Read Achang LYI 31 Bible Online

LYI 31 - Achang bible

LYI 31

¹Moshe ka Israel dius jens lyis dang tsoq taiq toh.

²Nyang taiq, Ngos gvshih dvxo aiqci zvn bos goeus. Namoq dah uhshe soeu ma thyeh kuot lo. Hauh thoq lyis, YHENSAIN ngos lyis taiq zis gas, Nvng Yodan lvng ma goeu das ge taiq goeus.

³YHENSAIN, nah Mangso nyang namoq xik pheh loh las houmha nyeis dah dius nyau jens lyis mhont das las namoq gas nyamoq mau mas yoh wvng nyeis das. YHENSAIN taiq toh zis yah dvyhangteh, Yoshua gas namoq dah uhshe soeu bweh das.

⁴YHENSAIN ka Amori hwankti Sihon yahge Og moq lyis mhont teh hauh dius jens lyis mhont das. Nyang gas nyamoq lyis eq nyamoq mau lyis mhont tyamp.

⁵YHENSAIN ka namoq lyis nyamoq thoq mas ung nhang das las, namoq gas nyamoq lyis ngos taiq toh zis yah dvyhangteh top kuot chah.

⁶Yom huont las womh ehnyet bos geh, nyamoq lyis vgyuk goh, vdvn goh: YHENSAIN, nah Mangso nyang, nvng yah loh das. Nvng lyis ma toh khoq das, ma doeuh tyamp toh das, ge.

⁷Moshe ka Yoshua lyis khi lha Israel dvnganh dah nyoqlvtjvng mas taiq, Yom huont aq, womh ehnyet bos aq. Nvng gas haih dius jens lyis YHENSAIN ka nyamoq dah phauh thyeih moq lyis dangthoengh toh dah mau mas loh shwih nyeis das soeu nghuot.

⁸YHENSAIN nyang uhshe lha nvng yah loh das. Nvng lyis ma toh khoq das, ma doeuh tyamp toh das, housoeh las nhaiqlom vthank, vchiq, ge.

⁹Moshe ka Mangso dah lyi lhaih las YHENSAIN dah Thanghchvp Kwi zom dah Lewi lo jens phudyei bang yahge Israel uhshe bang lyis kyauh toh.

¹⁰Moshe nyamoq lyis tying toh zis gas, Nyhet zvn thank khanghmuh jyen lhuiq dah zvn jweh los lyis, hau Zvng Pwe mha haih zis kaiq nghap geh.

¹¹YHENSAIN, namoq dah Mangso lhyi paiq das joqyos mas Israel jens los tsain paiq uhlyis haih lyi nyamoq lyis nghap kyoh geh.

¹²Houmha vbusbih, vmesbih, loshang jens, namoq dah wus mas nyeis, lvbaus dvnganh lyis khi tsainh geh. Housoeh yuk khanghmuh hauh zis xauhgyo las, YHENSAIN, namoq dah Mangso lhyi gyukwoms das cho xuq zis yah nyang jyauh cho lhyi lomluk luk yoh chank das.

¹³Heisoeh khyvlyis YHENSAIN, namoq dah Mangso lyi ma xauhgyo ku shih dah namoq dah vnyau vshih jens xauhgyo das. Housoeh nyamoq xuq las Yodan lvng thyitvp, wvng nyeis bah ge dah mau mas nyeis dvchank nyah domsyos gyo das, ge.

¹⁴YHENSAIN Moshe lhyi taiq, Nvng nyangh shoq ma xauh nyeis lo das. Yoshua lyis khi lha zvng mas shwih los aq, ngos nyang lyis taiq shet bah, ge. Moshe yahge Yoshua eq zvng mas loh.

¹⁵YHENSAIN ka nyamoq jyank mas jyommauh punk yah los las zvng khomh thoq mas no joq.

¹⁶YHENSAIN Moshe lhyi taiq, Nvng gas shei lo das. Nvng shei thang lhyi dius jens gas ngos lyis lom ma luk nyamoq yah toh dah thanghchvp thyoq las ngos lyis tyamp khoq zis yah nyamoq wvng loh bah ge dah mau mas dah lvbaus paiq dah mangso lhyi paiq loh das.

