Read Achang LYI 23 Bible Online

LYI 23 - Achang bible

LYI 23

¹Yukgis shan nghuot ya yukgis gungs thyet tyamp soeu hank eq YHENSAIN dah dius jens huom mha ma gis bos.

²Deslo gas YHENSAIN dah dius jens huom mha hank eq ma gis bos. Housoeh teh soeu dah vnyau vshih dvci vcaiq mas yangh ma gis bos.

³Amon jens yahge Moab jens - nyamoq dah vnyau vshih dvci caiq mas yangh hank eq YHENSAIN dah dius huom mha ma gis bos.

⁴Namoq Egutu masyah thuq los cho mha namoq lyis zonoms yahge jeis dyei das zis ngoek. Nyamoq gas namoq lyis nhoengh das xiklyis Mesopotamia mau, Pethor wus mas dah Beor lo Balam lyis nghoh.

⁵Nghuot laus eq YHENSAIN, nah Mangso ka Balam dah dang ma gyo dyei; hauh gungsthaiq nyang nvng lyis jyetdap yvmvyah, hau nhoengh zis gas shvmanh pheh lhaiq kat dyei.

⁶Namoq dius dvnyau duot nyeis dvchank haih dius nyau jens lyis pangh cho cha khanhamp eq vdyei, nyamoq dah nyeisgis yaplhoq cho vkuot dyei.

⁷Edom dius jens gas namoq dah boekyis nghuot las nyamoq lyis dius ngis vkhyoq. Nvng Egutu mau mas nyeis ku yvmvyah nvng nyamoq lyis dius ngis vkhyoq.

⁸Nyamoq dah vnyau vshih somh vcaiq dah thang pheh YHENSAIN dah dius jens huom yvmas gis bos.

⁹Jeszan shishenh namoq dvp mas nyeis uhlyis, nvng lyis ma lhoq ma shang bweh nhang dah vyhang cha lhyi laus eq jhank chah.

¹⁰Nyenh lyis yukgis dvyuk ma lhoq daq bweh. Housoeh bweh lyis nyang dvp nghe mha thuq nyeis chah.

¹¹Nyenhthang jweh los lhyi nyang gungs cheih chah, buis wvng lyis nyang dvp khau mha doms gis wvng los.

¹²Nvng ngheloh joqyos eq dvp nghe mha kuot chah.

¹³Nah kyonhkhyi jeszis mas tsohthauh bos chah. Nvng nghe loh uhlyis hauh zis yah dwang doeu las, nvng nghe loh toh zis nghop khoq chah.

¹⁴Nah dvp lhoqshang shoq kuot aq. Khasoeh ge lyis YHENSAIN, nah Mangso nah dvp mas nvng yah dvgeh nyeis las nvng lyis gos dyei, nah jeswus lyis ung tyamp nhang. YHENSAIN nvng lyis nungs phuk khoq das khyvlyis ma doeus cho cha eq vkuot.

¹⁵Nyamoq yhensain jyank masyah phang lha nah jyank mas los khau dah jons jens lyis vdoms tauh nhang kat.

¹⁶Nyamoq namoq dah wus dvkoeuq koeuq mas, nyeis mes yvmas gis nyeis. Nvng nyamoq lyis than than ma gis kuot.

¹⁷Israel vnyau jens mas yhenmuh nghe nyhiq nghe phoq ma gis bos.

¹⁸Housoeh khyvlyis ngwis xo lha eq YHENSAIN, nah Mangso lhyi nyhen toh zis tyink das nyhenshang YHENSAIN dah yhen mha ma gis chi e. YHENSAIN ka yhenmuh nghe nyhiq nghe phoq lyis hoeng.

¹⁹Nvng Israel jens lyis ngwis, zonoms, cha laus eq jyeih dyei lyis lhyi vsang.

²⁰Lvbaus lyis gas lhyi kat las yoh jyeih dyei: nghuot laus eq nvng Israel lyis jyeih dyei yvmas ma nghuot. Haih lyi chank aq, housoeh lyis nvng loh nyeis das mau mas nvng kuot zis dvnganh mas YHENSAIN, nah Mangso nvng lyis shvmanh dyei das.

²¹Nvng YHENSAIN, nah Mangso lhyi nyhen toh lyis, nvng dangthoengh toh zis vthyuk tyamp. YHENSAIN nvng nyhen toh zis sang das. Hauh zis ma kuot tyink zis gas yaunos nghuot.

²²YHENSAIN lhyi nyhen toh zis ma nghuot lyis gas nvng mas yaunos ma bweh.

²³Nghuot laus eq nvng xihhonh toh lyis, doengs nhang aq.

²⁴Nvng dvyuk yuk dah zvbiq khyam cho chank suh loh lyis zvbiq shih o nyhoq gis zo, nghuot laus eq ma gis yoeus wons loh.

²⁵Nvng dvyuk yuk dah danh cho suh loh lyis guknham lhyi loq yah yoh shap zo laus eq banlyenh yah ma yoh yet.