Read Achang LYI 26 Bible Online

LYI 26 - Achang bible

LYI 26

¹YHENSAIN, nah Mangso nvng lyis dyei dah mau mas wvng las houmha nyeis thang lhyi,

²namoq dvyuk dvyuk jyo nyang ja nyang cangxeih yhomh dah zis lyis dang mas kat las hau paiq das joqyos mas wons los chah.

³Hauh yoq lyis phudyei muh wons nyeis soeu jyank mas loh taiq das zis gas, Ngamoq lyis dyei das ge ngamoq dah phauh thyeih moq lyis dangthoengh toh dah mau mas ngamoq jweh goeus oen gvshih YHENSAIN, ngah Mangso lhyi rhen.

⁴Phudyei soeu eq nah dang yoeus las YHENSAIN, nah Mangso dah phon xik mas toh das.

⁵Hauh thang lhyi nvng YHENSAIN xikkhonh mas taiq das zis gas, Ngah phauh thyeih gas suh whang yenh dah Aramean nghuot. Nyang nyah yhenbang lyis Egutu mas e shwih nyeis. Houmha e uhlyis nyah yhenbang gas nainlo dvnghuot. Nghuot laus eq nyamoq gas nyo las yomsoq bos dah dius nyau bweh los.

⁶Egutu dius gas ngamoq lyis than than kuot las jons jens lyis teh muh tsoengh zwi nhang.

⁷Housoeh ngamoq gas YHENSAIN ngamoq phauh thyeih moq dah Mangso lhyi pangh aq, oen dung. Nyang ngamoq dah thwe lhyi xauhgyo zis yahge ngamoq dah shanghsenh cho, yaukyenh cho, nyungdaus cho lhyi nyvng dyei.

⁸Nyah yom, nyah kuhxing yomsoq yah ngamoq lyis Egutu masyah khyuot kat. Nyang yomsoq muh yahge mauh loqmuh kuot las gyukphoh zis bweh nhang.

⁹Nyang ngamoq lyis heimha shwih los las hai nyeis coeu bos las dis dah mau ngamoq lyis dyei.

¹⁰Housoeh las nyang ngos lyis dyei dah jyo uh yhomh zis ngos gvshih YHENSAIN jyank mas chi los. Hauh thang lhyi hauh dang YHENSAIN xikkhonh mas khyoq las houmha paiq chah.

¹¹Nvng yahge nah yhenbang lyis YHENSAIN, nah Mangso dyei, gis dah vyhang xiklyis nhaiqshoqlang sang chah. Housoeh namoq yah nyeis dah Lewi jens, lvbaus moq yah dvgeh gauslaus pwe kuot chah.

¹²Somh vzvn khanghmuh nah jyo ciboms dvboms Lewi dius, lvbaus, chauhmuh chauhlo jens lyis dyei aq, housoeh lyis dius phung khanghmuh mas nyamoq zo chah zis dvnganh yoh das. Nvng haih zis dye kuot lyis,

¹³nvng YHENSAIN lhyi taiq das zis gas, Nvng ngos lyis kuot aq ge tying toh vgus, gyingshang ciboms dvboms ngah yhen mha cha ma nyet lo. Ngos hauh yvlyis Lewi dius, lvbaus, chauhmuh chauhlo jens lyis dyei goeus. Ciboms yah sen dah nah tyingtoh dang lyis ma tohnyhik, domsyos ma gyo ma kuot.

¹⁴Ngos kuk uhlyis houmha zis ma zo. Ngos ma lhoq ma shang uhlyis ngah yhen mhayah houmha zis cha ma yoeus. Shei bang xiklyis hou mhayah cha eq vlu ma dyei. YHENSAIN eh ngos nah domsyos gyo. Ciboms yah sen lha nvng tying toh zis dvnganh yah kuot goeus.

¹⁵Nah gyingshang joqyos maukhung mhayah yoeuh khyoq kat las nah dius Israel jens lyis shvmanh dyei aq. Nvng ngamoq dah phauh thyeih moq lyis dangthoengh toh zis yah dvyhangteh ngamoq lyis dyei dah mau, nyeis coeu bos las gis dah mau lyis eq shvmanh dyei aq, oen chah.

¹⁶Khvnyhik YHENSAIN, nah Mangso nvng lyis nyah lyi dvnganh chank das nyhenshang tying toh. Housoeh las hauh yvlyis nah nhaiqlom dvnganh yah lomluk luk chank aq.

¹⁷Nvng khvnyhik YHENSAIN ka nah Mangso khyvlyis rhen goeus; nyah domsyos gyo das, nyah lyi chank das, nyang tyingtoh zis dvnganh chank kuot das, ge dangthoengh toh goeus.

¹⁸YHENSAIN ka nyah dangthoengh yah dvyhangteh khvnyhik namoq lyis nyah dius khyvlyis lhom yoeus goeus. Nyah lyi dvnganh chank das zis eq tying toh.

¹⁹Nyang dangthoengh toh zis yah dvyhangteh, nvng lyis nyang gvnkhanh toh dah dius nyau jens dvnganh thoq lyis kuhxing nhang lha chungh cho, nyings hoeuh cho yahge nyoqnho ngelang bos cho she los das. Housoeh nvng gas nyah dius bweh los das, ge.