Read Achang LYI 34 Bible Online

LYI 34 - Achang bible

LYI 34

¹Moshe ka Moab pa mhayah, Yerikho wus buisthuq pheh Pisga boms thyoh mas dah Nebo boms mas doq loh. Houmha YHENSAIN ka dvmau gonh chixoeuq. Gilead mau lyis mautsung pheh Dan wus jweh shoq,

²Napthali mau dvnganh; Ephraim mau yahge Manase mau; Yuda mau buiswvng pheh Mediteranean Thomh jweh shoq;

³Mautyi pheh Yuda vchink; Zoar wus masyah Yerikho jweh dah pazoe, Dyoms zains wus, tsain nghuot.

⁴Hauh thang lhyi YHENSAIN Moshe lhyi taiq, Heika ngos Abraham, Isak, Yakop moq lyis nyamoq dah vnyau vshih lyis dyei das oen dangthoengh toh dah mau nghuot. Ngos nvng lyis yoeuh nhang. Nghuot laus eq ngos nvng lyis thyimha ma loh nhang, ge.

⁵Housoeh las YHENSAIN dah dang vgus, YHENSAIN dah jyeidwis Moshe ka Moab mau mas shei.

⁶YHENSAIN ka nyang lyis Bet Peor yah twi twi Moab mau langhkhau dvkoeuq mas nyhop. Nghuot laus eq khvnyhik jweh shoq nyang lyis nyhop joqyos lyis top hank ma seq.

⁷Moshe ka nyang shei uhlyis nyenhkyi dvxo aiqci zvn nghuot. Nyang yombos shih, nyoq eq gis shih.

⁸Israel dius jens gas Moab pa mha Moshe xiklyis somhci nyeih kuk ngaus.

⁹Nun lo Yoshua gas joeui yah dyingh joq: khasoeh ge lyis nyang lyis gyamh huon lha toeuq toh goeus. Israel jens gas Yoshua dah domsyos gyo las Moshe lhyi yah YHENSAIN dyei toh tyingdang lyis tsain chank.

¹⁰Israel mas Moshe teh YHENSAIN yah nyoqnyvng sanghtsuk jis goh dah lvpe khanhamp eq ma thuq los lo.

¹¹YHENSAIN ka Moshe lhyi Egutu hwankti yahge nyah zau jens, nyah mau gonh lyis tyi das zis nhang lha yomsoq muh yahge mauh loqmuh kuot teh gohtoeu lvpe hank eq ma kuot ku.

¹²Israel dvnganh dah nyoqlvtjvng mas Moshe kuot teh kuhxing lha gyukphoh muhzains gohtoeu lvpe jens hank ma yoh kuot.