Read Achang LYI 30 Bible Online

LYI 30 - Achang bible

LYI 30

¹Ngos namoq lyis shvmanh zis yahge nhoengh zis masyah khyen nhang. Namoq mas hai dvnganh bweh los las namoq gas YHENSAIN namoq Mangso namoq lyis sanh tyamp dah dius nyau mas nyeis uhlyis, ngos namoq lyis khyen nhang cho soh das.

²Nvng yahge nah vnyau vshih jens YHENSAIN jyank tauh los las, khvnyhik ngos namoq lyis dyei nyeis, nyah tying dang lyis ehnyet nhaiqlom dvnganh yah domsyos gyo lyis gas,

³YHENSAIN, nah Mangso nvng lyis nhaiqnyen das. Nyang nvng lyis sanh tyamp dah dius nyau masyah doms shwih tauh los las nvng lyis nyeisgis yap doms lhoq nhang das.

⁴Nyeisjvng we thank vthunk mas sanh tyamp zis xauh laus eq YHENSAIN, nah Mangso nvng lyis hou mhayah dvgeh tsainh las shwih tauh los das.

⁵Nah phauh thyeih moq nyeis khoq dah mau vso doms xauh sain das. Nyang nvng lyis nah phauh thyeih moq thoq lyis nyeis gis nhang lha zes jebais los nhang das.

⁶YHENSAIN, nah Mangso ka nvng yahge nah vnyau vshih lyis domsyos gyo das nhaiqlom dyei das. Housoeh nvng gas nyang lyis nah nhaiqlom dvnganh yah jyet zis yah hauh mau mas tsoq nyeis das.

⁷Nyang hai nhoengh zis dvnganh, nvng lyis hoeng lha zaiq dah nah jeswus shot pheh lhaiq kat das.

⁸Housoeh nvng gas nyah domsyos doms gyo las khvnyhik ngos namoq lyis dyei nyeis dah nyah tying dang dvnganh lyis chank kuot das.

⁹YHENSAIN ka nvng kuot cho dvnganh yvmas ung nhang das. Nvng loshang nyoshoq bos das. Gaunyhauq nyoshoq je los das, nah maunyeis gas jyo nyau shih nyau vboms vbeq thuq los dyei das. YHENSAIN ka nah phauh thyeih moq lyis nyeisgis shoq kuot dyei yvmas gauslaus teh nvng lyis nyeisgis shoq kuot dyei yvmas eq gauslaus.

¹⁰Nghuot laus eq nvng nyah domsyos gyo chah. Nyang jyauh cho lhaih toh haih sauh buk mas lhaih toh nyah lyi dvnganh chank kuot chah. Nah nhaiqlom dvnganh yah nyah jyank mas tauh los chah.

¹¹Khvnyhik ngos nvng lyis dyei dah tyingtoh dang gas nah xiklyis nyoshoq ma yau. Nvng ma yoh kuot shoq ma yau.

¹²Hauh zis maukhung mha joq zis ma nghuot. Ngamoq hauh zis xauhgyo las chank kuot das zis maukhung mha hank doq loh las ngamoq jyank mas yoeus lyih dyei das lah, oen ma nyei noh.

¹³Hauh zis thomh thyitvp mas joq zis ma nghuot. Ngamoq hauh zis xauhgyo las chank kuot das zis thomh thyitvp mas hank goeu las hauh zis ngamoq jyank mas chi los dyei das lah, oen ma nyei noh.

¹⁴Hauh dang gas heimha nvng yah dvgeh nghuot, nvng seq, nvng yoh taiq. Housoeh las gvshih nvng hauh yvlyis chank kuot aq.

¹⁵Khvnyhik ngos nvng lyis gis cho, gang cho, kang yahge shei cho dyei, hou mhayah khyen yoeus aq.

¹⁶Khvnyhik ngos nvng lyis dyei, YHENSAIN, nah Mangso dah tyingtoh dang chank, nyang lyis jyet las nyah domsyos gyo, nyah lyi dvnganh chank lyis, nvng nyeisgis las dius nyo dah dius nyau bweh los das. YHENSAIN, nah Mangso eq namoq wvng nyeis bah ge dah mau lyis shvmanh dyei das.

¹⁷Nghuot laus eq nvng domsyos ma gyo, dang gyo das zis ngoek las gohtoeu mangso jens lyis paiq loh lyis gas,

¹⁸gvshih ngos heimha namoq lyis zaih nhang. Yodan lvng goeu las namoq loh nyeis bah ge dah mau mas namoq kang ma xing, dyoqbis tyamp das.

¹⁹Kang dwis cho, shei cho, Mangso dah shvmanh cho yahge Mangso dah nhoengh cho lhyi khyen das xiklyis, ngos maukhung yahge nyeisjvng lyis kanghjyoeng lui las namoq lyis dyei. Kang dwis cho lhyi khyen yoeus geh.

²⁰YHENSAIN namoq Mangso lhyi jyetdap geh, nyah domsyos gyo las nyang lyis lomluk geh. Housoeh lyis namoq yahge namoq dah vnyau vshih jens gas namoq dah phauh thyeih Abraham, Isak, Yakop moq lyis dyei das ge dangthoengh toh dah mau mas kang xing das.