Read Achang LYI 32 Bible Online

LYI 32 - Achang bible

LYI 32

¹Maukhung yahge nyeisjvng eh, ngah dang xauhgyo aq. Ngos taiq yvlyis kamp gyo aq.

²Ngos jyauh zis mauzoq teh gyoh las nyeisjvng mas jyweh teh bweh joq. Ngah dang gas mhanh lo zains thoq mas wus dah mau yahge mhanh noeuh thoq mas mau nhamh wus teh gyoh das.

³Ngos YHENSAIN nyings lyis chungh das, nyah dius jens gas nyah kuhxing cho lhyi taiq das.

⁴YHENSAIN ka nvng lyis khomp dyei dah Yomzains nghuot, nyah cho dvnganh mas dyinghjet las lyi jus. Nah Mangso ka lomluk las jyoengh; nyang gas jus las lyi bos zis kuot.

⁵Nghuot laus eq namoq gas lom ma luk, nyah dius[9] bweh das zis ma mon, yaunos bos, mhuih dah dius nyau nghuot.

⁶Joeui ma bos dah koh bang eh, YHENSAIN lhyi heisoeh tauh das lhyeh? Nyang gas nah Uwus, nvng lyis gvnkhanh dah Soeu nghuot; nvng lyis dius dvnyau kuot toh.

⁷Lai loh goeus gohlhain shishenh lyis nghamh yoeuh aq, cha bweh khoq yvlyis taiq kyoh aq, oen nah nyhiphoq lyis nyei aq. Xikpheh cha bweh khoq zis taiq kyoh aq, oen dius cauh jens lyis nyei aq.

⁸Nyhang thank Soeu ka dius nyau jens lyis nyamoq dah mau dyei; nyang dius jens khamha nyeis chah cho thyet dyei. Dius nyau khanghmuh lyis maukyo toh dyei.

⁹Nghuot laus eq nyang Yakop dah vnyau vshih lyis nyah xiklyis khyen yoeus.

¹⁰Nyang nyamoq lyis kyuk joqyos, jyamhjyuklhyuk lyeis muot dah mhanhdyvp mas whang yenh yvlyis nyvng. Nyang nyamoq lyis nyah gungs lyis gos teh gos las loqzamh zwi dyei.

¹¹Zonsmuh gas nyah nghoq lo jens lyis dang jyauh das nyhenshang nyah dung tyo zis yah xwih tsainh lho lha nyah dungs thoq mas kih las shwih teh, YHENSAIN ka Israel jens lyis ma dyetgyoh nhang gomh toh.

¹²Lvbaus mangso pangh zis ma bos, YHENSAIN dvyuk kyingh nyah dius jens lyis choshe los.

¹³Nyang nyamoq lyis jing nyhang mha guon nhang, nyamoq pa mha yuk zis tsain zo. Nyamoq luk-uk mas dyoyhei xo nyvng, lukjvp yos mas dah tsanlun zains jens eq lho lho nghuot.

¹⁴Nyamoq dah noeu yahge shvbeq jens nauh nyoshoq dyei. Nyamoq gis thank yvng, shvbeq yahge noeu tsain yoh. Gis thank sunghso, yahge gis thank zvbiq yoh.

¹⁵YHENSAIN dah dius jens gas dis los, nghuot laus eq gomloeus toq. Nyamoq gas zonoms yah coeu lha thoeu goeus. Nyamoq lyis gvnkhanh Mangso lhyi tyamp las, nyamoq dah yomzains khyuot yoeus Soeu lhyi peq tyamp.

¹⁶Nyamoq dah phvra yah YHENSAIN lhyi noh nhang. Nyamoq ma gis zis kuot las nyang lyis nhaiqyo nhang.

¹⁷Nyamoq phauh thyeih moq ma seq ku, Israel jens khanhamp eq domsyos ma gyo ku dah mangso vsaiq, vgyingh ma nghuot dah mangso jens lyis nyamoq lomhxangh tsain lainh.

¹⁸Nyamoq gas nyamoq lyis kang dyei soeu, nyamoq dah yomzains khyuot yoeus soeu, Mangso lhyi tohnyhik.

¹⁹YHENSAIN haih zis nyvng lyis nyang nhaiqyo las nyah loloeu lonyi jens lyis peq tyamp.

²⁰Nyang taiq, Ngos nyamoq lyis ma pangh lo das, housoeh lyis hau ehnyet than lha lom ma luk dah dius jens cha bweh das zis ngos nyvng das.

²¹Mangso gyingh ma nghuot, nyamoq mangso ge dah phvra yah ngos lyis nhaiqyo nhang goeus, ngos lyis noh nhang goeus. Housoeh las ngos dius dvnyau ma nghuot bang lyis yhung lha nyamoq lyis nhaiqyo nhang das. Koh dah dius nyau lyis yhung lha nyamoq lyis noh nhang das.

²²Ngos nhaiqyo zis gas nyilhyam soeh thuq las nyeisjvng mas vyhang dvnganh ngeh tyamp das. Houka mungkvn nyhen kant mha duons las boms jens dah vnyet ngeh jom tyamp das.

²³Ngos nyamoq thoq mas ma thank lo dah dyoqbis zainsmuh she kat das. Ngah nyo dvnganh nyamoq lyis tyi lha yhung das.

²⁴Nyamoq gas yuot shet, nos thyoh las shei das. Nyamoq gyukphoh noslom yah shei das. Ngos nyamoq lyis yewus lyis yah thyoq nhang das, duk bos lhangnyis yah chweh nhang das.

²⁵Moeng dyoq zis gas wus vkhau cho mha shei cho she los das. Yhen khau mha gyukphoh zis zangh los das. Wotyamh loloeu eq, lonyi eq shei das. Nauhnoeuh eq lokhoq eq ma nyhet toh lo.

