Read Achang LYI 22 Bible Online

LYI 22 - Achang bible

LYI 22

¹Nvng Israel jens dah noeu, nghuot ya yvng chowhang loh zis nyvng lyis hauh yvlyis vyoeuh lhaiq toh. She tauh los aq.

²Nghuot laus eq nyah yhensain we mas nyeis, nghuot ya hauh yhensain hank nghuot yvlyis ma seq lyis gas, nah yhen mha she los las nyah yhensain xo los lyis nyang lyis dyei aq.

³Nvng mauhlyihzoe, dyimis, Israel jens chithyuk dah vyhang cha laus eq nyvng lyis vgus housoeh kuot chah.

⁴Israel jens dah mauhlyihzoe, noeu lains loh lyis, vyoeuh lhaiq toh. Hauh gaunyhauq nyah khyei yah doms yoh yap shoq bos pangh aq.

⁵Vmesbih gas vbusbih dah dyimis ma gis wuot. Vbusbih eq vmesbih dah dyimis ma gis wuot. Housoeh teh kuot bang lyis YHENSAIN, nah Mangso hoeng.

⁶Nvng saiqzains mas, nyeisjvng mas, nghoq zains gas sot mas uq nyeis, nghuot ya nghoq lo yah nyeis zis nyvng lyis nghoq zains lyis ma gis yoeus.

⁷Nvng nghoqlo gis yoeus laus eq nghoq zains lyis gas kat kat chah. Housoeh lyis nvng nyeisgis yaplhoq las kang xing das.

⁸Nvng yhen saiq kuot lyis yhenkhung nyhanghmau chank yah vlhomuh gos toh aq. Housoeh lyis dvyuk yuk dyetgyoh shei lhyi nvng yvwons ma bos das. [6]

⁹Nah zvbiq khyam teh yos dvkhyangh mas gohtoeu vnyau cha eq vxoh. Xoh lyis zvbiq shih eq ma gis yhung, gohtoeu jyo eq ma gis yhung das.

¹⁰Yos phuk das zis noeulu yahge mauhlyihzoe lyis koeu dvgeh vhuon.

¹¹Jeiyhwiq khying yahge sauh khying dvgeh yoq dah misseh yah kuot zis vwuot.

¹²Nvng gangh dah misseh nyei thunk mas bandyoms chop tap aq.

¹³Yukgis dvyuk nyelo dvyuk lyis nyihwank thang lhyi nyang lyis ma o lo ge thyet oen goh.

¹⁴Housoeh nyang gas hauh nyelo lyis ma jus zis tsuk las kuot taiq las, Ngos haih nyelo lyis nyihwank uhlyis nyang lonyi gyingh ma nghuot ge kauq.

¹⁵Haih zis bweh lyis nyelo dah nyhiphoq gas nyang lonyi gyingh nghuot dah kyink cho, hau suih lhoeuh dah nyihwank seh lyis, wus uhshe bang dah soetuon yvmas los chixoeuq chah.

¹⁶Nyah uwus nyamoq lyis taiq das zis gas, Ngos ngah lonyi haih soeu lhyi dyeizo goeus, gvshih nyang lyis ma o lo.

¹⁷Nyang ma jus zis tsuk las kuot taiq zis gas, nyang nyihwank uhlyis nyang lonyi gyingh ma nghuot, ge. Nghuot laus eq haih zis ngah lonyi gyingh dah vsoh nghuot, Yoeuh aq, haih nyihwank seh mas suih lhoeuh joq, ge.

¹⁸Wus uhshe bang gas hauh yhensain phoq lyis lyuk chah.

¹⁹Ngwis kyvp dvxo eq yau sang las hauh nyelo dah uwus lyis dyei chah. Khasoeh ge lyis Israel lonyi gyingh thoq mas xoqphuh cho she los. Hauh thoq lyis hauh nyelo gas nyah yhensain nyhiq tsoq duot chah. Nyang dwis nyeis dvchank hauh nyelo lyis ma yoh kangh tyamp.

²⁰Nghuot laus eq hau tsuk cho ka jus las nyang lonyi gyingh nghuot dah vsoh ma bos lyis gas,

²¹nyamoq hauh nyelo lyis nyah uwus dah yhen khyam khomh mas shwih thuq loh las houmha nyah wus mas bang nyang lyis luk yah doeuh sat chah. Nyang gas yhen ma loh shih, uwus dah yhen mha nyeis shih gyo lyis yukgis yah yhetgoh zis yah yamoq dius jens mas xoqphoh cho kuot goeus. Heisoeh khyvlyis nvng haih ma gis cho shang tyamp das.

²²Yukgis dvyuk gas gohtoeu dvyuk dah yhensain nyhiq yah yhetgoh zis nyvng lyis, hauh aiq yuk lyis yah sat chah. Heisoeh khyvlyis nvng haih ma gis zis shang tyamp das.

²³Wus vkhau mha yukgis dvyuk gas dvyuk yuk kwank toh dah nyelo yah yhetgoh nyeis yvlyis nyvng lyis, oen goh.

²⁴Aiq yuk lyis yah wus nghe pheh shwih thuq las luk yah doeuh sat chah. Nyelo gas wus vkhau mha nghuot las yoh xauhgyo yvmas nghuot laus eq pangh das nyhenshang ma kaiq yvmvyah nyang shei chah. Hauh yukgis eq dvyuk kwank toh goeus soeu yah yhetgoh yvmvyah shei chah. Heisoeh khyvlyis nvng hai ma gis zis shang tyamp das.

²⁵Yukgis dvyuk gas boms mau mas dvyuk yuk kwank toh dah nyelo lyis zaiq yhetgoh oen goh. Houlhyi hauh yukgis lyis kyingh sat chah.

²⁶Hauh nyelo gas shei mon dah yaunos ma kuot yvmvyah nyang lyis cha eq vkuot. Haih soe ka dius dvyuk gohtoeu dvyuk lyis zan las sat zis yah dvyhangteh nghuot.

²⁷Boms mas vbusbih gas hauh kwank toh nyelo lyis zaiq yhetgoh lyis nyang pangh das zis kaiq laus eq houmha nyang lyis pangh das soeu hank ma bos.

²⁸Yukgis dvyuk gas hank ma kwank shih dah nyelo lyis zaiq yhetgoh zis nyvng oen goh.

²⁹Hauh soeu ka hauh nyelo dah uwus lyis lonyi phauh ngwis kyvp oengci dyei chah. Nyang gas hauh nyelo lyis tsoengh shwih yhetgoh goeus yvmvyah hauh nyelo gas nyah yhensain nyhiq duot chah. Nyang dwis nyeis dvchank hauh nyelo lyis khanhamp eq ma yoh kangh tyamp.

³⁰Dius dvyuk gas, nyah uwus dah yhensain nyhiq hank yah eq yhetgoh zis yah nyah uwus lyis xoq ma gis phuh nhang.