Read Achang YOHAN 10 Bible Online

YOHAN 10 - Achang bible

YOHAN 10

¹Ngos namoq lyis jyoengh taiq bah, yvng khom mha khomh cho yah ma wvng, gohcho yah dyvm wvng soeu ka khauh soeu, khyanktau nghuot.

²Khomh cho yah wvng soeu ka yvng yoeuh soeu nghuot.

³Khomh zungh soeu eq hauh soeu lhyi ka gyangh phank dyei; yvng eq nyah thwe gyo las, nyang gas nyah yvng lyis nyings yoeus las nghe pheh gyangh shwih thuq loh.

⁴Nyah yvng lyis shwih thuq lho lha, yvng jens dah xik pheh loh yvmvyah, yvng eq nyah thwe seqgyo las nyah thang mha chank loh.

⁵Dius boengh dah thwe lhyi ka, yvng jens ma shoeuq yvmvyah, hauh soeu thang mha ma chank loh, dvtsain phang loh, ge.

⁶Yesu gas hauh dangtoeuq nyamoq lyis taiq laus eq, nyang chah cho taiq nyeis yvlyis nyamoq ma seq gyo.

⁷Housoeh yvmvyah Yesu nyamoq lyis doms taiq. Ngos namoq lyis jyoengh taiq bah, Ngos gas yvng jens dah khomh nghuot.

⁸Ngah xik lyis los bang dvnganh gas khauh bang, khyanktau jens dvtsain nghuot. Yvng eq nyamoq dah dang ma tsain gyo dyei.

⁹Ngos gas khomh nghuot: ngos masyah wvng soeu ka khyuot yoeus zis xauh das; thuq wvng yoh kuot las katjang nyvng das.

¹⁰Khauh soeu ka khauh das, sat das, mhont das zis ma nghuot lyis gas ma los. Ngos gas, nyamoq kang yoh las magons magoh dyingh bas jungh, oen dvlyih.

¹¹Ngos gas gis dah yvng yoeuh soeu nghuot: gis dah yvng yoeuh soeu ka yvng xiklyis nyah kang yoh dyei.

¹²Nghuot laus eq yvng lyis sain dah yvng yoeuh soeu ma nghuot, uhkung dvnghuot lyis gas, womkhuih los zis nyvng lyis, yvng lyis toh khoq las phang loh. Womkhuih eq yvng lyis ngat zo las khat sanh tyamp.

¹³Hauh soeu ka uhkung dvnghuot yvmvyah yvng xiklyis ma chiq dyei, phang khoq.

¹⁴Ngos gas gis dah yvng yoeuh soeu nghuot. Ngos gas ngah yvng lyis seq las ngah yvng eq ngos lyis seq.

¹⁵Uwus gas ngos lyis seq las ngos eq Uwus lyis seq. Housoeh yvmvyah ngah yvng xiklyis ngah kang dyei tyamp.

¹⁶Haih phung mha ma bos dah yvng gohtoeu eq ngos yoh shih: hauh bang eq ngah thwe lhyi gyo las, nyamoq lyis ngos shwih tsainh las, yvng phung dvkoeuq, yvng yoeuh soeu dvyuk kyingh bweh das.

¹⁷Housoeh las ngos gas ngah kang lhyi doms xauh yoeus bas jungh, oen kang kyauh tyamp yvmvyah, ngah Uwus ngos lyis jyetdap.

¹⁸Ngah kang lhyi hank eq ma yoh yoeus tyamp: ngah ehnyet yah ngvnyang dvkyauh tyamp: kyauh tyamp das yomsoq yahge doms xauh yoeus das yomsoq ngvnyang yoh. Hauh tyingtoh dang gas ngah Uwus jyank masyah ngos yoh toh, ge.

¹⁹Hauh dang gvng mas Yuda jens gang loh das cho doms thuq los.

²⁰nyamoq nyoshoq moq taiq, Nyang yius wvng las huonh nyeis: chamus nyah dang gyo nyeis goh lah, ge.

²¹Dvyhamh gas, Nyah dang gas yius wvng soeu dah dang ma nghuot: yius gas nyoqjet soeu dah nyoq lyis yoh phank dyei das lah! ge.

