Read Achang LYI 21 Bible Online

LYI 21 - Achang bible

LYI 21

¹YHENSAIN, nah Mangso namoq lyis dyei das mau mas dvyuk yuk danh mas dius mvng nyvng las hank sat zis ma seq oen goh,

²nah uhshe bang yahge soetuon bang e lha, hau sat toh zis nyvng joqyos masyah vyvm vwi wus pheh khahweq we zis tsain keq loh chah.

³Hau sat toh joqyos masyah ni thank wus mas dah uhshe bang gas muh mas ma yhung ku shih dah noeupon dvdoeu khyen chah.

⁴Nyamoq gas hauh noeupon lhyi yos ma kuot ku dah joqyos jeis khanhamp eq ma kyuk loh dah jeislo lvng nvm mas she e lha lainzain bat khyauh chah.

⁵Houmha Lewi phudyei bang eq houmha loh chah. Khasoeh ge lyis nyamoq gas bat goh sat goh cho bos dah (lyi) soe dvnganh lyis thyet chah. YHENSAIN, nah Mangso ka nyang lyis phuqsoe das zis yahge nyah nyings masyah shvmanh dyei das xiklyis nyamoq lyis khyen toh.

⁶Hau dius sat toh zis nyvng dah joqyos masyah ni thank wus mas dah uhshe bang dvnganh gas, hau lainzain khyauh toh noeupon thoq mas nyamoq loq lyis cheih las,

⁷taiq, Ngamoq haih soeu lhyi ma sat, hank sat zis ngamoq ma seq.

⁸YHENSAIN eh, nvng Egutu masyah khyuot los, nah dius Israel jens lyis yobos khyuot dyei aq. Yobos khyuot las dius sat yobos ma bos soeu lhyi hauh yvwons vkih dyei.

⁹Housoeh nvng YHENSAIN o khyvlyis jus cho kuot zis yah dius sat dah yvwons kih dyei yvlyis shang tyamp das.

¹⁰Nvng jeszan yvmas YHENSAIN, nah Mangso nvng lyis ung cho dyei las nvng thung dius nyhik los lyis,

¹¹nyamoq mas dyei yungh lyis nyvng las nyang lyis o lha nyihwank mes mvbeh.

¹²Nyang lyis nah yhen mha shwih loh las, houmha uhyuk, loqsainh thyet,

¹³dyimis thaiq das. Nyang nah yhen mha nyeis las lhamhmuh dvkhyvp gonh nyah nyhiphoq lyis kuk ngaus chah. Hauh thang lhyi, nvng nyang lyis nyihwank das.

¹⁴Thang lhyi nvng nyang lyis ma ngwis lo lyis gas, nyang o khyvlyis loh nhang chah. Nvng nyang yah tsoengh yhetgoh goeus las, nyang lyis jons teh ma yoh kuot, ma yoh ungh.

¹⁵Dius dvyuk yhensain nyhiq aiq yuk yoh oen goh. Hau aiq yuk gonh yah yukgis lo khoeu dyei. Nghuot laus eq loxeih gas nyang zes ngwis dah yhensain nyhiq lo ma nghuot.

¹⁶Nyang lo jens lyis nyah yhenzis vso gvm lyis, loxeih yah sen dah yhenzis gvmboms lyis nyang jyet dah yhensain nyhiq dah lo lyis dyei zis yah nyoqnho khyen cho ma gis chixoeuq.

¹⁷Nyang jyet dah yhensain nyhiq dah lo ma nghuot laus eq loxeih lyis gas nyah yhenzis vso gvmboms aiq huon gvm dyei chah. Dius dvyuk gas nyah loxeih lyis rhen lha lyi bos dah toeuh gvmboms dyei chah.

¹⁸Dvyuk yuk mas nhaiqlom than, gomloeus toq, nyah nyhiphoq joeng laus eq domsyos ma gyo dah lo yoh, oen goh.

¹⁹Nyah nyhiphoq gas hauh lo lyis nyang nyeis wus mas dah uhshe bang xikkhonh mas shwih e lha soetuon das.

²⁰Nyah nyhiphoq taiq das zis gas, Ngamoq dah lo gas nhaiqlom than, gomloeus toq las ngamoq domsyos ma gyo. Nyang ngwis yhung mhont, yhei pauhzoe nghuot, ge.

²¹Housoeh hauh wus mas bang gas nyang lyis luk yah doeuh sat chah. Housoeh nvng haih ma gis cho lhyi shang tyamp chah. Cha bweh zis Israel jens dvnganh xauhgyo das las gyuk das.

²²Dvyuk yuk dius sat yobos yah sat zis xauh las gungs zains mas lhangh lyis,

²³nyah mvng lyis zains mas dvnyens gonh ma gis lhangh toh. Hauh nyeih lyis nyhop chah. Khasoeh ge lyis, Zains mas mvng lhangh toh zis gas hauh mau mas Mangso dah nhoengh zis she los. Mvng lyis nyhop tyamp aq, housoeh lyis YHENSAIN, nah Mangso nvng lyis dyei dah mau ma lhoeuh das.