Read Achang LYI 18 Bible Online

LYI 18 - Achang bible

LYI 18

¹Phudyei bang yahge Lewi vkoq gas Israel mas maunyeis gvmboms ma xauh yoeus. Hauh gungsthaiq nyamoq gas jyungshuk yahge YHENSAIN lhyi dyei dah gohtoeu lomhxangh yah kang khoeu das.

²Nyamoq gas gohkoq bang sain teh maunyeis ma xauh sain. Nyamoq dah gvmboms gas YHENSAIN nyamoq lyis dangthoengh toh vgus, YHENSAIN dah phudyei bang kuot das toeuh nghuot.

³Noeu, yvng phudyei khanghmuh phudyei bang lyis loqsan dvkoeuq, shahba aiq shot, oeu sainh dyei chah.

⁴Nyamoq gas cangxeih yhomh dah jyo, zvbiq yahge tsanlun coeu, cangxeih gom dah yvng mauh gvmboms xauh yoeus chah.

⁵YHENSAIN ka nyang lyis phuqsoe das nyhenshang vcaiq vto phudyei bang khyvlyis Lewi vkoq lyis namoq dah vkoq dvnganh masyah khyen yoeus.

⁶Israel dvwus wus masyah Lewi dvyuk yuk gas toeuq toh dah paiq joqyos mas los mes las jweh los lyis,

⁷nyang houmha phuqsoe nyeis bang gohtoeu Lewi jens teh YHENSAIN nyah Mangso lhyi phudyei soeu khyvlyis gis phuqsoe.

⁸Nyang eq gohtoeu phudyei bang yah dvyih zonoms xauh yoeus chah. Nyang lyis nyah yhenbang huon zis cha eq gis yung toh.

⁹Nvng YHENSAIN, nah Mangso namoq lyis dyei dah mau mas jweh loh lyis, houmha nyeis dah dius nyau jens kuot dah vchoqh vlhauq cho vchank kuot.

¹⁰Namoq dah phon thoq nyi mas namoq dah lo jens vphudyei. Namoq dah dius jens lyis pe cho, loq yoeuh cho, botthyet cho,

¹¹mandan muot cho, sidyos lyis nyei gyo cho vkuot nhang.

¹²YHENSAIN, nah Mangso ka heiteh vchoqh vlhauq kuot bang lyis hoeng. Housoeh yvmvyah namoq hauh mau mas wvng zis yah dvyhangteh nyang hauh dius nyau jens lyis khat tyamp.

¹³Nvng gas YHENSAIN, nah Mangso xikkhonh mas yobos ma bos soeu nghuot chah.

¹⁴Hauh thang lhyi Moshe taiq: Namoq wvng nyeis das mau mas dah dius jens gas, pe cho, gyuiswvng bang joeui dyei cho lhyi tsain chank. Nghuot laus eq YHENSAIN, nah Mangso ka nvng lyis housoeh kuot das toeuh ma dyei.

¹⁵Hauh gungsthaiq nyang namoq dius jens masyah ngos teh dah lvpe dvyuk thuq los nhang das las, namoq nyah domsyos gyo chah.

¹⁶Namoq Sina boms mas huom nyeih lyis nvng ngos lyis, YHENSAIN, nah Mangso taiq zis ngos lyis vdoms xauhgyo nhang lo, hau gyukphoh nyang los zis eq vdoms nyvng nhang lo, khasoeh ge lyis ngos shei das, ge dung.

¹⁷Housoeh las YHENSAIN ngos lyis taiq, Nyamoq joeui bos bos sang goeus.

¹⁸Ngos nyamoq nyang dius jens vkhau masyah nvng soehteh dah lvpe dvyuk nyamoq xiklyis thuq los nhang das. Ngos nyang cha taiq das zis shet das. Nyang gas ngos tying toh zis dvnganh dius jens lyis taiq das.

¹⁹Nyang ngah nyings mas taiq das, nyah domsyos ma gyo soeu hank lyis laus eq ngos nyang lyis joeng das.

²⁰Nghuot laus eq ngos nyang lyis ma taiq nhang zis ngah nyings masyah loeus womh taiq Lvpe hank laus eq nyang hauh xiklyis shei chah. Gohtoeu mangso jens nyings mas taiq dah lvpe hank laus eq shei chah.

²¹Nvng YHENSAIN jyank masyah los dah loeus ma nghuot zis khasoeh yoh seq das ge nghamh mvbeh.

²²Hauh lvpe ka YHENSAIN dah nyings mas taiq zis ma bweh los lyis, houka YHENSAIN dah loeus ma nghuot. Lvpe nyang nyah vmingh yah taiq goeus, nyang lyis ma gyuk noh.