Read Achang LYI 9 Bible Online

LYI 9 - Achang bible

LYI 9

¹Israel jens eh, gyo geh! Namoq thoq lyis zes kuhxing lha yomsoq zes bos dah dius nyau yah sen dah mau mas loh nyeis das xiklyis khvnyhik namoq Yodan lvng goeu bah ge. Nyamoq dah wus jens gas kuh las maukhung thuk dah ciank ci toh.

²Houmha dius jens gas nyhang lha yombos; nyamoq gas dam dius nghuot las, nyamoq yah tyi lha hank ma yoh yap, ge taiq goh zis namoq xauhgyo ku.

³Nghuot laus eq YHENSAIN, namoq dah Mangso ka namoq xik mas ngeh dah nyi teh loh das yvlyis gvshih namoq nyang nyvng das. Namoq jweh zis yah dvyhangteh nyang nyamoq lyis ung lha, nyang dangthoengh toh vgus, nvng nyamoq lyis khat thuq zis yah lvnyap yoh mhont das.

⁴YHENSAIN, nah Mangso nah xiklyis nyamoq lyis khat thuq dyei thang lhyi, namoq mon-yih yvmvyah nyang ngamoq lyis haih mau mas shwih wvng las sain nhang oen vnghamh zo. YHENSAIN namoq xiklyis haih dius jens lyis khat tyamp dyei zis gas, nyamoq lhung yvmvyah dvnghuot.

⁵YHENSAIN namoq lyis nyamoq dah mau yoeus nhang zis gas namoq gis, jus zis kuot yvmvyah ma nghuot. Nyamoq lhung yvmvyah eq, Nyang namoq dah phauh thyeih Abraham, Isak, Yakop moq lyis toh dah dangthoengh tyink das ge toeuq yvmvyah eq nyamoq lyis dvkhat thuq das.

⁶YHENSAIN hai gis dah mau nvng lyis dyei zis gas, nvng mon yvmvyah ma nghuot yvlyis seq toh aq: namoq gas nhaiqlom than dah dius jens nghuot.

⁷Nvng YHENSAIN, nah Mangso lhyi mhanhdyvp mas khasoeh nhaiqyo nhang yvlyis khanhamp eq vtohnyhik. Egutu masyah thuq buisnyeis masyah haih joqyos mas jweh los shoq nyang lyis namoq gomloeus toq.

⁸Sina boms mas yangh namoq YHENSAIN lhyi nhaiqyo nhang. Nyang namoq lyis mhont das shoq nhaiqyo goeus.

⁹YHENSAIN namoq yah toh dah thanghchvp lhaih dah luk lhywaq tsain lhom yoeus das xiklyis ngos boms mas doq loh. Houmha ngos cha eq ma zo ma shuk nyeici nyeih nyeici nyens nyeis.

¹⁰Hauh thang lhyi hau boms mas namoq huom dah nyeih lyis, YHENSAIN ka nyi masyah namoq lyis taiq dah dang, hau luk aiq lhywaq mas nyah loq yah lhaih zis ngos lyis kyauh kat.

¹¹Nghuot goeus, hau nyeici nyeih nyeici nyens dah thang lhyi, hau thanghchvp lhaih toh dah luk lhywaq aiq koeuq YHENSAIN ngos lyis dyei.

¹²Hauh thang lhyi YHENSAIN ngos lyis taiq, Boms masyah lvnyap gyoh loh aq. Nvng Egutu masyah shwih thuq los dah nah dius jens dyoqbis loh las ma gis zis kuot goeus. Ngos nyamoq lyis kuot aq oen tying toh masyah phanh las nyamoq nyang xiklyis phvra kuot goeus.

¹³Tsai YHENSAIN ka ngos lyis taiq, Haih dius jens nhaiqlom kha iq than zis ngos seq.

¹⁴Ngos lyis vtomp toh. Ngos nyamoq lyis mhont bah, housoeh lyis nyamoq lyis hank eq ma soh lo das. Hauh thang lhyi ngos nvng lyis nyamoq thoq lyis zes kuh, yomsoq zes dah dius nyau dah uwus kuot bah, ge.

¹⁵Housoeh las ngos hau thanghchvp luk aiq lhywaq chi lha hau nyi duk nyeis boms masyah tauh gyoh los.

¹⁶Namoq gas YHENSAIN, nah Mangso dyei toh dah tyingtoh dang lyis domsyos ma gyo kuot goeus yvlyis ngos nyvng. Namoq nyang xiklyis ngwis xing yah noeulu lo vzwvng phvra kuot zis yah nyang lyis tyi dah yaunos kuot goeus.

¹⁷Housoeh las ngos hauh luk aiq lhywaq namoq xikkhonh mas doeuh khwih tyamp.

¹⁸Hauh thang lhyi ngos YHENSAIN xikkhonh mas dvlhain loh doms dupaiq las zoszo jeis ma shuk nyeici nyeih nyeici nyens nyeis. Ngos housoeh kuot zis gas namoq YHENSAIN lhyi yaunos kuot las nhaiqyo nhang yvmvyah nghuot.

¹⁹Ngos gas YHENSAIN dah nhaiqgis yo yvlyis gyuk. Khasoeh ge lyis nyang namoq lyis mhont bah ge shoq nhaiqyo. Nghuot laus eq YHENSAIN ngos lyis doms gyo dyei.

²⁰YHENSAIN ka Aron lyis eq sat das ge shoq nhaiqyo. Housoeh las hauh uhlyis nyang, ngos Aron xiklyis eq dung.

²¹Ngos namoq kuot dah yaunos ge, hau namoq kuot dah noeulo lyis eq nyi mas yoeus ngheq. Hauh thang lhyi khwih, phih mhont las boms mas yaus lyih dah jeislo lvng mas doeuh kat.

²²Namoq Tabera, Masa, Kibrot Hatawa mas nghuot uhlyis eq namoq YHENSAIN Mangso lhyi nhaiqyo nhang.

²³Nyang Kadesh Barnea masyah namoq lyis nhang lha, Ngos namoq lyis dyei dah mau lyis loh sain geh, ge vmingh dyei. Hauh uhlyis eq, namoq nyang lyis tyi lha gomloeus toq; namoq nyang lyis ma loms, nyah domsyos ma gyo.

²⁴Ngos namoq yah seq goh buisnyeis masyah namoq gas YHENSAIN lhyi gomloeus toq.

²⁵YHENSAIN ka namoq lyis mhont das ge nghamh thyet goeus yvlyis ngos seq yvmvyah, ngos nyah xikkhonh mas nyeici nyeih nyeici nyens dupaiq.

²⁶Housoeh ngos dung zis gas, Yomzains YHENSAIN eh, nvng nah yomsoq, kuhxing yom yah Egutu masyah khyuot shwih los, nvnyang dah dius jens lyis vjenh mhont.

²⁷Nah jyeidwis Abraham, Isak, Yakop moq lyis soh aq: haih dius jens dah nhaiqlom than cho, lhung cho, nyamoq dah yaunos lyis vjenh yoeuh.

²⁸Housoeh ma nghuot lyis gas, Egutu bang yah, Nvng nyamoq lyis dangthoengh toh dah mau mas ma thyeh shwih loh. Nvng nyamoq lyis hoeng lha mhanhdyvp mas sat das ge shwih los, ge sang das.

²⁹Heika nah dius jens duot das xiklyis nvng khyen yoeus toh bang, nvng nyamoq lyis nah kuhxing yomzains yomsoq yah Egutu masyah shwih los dius jens dvnghuot, oen.