Read Achang LYI 4 Bible Online

LYI 4 - Achang bible

LYI 4

¹Hauh thang lhyi dius jens lyis Moshe taiq zis gas, Ngos namoq lyis jyauh dah lyi dvnganh lyis domsyos gyo geh. Housoeh namoq gas kang dwis zis yah YHENSAIN namoq dah phauh thyeih moq dah Mangso namoq lyis dyei dah mau mas loh yoh nyeis das.

²Ngos namoq lyis tying toh yvmas cha vlhungh, cha vyoeus tyamp. Ngos namoq lyis dyei toh hau YHENSAIN, namoq dah Mangso tyingtoh dang lyis chank kuot nyeis geh.

³Peor boms mas YHENSAIN cha kuot yvlyis namoq nyang nyvng goeus. Nyang gas houmha Bala lyis paiq soeu khanghmuh lyis mhont tyamp.

⁴Nghuot laus eq YHENSAIN, namoq dah Mangso lhyi lomluk bang namoq gas khvnyhik jweh shoq dwis nyeis shih.

⁵YHENSAIN, ngah Mangso ngos lyis jyauh aq ge taiq toh dah lyi dvnganh ngos namoq lyis jyauh goeus. Namoq loh nyhenh wvng nyeis das mau mas hau lyi chank geh.

⁶Lomluk luk chank nyeis lyis houka namoq kha iq joeui bos zis gohtoeu dius nyau lyis chixoeuq das. Haih lyi dvnganh nyamoq xauhgyo lyis nyamoq gas, Hai kuhxing dah dius nyau gas joeui yahge seqgyo cho bos, ge das.

⁷YHENSAIN, yah Mangso ka yang yah ni nyeis teh, gohtoeu dius nyau zainsmuh mas nyamoq chah nyeis uhlyis ni nyeis dah mangso bos lah? Nyang gas yang pangh cho dung khanghmuh toeuh dyei.

⁸Khvnyhik ngos namoq lyis jyauh dah lyi teh dan dah lyi yoh zis khah dius nyau zainsmuh bos lah?

⁹Nvnyang nyoqjeih yah nyvng yvlyis nvng dwis nyeis dvchank ma tohnyhik das zis zaih nyeis aq. Hauh zis nah lo jens nyei jens lyis taiq aq.

¹⁰Houka namoq hau Sina boms[2] mas YHENSAIN, namoq dah Mangso xikkhonh mas yap nyeih lyis, nyang ngos lyis taiq. Dius jens lyis huom nhang geh, ngos taiq das dang nyamoq lyis xauhgyo nhang mes. Nyamoq dwis nyeis dvchank nyamoq ngah domsyos gyo xuq das. Housoeh nyamoq eq nyamoq lo jens lyis housoeh vgus jyauh das.

¹¹Nyilhyam maukhung lhyi thuk toh las dop dop noq dah nyikhauh, jyommauh bungh yah nghop toh dah boms khyei mha namoq khasoeh loh yap cho namoq lo jens lyis taiq kyoh geh.

¹²Hauh nyi masyah YHENSAIN namoq lyis khasoeh taiq, Nyang taiq thwe namoq khasoeh xauhgyo, nghuot laus eq nyang lyis chah vzwvng khyvlyis eq ma nyvng cho nyamoq lyis taiq kyoh geh.

¹³Yhensain ka namoq yah toh dah thanghchvp cho taiq kyoh. Houka tying toh lyi dvci nghuot. Namoq hau lyi chank nyeis das xiklyis taiq toh. Hauh thang lhyi nyang hauh zis luk aiq lhywaq mas lhaih toh.

¹⁴Namoq loh nyhenh wvng nyeis bah ge mau mas chank das xiklyis hauh lyi dvnganh namoq lyis jyauh das zis YHENSAIN ngos lyis taiq toh.

