Read Achang LYI 5 Bible Online

LYI 5 - Achang bible

LYI 5

¹Moshe Israel jens dvnganh lyis khi tsainh las taiq zis gas, Israel dius jens eh, khvnyhik ngos namoq lyis dyei dah lyi dvnganh lyis gyo yoeus geh. Hauh yvlyis xuq las vlhomuh chank geh.

²YHENSAIN, yah Mangso ka Sina boms mas thanghchvp toh.

³Hauh zis yah uwus moq yah kyingh toh zis ma nghuot, yang khvnyhik kang dwis nyeis bang dvnganhmoq yah eq toh.

⁴Hauh boms mas YHENSAIN ka nyi masyah namoq lyis nhuottsuk taiq goeus.

⁵Hauh shishenh lyis ngos gas YHENSAIN cha taiq zis namoq lyis taiq kyoh das zis nyang yahge namoq dah jo mas yap joq. Namoq gas hauh nyi lyis gyuk yvmvyah boms mas ma womh doq loh. YHENSAIN taiq.

⁶Ngos gas, namoq jons duot nyeis dah Egutu masyah khyuot shwih los, YHENSAIN, namoq dah Mangso nghuot.

⁷Ngos mas lai las gohtoeu mangso lhyi vpaiq.

⁸Nvng nah xiklyis maukhung thoq, nyeisjvng thoq, nyeisjvng khau jeis mas nyeis dah vyhang yah gungslho vkuot.

⁹Nvng phvra lyis gop las vpaiq: khasoeh ge lyis ngos YHENSAIN, nah Mangso nghuot las ngos yah byi zis ma gis bos. Ngos lyis hoeng bang thoq mas nyamoq dah vnyau vshih somh caiq nyei caiq jweh shoq joeng cho she kat.

¹⁰Nghuot laus eq ngos lyis jyet las ngah lyi chank bang lyis gas vkhyoengh vmons caiq jweh shoq ngos jyetdap cho chixoeuq.

¹¹Ngah nyings lyis ma gis dah nghamh toeuq yvmas vyhung: khasoeh ge lyis ngos YHENSAIN, nah Mangso ka ngah nyings lyis ma jus khyvlyis yhung soeu hank lyis laus eq joeng das.

¹²Ngos YHENSAIN, nah Mangso, nvng lyis tying toh zis yah dvyhangteh, No nyeih lyis gyingshang nhang das zis soh aq.

¹³Nvng nah muh zwi khank das zis khyuk nyeih yoh.

¹⁴Nyhet vnyeih gas No nyeih nghuot las ngos lyis kyauh chah. Hauh nyeih lyis hank eq muh ma gis zwi, nvng eq, nah lo jens, nah jons jens, nah gaunyhauq, nah mau mas nyeis dah lvbaus eq muh ma gis zwi.

¹⁵Nvng Egutu mas jons mus ku zis eq, ngos, YHENSAIN, nah Mangso ka kuhxing yomsoq yahge yom yah nvng lyis hauh mau masyah khyuot shwih los cho eq soh aq. Housoeh yvmvyah ngos nvng lyis No nyeih lyis soh das zis tying toh.

¹⁶Ngos, YHENSAIN, nah Mangso tying toh zis yah dvyhangteh nah ungwes uwus lyis phauh nyang aq. Housoeh lyis ngos nvng lyis dyei nyeis mau mas nyeisgis yaplhoq zis yah kang xing das.

¹⁷Dius vsat.

¹⁸Nyi shuot lvng vshuot.

²⁰Nah yhenkyoh lyis ma ying kanghjyoeng vkat.

²¹Gohyuk dah yhensain nyhiq lyis v-omes. Nyah yhen, nyah maunyeis, nyah jons jens, nyah noeu, nyah mauhlyihzoe, nyang sain dah vyhang cha lhyi eq v-omes, ge.

²²Heika namoq hau boms mas huom uhlyis YHENSAIN namoq dvnganhmoq lyis dyei dah tyingtoh dang nghuot. Jyommauh punk khau, nyi masyah thwe zainsmuh yah taiq yoq lyis haih tyingtoh dang dyei, gohtoeu ma bos lo. Hauh thang lhyi nyang luk aiq lhywaq mas lhaih las hauh zis ngos lyis kyauh kat.

²³Hau dvboms gonh nyi ngeh nyeis lyis soeng soeng noq masyah namoq thwe xauhgyo. Namoq vkoq jens dah wus nhaiqbos jens yahge uhshe bang ngah jyank mas los.

²⁴Nyamoq taiq zis gas, YHENSAIN, yah Mangso ka yang nyi masyah nyah thwe xauhgyo uhlyis nyah phunk yahge nyah kuhxing cho yang lyis chixoeuq. Mangso dius yah jisgoh laus eq nyamoq dwis nyeis zis khvnyhik ngamoq nyvng goeus.

²⁵Nghuot laus eq gvshih ngamoq shei das. Hau gyukphoh nyi ngamoq lyis mhont das. YHENSAIN, ngamoq dah Mangso taiq zis doms xauhgyo lyis ngamoq jyoengh shei das.

²⁶Nyi masyah dwis nyeis Mangso taiq thwe xauhgyo thang lhyi yoh dwis nyeis dah cangsoeu hank bos ku lah?

²⁷Moshe eh, nvng doms loh las YHENSAIN, yah Mangso taiq zis dvnganh gyo aq. Hauh thang lhyi tauh los las nyang nvng lyis cha taiq zis ngamoq lyis taiq kyoh aq, ngamoq gyo las chank kuot das, ge.

²⁸YHENSAIN haih zis xauhgyo lyis, nyang ngos lyis taiq. Haih dius jens taiq zis ngos xauhgyo goeus. Nyamoq taiq zis jus.

²⁹Nyamoq ehnyet ngos lyis vjangh phauh nyang nhang mes ngos tyingtoh dang vjangh chank kuot nhang mes. Housoeh lyis nyamoq eq nyamoq lo jens eq vcaiq caiq nyeisgis yaplhoq das.

³⁰Nyamoq lyis nyamoq zvng mas tauh loh geh, oen e taiq aq.

³¹Nghuot laus eq Moshe eh, nvng gas heimha ngos yah nyeis aq. Ngos nvng lyis ngah lyi yahge tyingtoh dang dvnganh dyei bah. Haih zis dius jens lyis jyauh aq. Housoeh lyis ngos nyamoq lyis dyei dah mau mas hauh zis yoh chank das, ge.

³²Israel dius jens eh, YHENSAIN, namoq dah Mangso namoq lyis tyingtoh cho dvnganh vlhomuh chank geh. Haih nyah lyi ma chank zis dvkoeuq eq vtoh.

³³Hau dvnganh chank nyeis lyis namoq loh sain nyeis das mau mas, namoq nyeisgis yaplhoq zis yah yoh tsoq nyeis das.