Read Achang LYI 33 Bible Online

LYI 33 - Achang bible

LYI 33

¹Heika Mangso dah dius Moshe, nyang ma shei shih lyis Israel jens thoq mas taiq hoeuh dah shvmanh nghuot.

²Nyang taiq, YHENSAIN ka Sina boms masyah los. Nyang gas Edom thoq mas buis canh los teh toq los las Paran boms masyah nyah dius jens thoq mas pank dyei. Loeuswons bang dvmons nyang yah los. Nyah loqyos loq mas nyiduk chi toh.[10]

³YHENSAIN ka nyah dius lyis jyet las nyang yah sen bang lyis gomh dyei. Housoeh ngamoq nyah khyeiyang mas dupaiq las nyang tyingtoh dang lyis chank kuot. [11]

⁴Ngamoq gas Moshe ngamoq lyis dyei dah lyi lyis tsain chank kuot, hauh zis ngamoq dius nyau sain dah vso zisyos nghuot.

⁵YHENSAIN ka nyah dius Israel jens nyamoq vkoq jens yahge uhshe bang dvgeh huom uhlyis nyamoq dah hwankti bweh los.

⁶Moshe ka Ruben vkoq cho taiq: Ruben dius jens nain laus eq ma shei jom bas jungh.

⁷Nyang Yuda vkoq cho taiq: YHENSAIN eh, nyamoq pangh das cho dung yvlyis gyo dyei aq. Nyang lyis gohkoq jens yah doms xonh nhang aq. YHENSAIN eh, nyamoq xiklyis jeszan dyei aq. Nyamoq dah jeswus jens lyis zan yvmas pangh aq.

⁸Nyang Lewi vkoq cho taiq: YHENSAIN eh, nah ehnyet nghuot cho lhyi nah lomluk jyeidwis Lewi jens lyis yah Urim yahge Thumim masyah chixoeuq aq. Nvng hauh yvlyis Masa mas shi yoeuh las, Meriba jeis mas jyoeng yvlyis kyink thuq kat goeus.

⁹Nyamoq gas nyamoq dah ungwes uwus, vmang vnoeuh yahge lo jens lyis dang jings thoq lyis nvng lyis dang zes jings cho chixoeuq goeus. Nyamoq gas nvng tyingtoh zis chank kuot, nah thanghchvp lyis lomluk luk tyink goeus.

¹⁰Nyamoq gas nah dius jens lyis nah lyi chank das zis jyauh das. Nyamoq nah phon mha phudyei das.

¹¹YHENSAIN eh, nyamoq vkoq yombos los shoq pangh aq. Nyamoq kuot cho lhyi nhaiqdoeus dyei aq, nyamoq dah jeswus ma doms yoh toq los shoq dvnganh thungh thyi dyei aq.

¹²Nyang Benyamin vkoq cho taiq: Heika YHENSAIN jyet las gomh kat dah vkoq nghuot. Nyang nyamoq lyis dvnyeih gonh zungh dyei, nyang nyamoq vgungs mas nyeis.

¹³Nyang Yosep vkoq cho taiq. YHENSAIN nyamoq dah mau lyis mau wus zis yah eq, nyeis khau mha dah jeis yah eq shvmanh dyei bas jungh.

¹⁴Buis tso zis gas gis thank vshih shih nhang zis yah shvmanh dyei bas jungh. Vyoq yoq gis thank vshih yoh bas jungh.

¹⁵Nyamoq dah jing cauh gas gis thank vshih yah nghop bas jungh.

¹⁶Nyamoq dah mau gas gis dah vyhang dvnganh yah dyingh bas jungh, Mhanhgyomh nyi ngeh nyeis yvmas taiq soeu YHENSAIN dah gis cho yah shvmanh dyei bas jungh. Haih shvmanh gas Yosep dah vkoq mas jweh bas jungh. Khasoeh ge lyis nyang gas nyah vmang vnoeuh moq mas uhshe soeu kuot ku.

¹⁷Yosep gas noeulu dah yom bos, noeuphuk lu dah khyau nghuot. Nyah khyau ka Manase khyoengh khyoengh, Ephraim mons mons nghuot. Hauh zis yah nyang dius nyau jens lyis nyeisjvng vthang mha jweh shoq duon tyamp.

¹⁸Nyang Zebulun yahge Isakha cho taiq: Zebulun gas thomh mas nyamoq dah soenghi kuot yvmas ung bas jungh, yhen mha Isakha dah dis cho je los bas jungh.

¹⁹Nyamoq gas lvbaus lyis nyamoq boms mas yus. Houmha nyamoq dah dan cho lomhxangh dyei. Nyamoq dah dis cho ka thomh masyah eq, thomh jyankyvm chank yah sihmuis masyah eq xauh yoeus.

²⁰Nyang Gad vkoq cho taiq, Nyamoq dah maunyeis kuh kuh kuot dyei dah Mangso lhyi chungh. Gad gas loqyom, nghuot ya uhshoh lang chuiq dyei das ge khangkhyi teh lhom nyeis.

²¹Nyamoq gas nyamoq nyang xiklyis gis thank maunyeis yoeus. Uhshe soeu dah gvmboms nyamoq lyis dyei Israel uhshe bang dvgeh huom uhlyis YHENSAIN dah tying dang yahge lyi tsain chank kuot.

²²Nyang Dan vkoq dah cho taiq. Dan gas khangkhyi kyoh lo nghuot. Nyang Bashan mhayah dyvm thuq los.

²³Nyang Napthali vkoq cho taiq. Napthali gas YHENSAIN dah nhaiqdoeus zis yah shvmanh dyingh dyingh yoh soeu nghuot. Nyamoq dah mau gas Galile thomh mautyi shot pheh jweh.

²⁴Nyang Asher vkoq cho taiq. Asher gas gohkoq jens thoq lyis shvmanh zes yoh. Nyah boekyis jens nyang lyis nhaiqdoeus bas jungh. Nyah mau mas tsanlun zains yah dyingh bas jungh.

²⁵Nyah wus jens gas thyeq khyam khomh yah gos toh bas jungh. Nvng dwis nyeis dvchank yombos bas jungh.

²⁶Israel dius jens eh, nah Mangso teh dah mangso ma bos. Nvng lyis pangh das ge, shoenkkhyi yah jyommauh ji las maukhung thyi vshot masyah los.

²⁷Mangso ka nvng lyis vjangh khomp toh. Nyah dah vcaiq vto loqyom gas nvng lyis thuk toh. Nvng wvng loh zis yah dvyhangteh nah jeswus jens lyis khat tyamp, hauh bang dvnganh lyis mhont tyamp das xiklyis taiq toh.

²⁸Housoeh las Yakop dah vshih jens eh, maukhung mha dah jyweh nyeisjvng lyis jyweq nhang lha, jyo yahge zvbiq dyingh shoq yoh dah mau mas nyenstap zis yah gau gau nyeis geh.

²⁹Israel eh, nvng kha iq pyo! YHENSAIN khyuot yoeus dah dius nyau, nvng yah doeus zis hank ma bos. YHENSAIN nyang nah gos, nah moengsa duot las nvng lyis khomp dyei, ung los nhang. Nah jeswus jens nvng lyis nhaiqnyen aq ge los dung das laus eq nvng gas nyamoq lyis doq nang khyoq das, ge.