¹⁵Sina boms mas, nyi masyah YHENSAIN namoq lyis jis uhlyis namoq chah vzwvng eq ma nyvng. Housoeh las namoq vlhomuh zaih las zungh yoeuh nyeis geh:

¹⁶Phvra lho dvja ja kuot zis yah yaunos vkuot. Vbusbih, vmesbih dah gungsdoeus lho vkuot.

¹⁷Gaunyhauq lho, nghoq lho,

¹⁸du shweh loh ja vlho, oengdoq lho vkuot.

¹⁹Nvng maukhung mha nyvng dah buislom, lhamhmuh, kyi lhyi vpaiq phuqsoe, Hauh zis YHENSAIN, nah Mangso ka dius jens xiklyis dyei toh.

²⁰Nghuot laus eq namoq gas nyang Egutu mau nyi duk nyeis thyeq nyikhyomp masyah she thuq toh bang nghuot. Namoq lyis shwih los zis gas khvnyhik nghuot nyeis zis yah dvyhangteh YHENSAIN ka namoq lyis nyah dius nyau kuot.

²¹Namoq gvng mas YHENSAIN, namoq dah Mangso ka ngos lyis nhaiqyo las, Yodan lvng goeu las YHENSAIN, namoq dah Mangso namoq lyis dyei nyeis, nyeis coeu bos dah mau mas nvng ma xauh loh das, ge maukhi toh.

²²Ngos Yodan lvng khanhamp eq ma goeu, haih mau mas shei das. Nghuot laus eq namoq gas thyitvp pheh nyeis coeu bos mau mas loh nyeis bah ge goeus.

²³Namoq gas YHENSAIN, namoq dah Mangso yah kuot toh dah thanghchvp ma tohnyhik das xiklyis zaih geh. Nyang namoq lyis namoq xiklyis phvra dvja ja vkuot goh ge dah nyah tyingtoh dang lyis domsyos gyo nyeis geh.

²⁴Khasoeh ge lyis YHENSAIN, nah Mangso ka duk nyeis dah nyilhyam teh nghuot, noh dah Mangso nghuot.

²⁵Namoq hauh mau mas nyeis nyangh las lo jens nyei jens bos lyis eq namoq nyang xiklyis dvja ja vzwvng phvra kuot zis yah yaunos vkuot goh. Houka YHENSAIN dah nyoqlvtjvng mas ma gis zis nghuot las houka nyang lyis nhaiqyo nhang.

²⁶Khvnyhik ngos namoq lyis, maukhung nyeisjvng lyis kanghjyoeng toh las taiq zis gas, Namoq ngah domsyos ma gyo lyis gas, namoq hauh mau masyah ma nyangh lyis dyuk loh das. Yodan lvng goeu las loh nyeis das mau mas nyangh shoq ma xauh nyeis das. Namoq shank shoq dyoqbis tyamp das.

²⁷YHENSAIN ka namoq lyis gohtoeu dius nyau jens mas sanh tyo las namoq houmha nainlo kyingh dvnyet das.

²⁸Houmha cangsoeu loq yah kuot, nyoq ma nyvng no ma gyo, ma seq zo, ma seq nam, saiq yah kuot dah mangso, luk yah kuot dah mangso lyis namoq phuqsoe das.

²⁹Houmha YHENSAIN, nah Mangso lhyi, nah ehnyet dvnganh yah xo lhyi nyvng das.

³⁰Nvng yaukyenh uhlyis hauh cho dvnganh thungh phuh goeus, nvng thang thank lyis YHENSAIN jyank tauh los las nyah domsyos gyo lyis gas,

³¹Nyang gas nhaiqnyen dah Mangso nghuot las namoq lyis ma tyamp das, ma mhont das, namoq dah phauh thyeih moq yah toh dah thanghchvp eq ma tohnyhik das.

³²Lai loh goeus shishenh namoq ma bos shih caiq masyah nyeisjvng thoq mas Mangso dius lyis gvnkhanh buisnyeis jweh shoq xo yoeuh geh, nyeisjvng gonh xo yoeuh geh. Xik pheh hei iq kuhxing dah muh vbweh yoeuh lah? Heisoeh teh loeus vxauhgyo yoeuh goh lah?

