Read Achang LYI 29 Bible Online

LYI 29 - Achang bible

LYI 29

¹Heika Moab pa mha Israel jens lyis thanghchvp toh das xiklyis YHENSAIN Moshe lhyi tying toh dah thanghchvp dang nghuot. Hai dvnganh gas Sina boms mas YHENSAIN nyamoq yah toh dah thanghchvp mas lhungh kat zis nghuot.

²Moshe Israel jens dvnganh lyis khi huom las taiq, YHENSAIN ka Egutu hwankti, nyah zau jens, nyah dvmau gonh lyis cha kuot yvlyis namoq nyang nyvng goeus.

³YHENSAIN kuot dah gyukphoh yomh, yomsoq muh, mauh loqmuh zainsmuh lyis namoq nyvng goeus.

⁴Nghuot laus eq nyang khvnyhik jweh shoq namoq thungh phuh goeus cho namoq lyis ma seqgyo nhang shih.

⁵YHENSAIN ka namoq lyis mhanhdyvp mas nyeici zvn shwih los goeus. Namoq dah dyi yahge thyvkoq ma tyang loh.

⁶Namoq ohlhyoq ma xauh zo, zvbiq, yhei eq ma xauh shuk laus eq YHENSAIN ka namoq dah Mangso nghuot yvlyis jyauh das xiklyis namoq chah nyeis zis dvnganh dyei.

⁷Yang haih joqyos mas jweh lyis Heshbon hwankti Sihon, Bashan hwankti Og moq gas yang lyis zan das ge tsain thuq los. Nghuot laus eq yang nyamoq lyis ung.

⁸Yang nyamoq mau lyis yoeus las Ruben vkoq, Gad vkoq yahge Manase vkoq dvgohyih lyis gvm dyei.

⁹Haih thanghchvp dang dvnganh lyis lomluk luk chank kuot geh. Housoeh lyis namoq kuot loh cho khvt khanghmuh ung los das.

¹⁰Khvnyhik namoq dvnganh gas YHENSAIN, nah Mangso xikkhonh mas tsain yap joq. Houka namoq dah uhshe bang, zau jens, vbusbih jens,

¹¹vmesbih jens yahge loshang jens, namoq mas nyeis, namoq xiklyis jeis kham thangh yoeus dah lvbaus tsain nghuot.

¹²YHENSAIN, nah Mangso yah thanghchvp chvp las hauh yvwons lyis lhom yoeus das xiklyis khvnyhik namoq dvnganhmoq heimha tsain nghuot.

¹³Yhensain ka nvng yahge nah phauh thyeih moq Abraham, Isak yahge Yakop moq lyis dangthoengh toh zis yah dvyhangteh, gvshih nvng lyis nyah dius kuot las nyang gas nah Mangso duot das cho goeng nhang.

¹⁴YHENSAIN haih thanghchvp yahge nyah yvwons toh zis gas namoq yah kyingh toh zis ma nghuot.

¹⁵Nyang khvnyhik yang hai nyah xikkhonh mas yap joq bang dvnganh yahge, ma khoeu los shih dah yah vnyau vshih yah eq toh.

¹⁶Egutu mas yang khasoeh nyeis khoq zis eq, gohnyau dah maunyeis cho khasoeh suh lai los zis eq namoq soh.

¹⁷Saiq yah, luk yah, ngwis xing yah kuot dah vchoqh vjyot nyamoq phvra lyis namoq tsain nyvng.

¹⁸Khvnyhik heimha yap dah vbusbih, vmesbih, yhenbang, vkoq hank eq YHENSAIN, yah Mangso mhayah nungs phuk las gohnyau bang dah mangso jens lyis ma paiq loh das zis zaih geh. Heika khoh las duk bos dah nyonoq zains nyet chent loh teh nghuot das.

¹⁹Khvnyhik heimha hai nhoengh dang xauhgyo laus eq nyang nyah nhaiqlom than zis yah nyang loh mes yvcho loh laus eq nyeis gis yap lhoq nyeis ge hank ma nghamh zo das zis zaih nyeis geh. Houka namoq gis bang ma gis bang dvnganh lyis dvyhangteh mhont das.

²⁰YHENSAIN ka housoeh teh soeu lhyi yobos ma khyuot dyei das. YHENSAIN dah nhaiqyo nyi yah ngeh las, haih maussauh mas lhaih toh dah dyoqbis zainsmuh gas nyang shank shoq dyoqbis shoq nyah thoq mas gyoh das.

²¹YHENSAIN ka Israel vkoq jens dvnganh dah xikkhonh mas nyang lyis yikhyoh kuot las hau nhoengh cho thanghchvp yah dvyhangteh, hau dyoqbis zainsmuh nyah thoq mas she los das. Hauh zis gas YHENSAIN dah jyauh cho maussauh buk mas lhaih toh.

²²Jweh los das caiq namoq dah vnyau vshih jens yahge we mau mas dah lvbaus YHENSAIN namoq mau mas she los dah dyoqbis zainsmuh yahge kham zo cho lhyi nyvng das.

²³Nah mau gas YHENSAIN nhaiqgis yo uhlyis mhuk tyamp, Adma yahge Zeboim, Sodom, Gomora wus jens teh monh tyamp das. Hauh mau gas hwank yahge coh yah nghop joq las tyeihgesles mus joq. Houmha chah jyo ma yoh khyoq, mhanh yangh ma yuk.

²⁴Housoeh mungkvn gonh gas, YHENSAIN ka nyamoq mau lyis chamus heisoeh kuot au? Chah gvng mas hei iq nhaiqyo au, ge nyei das.

²⁵Phuk dang gas, YHENSAIN dah dius jens gas nyamoq phauh thyeih moq dah Mangso nyamoq lyis Egutu masyah shwih los uhlyis nyang yah toh dah thanghchvp lyis thyoq yvmvyah nghuot.

²⁶Nyamoq xikpheh khanhamp eq ma paiq ku dah gohtoeu mangso jens, YHENSAIN nyamoq lyis vpaiq ge tung toh dah mangso jens lyis loh phuqsoe.

²⁷Housoeh YHENSAIN nyah dius jens lyis nhaiqyo las, hai maussauh mas lhaih toh dah dyoqbis zainsmuh dvnganh nyamoq mau thoq mas she los.

²⁸YHENSAIN nhaiqgis yo, housoeh nyang nhaiqyo zis yah nyamoq dvnganh lyis nyamoq mau masyah lvbaus mau mas doeuh tyamp. Nyamoq khvnyhik houmha nyeis.

²⁹YHENSAIN, yah Mangso ka vyhang dvkhamh shung toh. Nghuot laus eq nyah lyi gas tsain chixoeuq las, yang yahge yah vnyau vshih gas hauh yvlyis vcaiq vto chank kuot chah.