¹⁷Hauh zis bweh lyis ngos nyamoq lyis nhaiqyo das. Ngos nyamoq lyis tyamp das las nyamoq dyoqbis das. Nyamoq thoq mas gyukphoh dyoqbis zainsmuh nyoshoq jweh los das las Ngos nyamoq dah Mangso ka nyamoq yah ma nyeis lo yvmvyah haih zis tsain bweh los yvlyis tsain soh das.

¹⁸Nyamoq ma gis zis kuot, gohtoeu mangso jens lyis paiq loh yvmvyah Ngos nyamoq lyis pangh das cho ngoek das.

¹⁹Gvshih hai chunghthwe lhaih toh geh. Haih zis Israel dius jens lyis jyauh geh. Hauh zis nyamoq lyis tyi dah kanghjyoeng duot bas jungh.

²⁰Ngos nyamoq dah phauh thyeih moq lyis dangthoengh toh zis yah dvyhangteh gis las nyeis coeu bos dah mau mas nyamoq lyis shwih loh das. Houmha nyamoq o dah zonoms dvnganh yoh das, nyamoq houmha nyeisgis das. Nghuot laus eq nyamoq nungs doms las gohtoeu mangso jens lyis paiq loh das. Nyamoq ngos lyis peq las ngah thanghchvp thyoq das.

²¹Gyukphoh dyoqbis zainsmuh nyoshoq nyamoq thoq mas jweh das. Nghuot laus eq haih chunghthwe ka nyamoq chungh nyeis shih las hauh zis nyamoq lyis tyi dah kanghjyoeng duot das. Ngos nyamoq lyis dyei das oen dangthoengh toh dah mau mas ma shwih loh shih, gvshih yangh ngos nyamoq cha nghamh zis seq, ge.

²²Housoeh Moshe ka hauh nyeih lyis hai chunghthwe lhaih las Israel jens lyis jyauh.

²³Hauh thang lhyi YHENSAIN ka Nun lo Yoshua lyis jis las taiq, yom huont aq, womh ehnyet bos aq, nvng Israel jens lyis ngos nyamoq lyis dangthoengh toh dah mau mas shwih wvng das. Ngos nvng yah nghuot das, ge.

²⁴Moshe ka Mangso dah lyi lyis chah ma nyhet toh lo maussauh buk mas vlhomuh lhaih toh.

²⁵Dye lhaih lyis nyang YHENSAIN dah Thanghchvp Kwi lhyi yvwons yoeus dah Lewi phudyei bang lyis taiq toh zis gas,

²⁶hai Mangso dah lyi maussauh lyis yoeus las YHENSAIN, namoq dah Mangso dah Thanghchvp Kwi vyvm mas toh aq. Housoeh houka nyah dius jens lyis tyi dah kanghjyoeng khyvlyis houmha joq das.

²⁷Ngos nyamoq nhaiqlom kha iq than cho, gomloeus kha iq toq cho seq. Nyamoq ngah zaih lyis YHENSAIN lhyi gomloeus toq goeus. Ngos shei thang lhyi nyamoq hauh thoq lyis toq shih das.

²⁸Namoq vkoq uhshe bang, zau jens dvnganh lyis ngah xikkhonh mas khi tsainh dyei geh, housoeh ngos nyamoq lyis haih zis yoh taiq das. Ngos maukhung nyeisjvng lyis lui zis yah ngos nyamoq lyis tyi dah kanghjyoeng yoh toh das.

²⁹Ngos shei thang lhyi dius jens gas lhung los las ngos nyamoq lyis jyauh cho lhyi ngoek tyamp das yvlyis ngos seq. Jweh los das shishenh lyis nyamoq dyoqbis zainsmuh xauh das. Khasoeh ge lyis nyamoq YHENSAIN tung toh yvlyis kuot zis yah nyang lyis nhaiqyo nhang, ge.

³⁰Hauh thang lhyi Moshe ka Israel jens dvnganh gyo nyeis uhlyis hau chunghthwe dvnganh dye shoq taiq.