Read Achang LYI 24 Bible Online

LYI 24 - Achang bible

LYI 24

¹Vbusbih dvyuk nyihwank thang lhyi hauh vmesbih mas nyang ma doeus cho dvja[7] nyvng las nyang ma o lo ge thyet oen goh. Housoeh las nyang lyis kangh maussauh lhaih dyei las nyah yhen mhayah nhang kat chah.

²Hauh thang lhyi hauh vmesbih gas gohtoeu yukgis dvyuk yah phoengh wvng oen goh.

³Hauh yukgis eq nyang lyis ma o ge thyet las nyang lyis kangh maussauh lhaih dyei las nyah yhen mhayah nhang kat: nghuot ya nyah yhensain phoq aiq vyuk shei oen goh.

⁴Khacho yah laus eq cangxeih yhensain phoq gas hauh vmesbih lyis nyi ma doms gis hwank: nyang gas hau vmesbih lyis vwot v-oeu nghuot oen nghamh chah. Nyang hau vmesbih lyis nyi doms hwank lyis gas YHENSAIN lhyi vchoqh vlhauq kuot zis nghuot. YHENSAIN, nah Mangso nvng lyis dyei dah mau mas houteh gyukphoh yaunos ma gis she los.

⁵Vbusbih dvyuk nyang nyi vsaiq hwank toh lyis nyang jesmuh ma gis wons. Zauguon muh eq ma gis wons wuq. Nyang dvzvn muh masyah thuq chah. Housoeh nyang yhen mha yoh nyeis las nyah yhensain nyhiq lyis pyo shoq kuot chah.

⁶Nvng dvyuk yuk lyis dvja ja jyeih dyei lyis nyang wom mhoq nyeis dah mhoq ma gis tank yoeus. Houka nyah mebih kang dwis das xiklyis zonoms sont dah vyhang nghuot.

⁷Namoq hank laus eq Israel jens lyis tsoengh khauh shwih las jons kuot, nghuot ya jons ungh, lyis nvng sat zis xauh chah. Heisoeh khyvlyis nah dius nyau gas haih ma gis zis shang tyamp das.

⁸Namoq dvmjot yomh nos lyis Lewi phudyei bang nvng lyis taiq khyvlyis top zaih lha chank aq. Ngos nyamoq lyis taiq shet toh zis chank kuot geh.

⁹Namoq Egutu masyah doq los gyung cho mha YHENSAIN, namoq dah Mangso Miriam lyis khasoeh kuot yvlyis soh geh.

¹⁰Nvng dvyuk yuk lyis dvja ja jyeih nghoh dyei lyis, nyang tank toh das ge dah dyixing yoeus das oen, nyah yhen khau mha vwvng loh.

¹¹Nvng nghe mha langh yap las, nyang lyis hauh zis nah jyank mas chi thuq los nhang aq.

¹²Hauh soeu nyungs lyis gas, nvng hau zis nyenh lyis vyoeus toh.

¹³Nyenhthang khanghmuh nyang lyis tauh dyei aq. Housoeh nyang hauh zis yoh phomh yhet das. Nyang nvng lyis nhaiqshoq das, YHENSAIN, nah Mangso eq nvng lyis nhaiqdoeus das.

¹⁴Israel dius, nghuot ya namoq dah wus dvwus wus mas nyeis dah lvbaus nyungs yuot dah uhkung lyis vmhuih zo.

¹⁵Dvnyeih dvnyeih dah uhkung phauh lyis buis ma wvng shih lyis dyei aq. Nyamoq gas ngwis chah las hauh yvlyis nghamh twih toh. Nvng ma dyei lyis gas nvng yah tyi lha YHENSAIN lhyi kaiq das las nvng mas yaunos dah yobos bos das.

¹⁶Nyhiphoq jens lyis nyamoq lo jens dah yaunos gvng mas ma gis sat, lo jens lyis eq nyamoq nyhiphoq dah yaunos gvng mas ma gis sat. Dius gas vsainnyang kuot cu dah yaunos gvng mas sat zis xauh chah.

¹⁷Lvbaus yahge chauhlo dah toeuh lyis ma jus khyvlyis vkuot, Chauhmuh dah dyixing lhyi vtank yoeus.

¹⁸Nvng Egutu mas jons mus ku lha, YHENSAIN, nah Mangso nvng lyis khyuot kat zis soh aq. Housoeh yvmvyah ngos nvng lyis haih tying dang dyei toh.

¹⁹Nvng nah yos mas jyo yhomh lyis tohnyhik khoq dah gukphu lhyi vloh xo lo. Houka lvbaus, chauhlo jens yahge chauhmuh jens xiklyis nyhet toh aq. Housoeh lyis YHENSAIN, nah Mangso ka nvng kuot loh zis dvnganh mas shvmanh dyei das.

²⁰Nvng nah tsanlun shih dvlhain thyoq goeus ya shihgyoh vloh thyoq lo. Houka lvbaus, chauhmuh chauhlo jens xiklyis nyhet toh chah.

²¹Nvng nah zvbiq shih dvlhain thyoq goeus ya vgyoh vloh doms thyoq lo. Houka lvbaus, chauhmuh chauhlo jens xiklyis nyhet toh chah.

²²Nvng Egutu mas jons mus ku zis khanhamp eq vtohnyhik. Housoeh yvmvyah ngos nvng lyis haih tying dang dyei.