²²Gvshih Yerusalem mas Yhenmuh Kyauh pwe nghuot. Hauh yoq gas cungh nghuot.

²³Yesu gas yhenmuh Solomon dah wumuk thang mha suh loh.

²⁴Housoeh Yuda jens nyang lyis khyam nyang los nyei zis gas, Nvng kha nyhank jweh shoq ngamoq lyis khamkhvv nhang das lah, ge.

²⁵Yesu nyamoq lyis phuk taiq zis gas, Ngos namoq lyis taiq kyoh goeus, namoq nyang ma tsain jingh dvmus. Ngah Uwus dah nyings yah ngos kuot dah muh gas ngah cho kanghjyoeng kat nyeis.

²⁶Nghuot laus eq ngos namoq lyis taiq toh zis yah dvyhangteh, namoq gas ngah yvng ma tsain nghuot las ma tsain jingh.

²⁷Ngah yvng jens gas ngah thwe lhyi gyo las, ngah thang mha chank, ngos eq nyamoq lyis seq.

²⁸Ngos nyamoq lyis vcaiq vto kang dyei toh las, nyamoq khanhamp eq dyoqbis xauh das zis ma nghuot. Ngah loq masyah hank eq ma yoh lhuot yoeus das.

²⁹Nyamoq lyis ngah loq mas kyauh toh dah ngah Uwus gas, dvnganh thoq mas zes kuh nyeis yvmvyah, ngah Uwus loq masyah nyamoq lyis hank eq yoh lhuot yoeus das zis ma nghuot.

³⁰Ngos yahge ngah Uwus gas dvyuk dvnghuot.

³¹Hauh uhlyis Yuda jens gas nyang lyis doeuh das ge lukgoq doms tsain kui.

³²Yesu nyamoq lyis phuk taiq zis gas, Ngah Uwus jyank masyah gis dah muh nyoshoq ngos namoq lyis chixoeuq goeus. Hauh muh mas khakoeuq gvng mas ngos lyis lukgoq yah doeuh das lah, ge.

³³Yuda jens nyang lyis phuk taiq zis gas, Gis dah muh gvng mas nvng lyis doeuh das zis ma nghuot, loeusmus soqzo thang lhyi dius dvnghuot zis nvnyang gungs lyis Mangso kuot gvng mas doeuh das zis dvnghuot, ge.

³⁴Yesu nyamoq lyis phuk taiq zis gas, Namoq gas mangso jens nghuot nyeis oen ngos taiq, ge namoq dah Lyi mas lhaih toh ma nghuot lhyeh?

³⁵Mangso dang xauh yoeus bang lyis namoq gas, mangso jens ge taiq toh las, lhaihtoh dang lyis ma gis lhoq thyoq lyis gas,

³⁶Ngah Uwus gyingshang nhang lha haih mungkvn mas nhang kat zis xauh soeu, ngos gas Mangso dah Lo nghuot oen taiq gvng mas hauh soeu lhyi, Nvng loeusmus soqzo oen lha gis taiq das lhyeh?

³⁷Ngos ngah Uwus dah muh ma kuot nghuot lyis gas, ngos lyis vjingh goh.

³⁸Hauh muh ngos kuot nghuot lyis gas, ngos lyis ma loms laus eq, ngos mas ngah Uwus bos las, ngah Uwus mas ngos bos zis lyis namoq seq las lomsjingh bas jungh, hauh muh lyis lomsjingh nyeis geh, ge.

³⁹Housoeh yvmvyah nyang lyis nyhik das zis nyamoq doms xo laus eq, nyang gas nyamoq loq masyah luiq loh.

⁴⁰Hauh thang lyis Yesu gas Yohan jeisnyhop dyei dah joqyos, Yodan lvng thyitvp pheh goeu e lha houmha nyeis.

⁴¹Dius nyoshoq moq nyah jyank mas jweh los las taiq zis gas, Yohan gas vlho cha ma chixoeuq hauh soeu cho Yohan taiq zis dvnganh jus, ge.

⁴²Houmha dius nyoshoq moq Yesu lyis lomsjingh.