²⁶Ngos nyamoq lyis shank shoq mhont das las nyamoq lyis hank ma soh lo das.

²⁷Nghuot laus eq nyamoq dah jeswus lyis, nyamoq ngah dius jens lyis ung goeus ge ma moengs nhang das. Hauh zis gas ngvnyang dvthungh thyi tyamp.

²⁸Israel jens gas nghamh cho ma bos, joeui ma bos dah dius nyau nghuot.

²⁹Nyamoq chamus somh zis ma yoeuh; nyamoq khasoeh mus zis ma yoh seqgyo, ge.

³⁰Dius dvkhyoengh lyis chamus dvyuk yah ung khoq? Dvmons lyis Aiq yuk yah kyingh khasoeh ung khoq lah? YHENSAIN, nyamoq dah Mangso nyamoq lyis tyamp goeus. Nyamoq dah yomzains Mangso nyamoq lyis toh tyamp goeus.

³¹Nyamoq dah jeswus jens gas nyamoq dah mangso jens gas Israel dah yomzains Mangso teh yom ma bos, yomnhuk zis nyamoq seq, ge.

³²Nyamoq dah jeswus gas Sodom yahge Gomora teh dyoqbis das. Nyamoq dah jeswus gas khoh dah vshih shih las duk bos zvbiq shih shih dah zvbiq nwis teh nghuot.

³³Hauh zvbiq gas lhangnyis duk masyah kuot dah zvbiq teh nghuot.

³⁴YHENSAIN ka nyamoq dah jeswus khasoeh kuot toh zis soh. Nyang gas nyamoq lyis joeng das shishenh lyis langh nyeis.

³⁵YHENSAIN nyamoq lyis lvto phuk las joeng das. Nyamoq gyoh das shishenh jweh das. Nyamoq jom das buisnyeis ni goeus.

³⁶YHENSAIN ka nyah dius jens yom thank goeus yvlyis nyvng lyis nyamoq lyis khyuot yoeus das. Nyang lyis phuqsoe bang mvshoh jyen bweh nyeis yvlyis nyvng lyis nyamoq lyis nhaiqnyen das.

³⁷Housoeh YHENSAIN nyah dius jens lyis nyei das zis gas, Namoq loms toh dah yomzains mangso jens gas khapheh loh goeus?

³⁸Nvng nyamoq lyis phudyei coeu yah nyhuk toh, shuk das xiklyis zvbiq dyei. Gvshih nyamoq lyis los las pangh nhang aq, nyamoq lyis los wuih khyuot yoeus nhang aq.

³⁹Ngos kyingh Mangso nghuot, gohtoeu mangso ka ma gyingh. Ngos gas sat, kang dwis nhang, Dvmtap, yhoh, soeu nghuot. Ngos kuot yvlyis loqyom hank ma yoh tyonh.

⁴⁰Ngos gas vcaiq vto dwis nyeis Mangso nghuot. Ngos ngah loq toeu lha nyhen,

⁴¹Ngos ngah moengsa ying ying swih das, ngah lyi bos cho kuot goeus yvlyis nyvng das. Ngos ngah jeswus lyis lvto phuk das, ngos lyis hoeng bang lyis joeng das.

⁴²Ngah nyo lyis nyamoq suih yah nghop das. Ngah moengsa ka ngos lyis loqyom tyonh bang dvnganh lyis sat das. Ngos lyis zan bang hank lyis eq ma toh das, dvmdap bang yahge jons loh bang yangh shei das.

⁴³Dius nyau jens eh, namoq gas YHENSAIN dah dius jens lyis chungh chah nyang gas nyamoq lyis sat bang dvnganh lyis joeng. Nyah jeswus lyis lvto phuk las nyah dius jens dah yaunos lyis khyuot dyei.

⁴⁴Moshe yahge Nun lo Yoshua gas Israel dius jens xauhgyo das nyhenshang haih chunghthwe taiq kyoh.

⁴⁵Moshe dius jens lyis Mangso dah jyauh dang dye dyei lyis,

⁴⁶nyang taiq, Khvnyhik ngos namoq lyis dyei, hai tying dang dvnganh chank kuot das zis zaih nyeis geh. Namoq dah lo jens eq Mangso dah jyauh cho dvnganh lyis lomluk luk chank kuot bas jungh, hauh zis puk las puk las taiq geh.

⁴⁷Haih jyauh cho ka vjyuk ma bos dang ma nghuot, houka namoq kang nghuot. Namoq hauh zis chank kuot nyeis lyis namoq Yodan lvng thyitvp pheh loh nyeis bah ge mau mas nyangh nyangh xauh nyeis das, ge.

⁴⁸Hauh nyeih lyis, YHENSAIN Moshe lhyi taiq,

⁴⁹Yerikho wus twi twi Moab mau, Abarim boms mas loh aq. Nebo boms mas doq las, ngos Israel jens lyis dyei bah oen dah Khanan mau lyis yoeuh kat aq.

⁵⁰Nah vmang Aron gas Hor boms mas shei zis yah dvyhangteh, nvng hauh boms mas shei das.

⁵¹Khasoeh ge lyis nah aiq yuk gonh Israel jens xikkhonh mas ngos lyis lom ma luk. Zin mhanhdyvp, Kadesh wus nvm, Meriba jeislvng mas uhlyis nvng ngos lyis dius jens xikkhonh mas ma phauh ma nyang kuot.

⁵²Ngos Israel jens lyis dyei nyeis dah mau mas nvng ma xauh wvng das laus eq nvng we masyah hauh yvlyis yoeuh toh aq, ge.