Read Achang LYI 20 Bible Online

LYI 20 - Achang bible

LYI 20

¹Nvng nah jeswus lyis zan das ge loh lyis, nvng jeslhyingh jens yahge nyang jens, nah thoq lyis nyo dah jesphung lhyi nyvng lyis nyamoq lyis vgyuk. Nvng lyis Egutu masyah khyuot shwih los, YHENSAIN, nah Mangso nvng yah nghuot das.

²Namoq jes ma zan shih lyis phudyei soeu namoq xik mas jesphung lhyi los taiq das zis gas,

³Israel jens eh, gyo geh! Khvnyhik namoq jeszan loh das. Namoq jeswus lyis vgyuk goh, yom vgyau goh, vdvn goh.

⁴YHENSAIN, namoq dah Mangso ka namoq yah dvgeh loh das las nyang namoq lyis ung cho dyei das.

⁵Dius jens lyis zau jens taiq zis gas, Heimha yhen saiq kuot las yhen ma wvng shih soeu hank bos? Bos lyis nyang yhen pheh tauh loh chah. Ma nghuot lyis nyang jes mas gyoh lyis nyah yhen lhyi gohyuk wvng das.

⁶Heimha zvbiq khyam tsungh las shih ma xauh yhomh zo shih soeu hank bos? Bos lyis, nyang yhen pheh tauh loh chah. Ma nghuot lyis, nyang jes mas gyoh lyis gohyuk hauh zvbiq shuk das.

⁷Heimha nyihwank das xiklyis kwank toh soeu hank bos? Bos lyis nyang yhen pheh tauh loh chah. Ma nghuot lyis nyang jes mas gyoh lyis nyang kwank toh dah nyi gohyuk nyihwank yoeus das.

⁸Zau jens dius jens lyis taiq shih das zis gas, heimha gyuk soeu hank bos? yomgyau soeu hank bos? Bos lyis, nyang yhen pheh tauh loh chah. Ma nghuot lyis, nyang gohyuk dah ehnyet lyis dyoq loh nhang das.

⁹Zau jens jesphung lhyi hauh zis dye taiq lyis, nyamoq gas uhshe das xiklyis jeszau jens toeuq kat chah.

¹⁰Nvng dvwus wus mas jeszan das zis jens loh lyis, cangxeih hauh wus mas bang lyis nyamoq somh kham das toeuh dyei geh.

¹¹Nyamoq khomh phank las vsomh kham lhyi ka nyamoq dvnganh gas nah jons duot las nyamoq gas nvng lyis muh changh zwi dyei das.

¹²Nghuot laus eq hauh wus mas bang vsomh ma kham, jeszan los lyis gas hauh yvlyis nah jesphung yah lhaink toh chah.

¹³YHENSAIN, nah Mangso hauh wus nvng lyis kyauh lyis, nvng houmha bang yukgis khanghmuh lyis sat chah.

¹⁴Nghuot laus eq vmesbih jens, loshang jens, gaunyhauq yahge hauh wus mas zis dvnganh, nah xiklyis gis yoeus. Nvng nah jeswus yah sen zis dvnganh gis yhung. YHENSAIN nvng lyis hauh zis dyei.

¹⁵Housoeh namoq loh nyeis das, hauh mau masyah we joq dah wus jens lyis eq vgus housoeh kuot chah.

¹⁶Nghuot laus eq YHENSAIN, nah Mangso nvng lyis dyei dah vso wus xauh yoeus lyis gas yuk khanghmuh lyis sat aq.

¹⁷YHENSAIN nvng lyis vmingh dyei toh vgus Hiti, Amori, Khanan, Perizi, Hiwi, Yebusi moq dvnganh lyis dom shoq mhont chah.

¹⁸Ma nghuot lyis gas nyamoq dah mangso lyis kuot dah (vchoqh vlhauq) cho namoq lyis jyauh los das. Housoeh namoq gyukphoh zis kuot lyis gas, YHENSAIN, nah Mangso lhyi tyi dah yaunos kuot das.

¹⁹Nvng dvwus wus lyis zan yoeus das lyis nyangh shoq lhaink toh laus eq shihzains lyis vthoeuq. Nvng hou mhayah shih thyoq zo aq, nghuot laus eq shihzains lyis vmhont. Saiqzains gas nah jeswus ma nghuot.

²⁰Nghuot laus eq zo dah vzains ma nghuot zis nvng seq dah vzains lyis thoeuq las nvng jeszan dah wus ma gyoh dvchank jeszis yoh kuot yhung.