Read Achang LYI 17 Bible Online

LYI 17 - Achang bible

LYI 17

¹YHENSAIN, nah Mangso lhyi nos dvja ja bos dah noeu, yvng vphudyei: YHENSAIN hauh yvlyis hoeng.

²Namoq dah wus dvwus wus mas vbusbih, vmesbih dvyhamh,YHENSAIN lhyi yaunos kuot, nyah thanghchvp thyoq zis xauhgyo oen goh,

³houka YHENSAIN tyingtoh dang yah tyi lha gohtoeu mangso, buislom, lhamhmuh, kyi jens lyis paiq phuqsoe loh, ge.

⁴Nvng housoeh taiq los zis xauhgyo lyis, jyuk yang nyei gyo aq. Israel mas ma gis zis bweh los cho jyoeng lhyi ka,

⁵yamoq lyis wus nghe pheh shwih thuq las luk yah doeuh sat geh.

⁶Nghuot laus eq nyamoq lyis tyi dah kanghjyoeng aiq yuk thoq pheh bos lyis kyingh dvgis sat. Kanghjyoeng dvyuk kyingh dvnghuot lyis gas ma gis sat.

⁷Nyamoq lyis kanghjyoeng jens shih luk yah doeuh chah. Hauh thang lhyi nyet dah dius jens doeuh chah. Heisoeh khyvlyis hai ma gis zis shang tyamp das.

⁸Wus mas soetuon bang thyet das zis sunk yau das soe dvkhamh bos mvbeh. Houka dius sat soe, dyoqgoh cho, zan-goh soe tsain nghuot. Housoeh teh bweh lyis YHENSAIN, nah Mangso khyen das, paiq joqyos mas loh geh.

⁹Nah soe lhyi Lewi dius phudyei bang yahge hauh yoq lyis yungh mas soetuon soeu lhyi taiq kyoh las hauh soe nyamoq lyis thyet nhang chah.

¹⁰Nyamoq hauh soe thyet dyei das, nvng gas nyamoq taiq kyoh khyvlyis top chank kuot chah.

¹¹Nyamoq thyet cho lhom yoeus aq, nyamoq taiq shet cho dvnganh jeihjyvp chank kuot aq.

¹²Soetuon soeu, nghuot ya yvwons yoeus nyeis dah phudyei soeu dah domsyos ma gyo womh kuot soeu hank lyis laus eq sat chah. Heisoeh khyvlyis Israel mas dah ma gis cho yoeus tyamp das.

¹³Housoeh lyis yuk khanghmuh hauh zis xauhgyo lyis gyuk das las housoeh teh hank ma womh kuot lo das.

¹⁴YHENSAIN namoq Mangso namoq lyis dyei dah mau lyis sain yoeus thang lhyi houmha nyeis loh lyis namoq vyvm vwi mas dah dius nyau jens teh hwankti chah ge nghamh thyet das.

¹⁵Namoq hwankti duot das zis khyen soeu ka YHENSAIN yah khyen dyei soeu nghuot bas jungh. Nyang gas namoq nyang dius nghuot chah. Lvbaus lyis nah hwankti vtoqh.

¹⁶Hwankti ka nyah jesphung xiklyis nyang nyoshoq ma gis yoh. Nyah dius jens lyis nyang wis das xiklyis Egutu pheh ma gis nhang kat. Khasoeh ge lyis YHENSAIN taiq toh, nyah dius jens lyis houpheh khanhamp eq vtauh e goh, ge.

¹⁷Hwankti ka yhensain nyhiq nyoshoq ma gis yoh. Khasoeh ge lyis hauh zis gas nyang lyis YHENSAIN mhayah nungs phuk loh nhang. Ngwis xing sunk nyo shoq ma gis yoh.

¹⁸Nyang hwankti bweh los lyis, Lewi dius phudyei bang shung toh, Mangso dah lyi yahge jyauh cho buk vgyingh masyah sauhtap tap yoeus zis dvbuk chi toh chah.

¹⁹Nyang haih buk lyis nyah nvm mas toh las nyah kang dwis yoq gonh hauh zis nghap das. Housoeh nyang YHENSAIN lhyi phauh nyang xuq das zis yahge houmha tyingtoh zis dvnganh lomluk luk domsyos gyo das.

²⁰Heika nyang gas gohtoeu Israel jens thoq lyis zes gis ge ma nghamh das xiklyis yahge YHENSAIN tyingtoh dang lyis domsyos ma gyo ma kuot das xiklyis gos zis nghuot. Housoeh lyis nyang nyoshoq zvn xauh guon das; nyah vnyau vshih eq Israel jens lyis nyoshoq caiq guon das.