Read Achang LYI 27 Bible Online

LYI 27 - Achang bible

LYI 27

¹Hauh thang lhyi Israel uhshe bang yah dvgeh Moshe, dius jens lyis taiq, Khvnyhik ngos namoq lyis dyei nyeis dah taiq shet cho dvnganh lyis chank kuot geh.

²Namoq Yodan lvng goeu las YHENSAIN, nah Mangso nvng lyis dyei dah mau mas jweh nyeih lyis lukzains kuh kuh toeutsung lha bilvt nyen shvhwih juot las,

³hauh thoq mas haih lyi yahge jyauh cho dvnganh lhaih toh chah. YHENSAIN namoq phauh thyeih moq dah Mangso namoq lyis dangthoengh toh, gis las nyeis coeu bos dah mau mas wvng goeus ya,

⁴namoq gas Yodan lvng thyitvp pheh Ebal boms mas khvnyhik ngos taiq shet khyvlyis haih lukzains cuk las bilvt yah nyen toh chah.

⁵Houmha luk phon ci chah. Nvng hauh luk lyis thyeq kyonhkhyi yah ma gis tsan.

⁶Khasoeh ge lyis YHENSAIN, nah Mangso xiklyis phon ci lhyi ma thyet ma khangh dah luk tyomh yah ci chah. Nvng houmha ngheq dyei, phudyei chah.

⁷Houmha phudyei las YHENSAIN, nah Mangso xikkhonh mas nah nyenstap jyungshuk zo zis yah nhaiqshoqlang gausyis das.

⁸Hauh bilvt nyen toh dah luk mas Mangso dah lyi khonh khanghmuh bvng bvng lhaih toh aq.

⁹Tsai, Lewi phudyei bang yah dvgeh Moshe, Israel jens dvnganh lyis taiq, Israel jens eh, vlhomuh gyo geh. Khvnyhik namoq gas YHENSAIN namoq Mangso dah dius jens bweh los goeus.

¹⁰Housoeh las khvnyhik ngos namoq lyis dyei nyeis dah nyah lyi chank las nyah domsyos gyo nyeis geh.

¹¹Hauh thang lhyi Israel jens lyis Moshe taiq,

¹²Namoq Yodan lvng goeu thang lhyi, dius jens lyis shvmanh dang taiq uhlyis o mha vkoq jens gas Gerizim boms mas yap das. Hauh bang gas, Simon, Lewi, Yuda, Isakha, Yosep yahge Benyamin nghuot.

¹³Dius jens lyis nhoengh dang taiq uhlyis o mha vkoq jens gas Ebal boms mas yap das. Nyamoq gas Ruben, Gad, Asher, Zebulun, Dan yahge Napthali nghuot.

¹⁴Hauh uhlyis Lewi jens gas thwe than yah haih dang taiq das.

¹⁵Luk, saiq, nghuot yah ngwis xing yah phvra kuot las gauh paiq soeu hank thoq mas laus eq Mangso dah nhoengh zis xauh bas jungh. YHENSAIN ka phvra lyis hoeng, ge lyis, dius jens dvnganh gas, Amen ge phuk taiq das.

¹⁶Nyah ungwes uwus lyis ma phauh soeu hank thoq mas laus eq Mangso dah nhoengh zis xauh bas jungh ge lyis, dius jens dvnganh gas, Amen, ge phuk das.

¹⁷Yhenkyoh dah khyamkyoh zains cheh soeu hank thoq mas laus eq Mangso dah nhoengh zis xauh bas jungh ge lyis, dius jens dvnganh gas, Amen, ge phuk das.

¹⁸Nyoqjet soeu lhyi ma jus yvpheh choshe loh soeu hank thoq mas laus eq Mangso dah nhoengh zis xauh bas jungh ge lyis, dius jens dvnganh gas, Amen, ge phuk das.

¹⁹Lvbaus, chauhmuh chauhlo lyis nyamoq dah toeuh dyuk shoq kuot dyei soeu hank thoq mas laus eq Mangso dah nhoengh zis xauh bas jungh ge lyis, dius jens dvnganh gas, Amen, ge phuk das.

²⁰Nyah uwus dah yhensain nyhiq dvyuk yuk yah yhetgoh zis yah nyah uwus lyis xoqphuh nhang soeu hank thoq mas laus eq Mangso dah nhoengh zis xauh bas jungh ge lyis, dius jens dvnganh gas, Amen, ge phuk das.

²¹Gaunyhauq yah yhetgoh soeu hank thoq mas laus eq Mangso dah nhoengh zis xauh bas jungh ge lyis, dius jens dvnganh gas, Amen, ge phuk das.

²²Nyah nhamhmuh nghuot ya nhamhmuh doeus soeu yah yhetgoh soeu hank thoq mas laus eq Mangso dah nhoengh zis xauh bas jungh ge lyis, dius jens dvnganh gas, Amen, ge phuk das.

²³Yuknyih yah yhetgoh soeu hank thoq mas laus eq Mangso dah nhoengh zis xauh bas jungh ge lyis, dius jens dvnganh gas, Amen, ge phuk das.

²⁴Dius gauh sat soeu hank thoq mas laus eq Mangso dah nhoengh zis xauh bas jungh ge lyis, dius jens dvnganh gas, Amen, ge phuk das.

²⁵Yobos ma bos soeu lhyi sat das xiklyis phauh yoeus zo soeu hank thoq mas laus eq Mangso dah nhoengh zis xauh bas jungh ge lyis, dius jens dvnganh gas, Amen, ge phuk das.

²⁶Mangso dah lyi yahge jyauh cho dvnganh ma chank soeu hank thoq mas laus eq Mangso dah nhoengh zis xauh bas jungh ge lyis, dius jens dvnganh gas, Amen, ge phuk das.