq vzo goh, namoq mas nyeis dah lvbaus zo bas jungh. Nghuot ya gohtoeu lvbaus lyis ungh aq. Nghuot laus eq namoq gas YHENSAIN, namoq dah Mangso yah sen, nyah dius jens nghuot. Yvnglo beqlo lyis nyah ungwes nauh yah vjyauq.

²²Dvzvn dvzvn nah yos mas thuq zis dvnganh mas ciboms dvboms lyis top nyang gvm toh chah.

²³Hauh thang lhyi paiq das xiklyis YHENSAIN, nah Mangso khyen toh dah joqyos, nyah xikkhonh mas loh las nah ciboms dvboms jyo, zvbiq, tsanlun coeu yahge nah gaunyhauq suot xeih noeu eq yvng eq zo geh. Haih zis kuot lyis vjangh YHENSAIN, nah Mangso lhyi gyukwoms cho yoh xuq das.

²⁴Hau paiq das joqyos gas nah yhen yah sunk we las, YHENSAIN, nah Mangso nvng lyis shvmanh dyei las thuq los dah ciboms dvboms ma yoh wons loh lyis, heisoeh kuot geh.

²⁵Hauh yvlyis ungh aq, hauh ngwis chi lha hau paiq das joqyos mas loh geh.

²⁶Houmha nvng o zis noeu shoh, yvng, zvbiq, yhei wis las YHENSAIN, nah Mangso xikkhonh mas nvng nah yhenbang yah dvgeh zo shuk las gausyis cho kuot chah.

²⁷Nah wus mha nyeis dah Lewi lyis vtyamp toh goh. Nyamoq gas vso zisyos ma yoh.

²⁸Somh zvn khanghmuh dah zvn thang mha nah jyo dah ciboms dvboms yoeus los las wus mas yung toh chah.

²⁹Haih zonoms gas nah wus mas nyeis las vso zisyos ma yoh dah Lewi jens, lvbaus chauhmuh chauhlo jens xiklyis nghuot. Nyamoq gas nyamoq chah nyhoq los xauh yoeus das. Housoeh kuot lyis nvng kuot cho khanghmuh mas YHENSAIN, nah Mangso shvmanh dyei das.