³³Nyi masyah Mangso nyamoq lyis taiq zis xauhgyo thang lhyi namoq teh dwis nyeis zis hank bos lah?

³⁴YHENSAIN, namoq dah Mangso ka Egutu mas namoq lyis gohtoeu dius dvnyau masyah yoeus las nyah dius nyau kuot teh, hank mangso loh womh kuot? Namoq dah nyoqlvtjvng mas nyang nyah kuhxing yomsoq yahge yom yhung lha yomh eq, jeszan cho eq she los. Yomsoq muh, mauh loqmuh kuot, gyukphoh zis bweh nhang.

³⁵YHENSAIN ka haih zis chixoeuq zis yah nyang kyingh Mangso nghuot las gohtoeu hank ma bos lo cho nvng lyis kyink xoeuq.

³⁶Namoq lyis cho yoh shet das zis maukhung mhayah nyah thwe namoq lyis xauhgyo nhang. Hai nyeisjvng mas eq nyah gyingshang nyi namoq lyis nyvng nhang, nyang hou mhayah namoq lyis jis.

³⁷Nyang nah phauh thyeih moq lyis jyetdap yvmvyah namoq lyis khyen yoeus las nyah kuhxing yomsoq yah namoq lyis Egutu masyah shwih thuq los.

³⁸Namoq loh zis yah dvyhangteh namoq thoq lyis zes nyo las yomsoq zes bos dah dius nyau lyis nyang khat tyamp. Housoeh nyang namoq lyis houmha shwih wvng las nyamoq dah mau namoq lyis dyei. Hauh zis namoq yah sen joq shih.

³⁹Housoeh las YHENSAIN ka maukhung mha eq nyeisjvng thoq mas eq Mangso nghuot yvlyis khvnyhik soh las khanhamp eq vtohnyhik. Gohtoeu mangso ma bos lo.

⁴⁰Nvng yahge nah vnyau vshih nyeisgis yaplhoq das xiklyis khvnyhik ngos namoq lyis dyei dah nyah lyi chank geh. YHENSAIN, nah Mangso namoq xiklyis vcaiq vto dyei toh mau mas yoh tsoq nyeis das, ge.

⁴¹Hauh thang lhyi Moshe ka Yodan lvng buisthuq pheh somh wus toeuq toh.

⁴²Houka dius dvyuk nyah jeswus ma nghuot soeu dvyuk yuk lyis zangh sat lyis yoh phang khau das. Nyang hau dvwus wus mas phang khau luiq las nyang sat zis ma xauh das.

⁴³Ruben vkoq xiklyis mhanhdyvp janggyon mas Bezer wus; Gad vkoq xiklyis Gilead maunyeis Ramot wus; Manase vkoq xiklyis Bashan maunyeis mas Golan wus tsain nghuot.

⁴⁴Moshe ka Israel jens lyis Mangso dah lyi yahge jyauh cho dyei.

⁴⁵Heika nyamoq Egutu masyah thuq los thang lhyi, Bet Peor wus yah twi twi, Yodan lvng buisthuq tvp langhkhau mha nyeis uhlyis nyang nyamoq lyis haih lyi dyei. Haih maunyeis gas Heshbon wus mas guon khoq dah Amori hwankti Sihon yah sen. Moshe yahge Israel jens Egutu masyah doq los yoq lyis nyang lyis ung.

⁴⁶

⁴⁷Nyamoq gas nyah maunyeis mas eq Yodan lvng buisthuq tvp gohtoeu Amori hwankti, Bashan mas Og dah maunyeis mas eq tsain nyeis.

⁴⁸Hauh mau gas Arnon lvng thang Aroer wus masyah mautsung pheh doq las Hermon boms ge dah Sirion boms jweh shoq dvm.

⁴⁹Hauh yvmas Yodan lvng buisthuq shot jangpa dvnganh, mautyi pheh Coh Thomh janggyon, buisthuq pheh Pisga boms khyei jweh shoq bos.