Read Achang YOHAN 11 Bible Online

YOHAN 11 - Achang bible

YOHAN 11

¹Mari yahge nyah vbi Matha nyeis dah Bethani wukhau mha Lazaru ge soeu nos nyeis.

²Hauh Mari gas Yhensain lhyi mura huot kat dyei las khyei lhyi nyah cam yah buot dyei soeu nghuot. Hau nos soeu Lazaru gas nyah mungs nghuot.

³Housoeh las hauh vbi vnoeuh nhaiqtang, nyah jyank mas taiq nhang kat zis gas, Yhensain eh, nvng jyetdap soeu nos nyeis, ge.

⁴Yesu gas hauh dang xauhgyo lyis nyang taiq zis gas, Haih nos gas shei nos nos zis ma nghuot: hei mhayah Mangso dah phunk xiklyis nghuot las, Mangso dah Lo masyah yoh chunghtoq das xiklyis bweh los cho nghuot, ge.

⁵Yesu gas Matha, nyah vnoeuh yahge Lazaru lyis jyetdap.

⁶Lazaru nos nyeis cho xauhgyo lyis, nyang nyeis yvmas aiq nyeih thoeng khoq shih.

⁷Hauh thang lhyi nyah changlo jens lyis taiq zis gas, Yuda mau pheh doms loh goh, ge.

⁸Nyah changlo jens nyang lyis taiq zis gas, Svra eh, Yuda jens gvshih eq lukgoq yah doeuh sat das ge xo nyeis lyis, houmha doms loh shih das lah, ge.

⁹Yesu phuk taiq zis gas, Dvnyeih lyis dvci aiq shishenh bos ma nghuot lah? Nyeih lyis suh e soeu ka haih mungkvn dah bvng zis nyvng las khyeiuh ma thungh.

¹⁰Nyenh lyis suh e soeu ka, nyang mas bvng zis ma bos yvmvyah, khyeiuh seq thungh, ge.

¹¹Nyang hauh goeu lyis dye taiq thang lhyi, nyamoq lyis taiq zis gas, Yah dyenschangh phoq Lazaru yhet joq: nyang lyis nhauh toq das xiklyis ngos houmha e das, ge.

¹²Nyah changlo jens nyang lyis taiq zis gas, Yhensain eh, nyang yhet muih joq dvnghuot lyis gas gis los das, ge.

¹³Yesu gas Lazaru shei goeus cho taiq kyoh nyeis lyis eq, nyamoq gas yhet zis lyis dvtaiq das, ge tsain nghamh.

¹⁴Housoeh las Yesu gas nyamoq lyis, Lazaru shei goeus, ge debangh taiq.

¹⁵Nyamoq yoh lomsjingh das xiklyis ngos houmha ma nyeis jus yvmvyah, namoq dah cho ngos gaus nyeis. Nghuot laus eq gvshih houmha tsain e goh, ge.

¹⁶Didimu ge dah Thoma gas, Nyang yah dvgeh bos shei das zis yang eq loh goh, ge nyah changlo changh jens lyis taiq.

¹⁷Yesu jweh lyis, Lazaru lyis lopkhyung mha nyei nyeih toh goeus zis nyvng.

¹⁸Bethani wukhau ka Yerusalem wus yah aiq main ko dvkyo joq yvmvyah,

¹⁹mungs chithyuk dah vbi vnoeuh vzomh, Matha yahge Mari lyis nhaiqtaink das ge Yuda dius jens nyoshoq moq los nyeis.

²⁰Yesu jweh los cho Matha xauhgyo yah dvyih, nyang lyis zes das ge e loh. Mari gas yhen mha tsung toh khoq shih.

²¹Hauh uhlyis Matha gas, Yhensain eh, nvng heimha dvnyeis ya ngah mungs ma shei das zis:

²²gvshih laus eq, Mangso jyank mas nvng dung ya dung yvlyis Mangso nvng lyis dyei das zis ngos seq, ge Yesu lyis lhom taiq kyoh.

²³Yesu nyang lyis taiq zis gas, Nah mungs doms toq das, ge.

²⁴Matha nyang lyis taiq zis gas, Thang thank doms toq dah buisnyeis lyis nyang eq dwis toq das zis gas ngos seq, ge.

²⁵Yesu nyang lyis taiq zis gas, Ngos gas dwis toq cho yahge kang nghuot. Ngos lyis lomsjingh soeu ka, nyang shei laus eq kang dwis das.

²⁶Hank laus eq kang dwis nyeis las ngos lyis lomsjingh soeu ka khanhamp eq shei das zis ma nghuot: nvng haih zis lyis vjingh lah, ge.

²⁷Matha nyang lyis taiq zis gas, Nghuot goeus Yhensain eh, nvng gas haih mungkvn mas jweh lyih, Mangso dah Lo Khristu nghuot zis lyis ngos jingh, ge.

²⁸Nyang housoeh taiq lho lha, nyah vnoeuh Mari lyis loh gauh lui las, Svra jweh los goeus, nvng lyis lui nyeis, ge.

²⁹Mari hauh dang xauhgyo yah dvyih lvnyap toq las Yesu jyank pheh e loh.

³⁰Yesu gas wukhau mha ma jweh los shih: Matha nyang yah xauhgoh yvmas nyeis khoq.

³¹Housoeh yhen mha Mari lyis nhaiqtaink dyei dah Yuda jens gas, Mari lvnyap toq thuq loh zis nyvng las nyamoq nyah thang mha chank e lha, Nyang lop mas e ngaus bah ge soh bos, tsain ge.

³²Mari gas Yesu nyeis dah joqyos mas jweh las nyang lyis nyvng lyis, nyah khyeiyang mas dupaiq las taiq zis gas, Yhensain eh, nvng heimha dvnyeis ya ngah mungs ma shei das zis, ge.

³³Mari ngaus las nyah thang mha chank lyih dah Yuda jens eq ngaus zis lyis Yesu nyvng lyis, nyah dyos mas nhaiqngis zis yah ehnyet nyo nyeis las,

³⁴nyang lyis khamha nyhop toh lah, ge nyei. Nyah zomh taiq zis gas, Yhensain eh, lyih yoeuh aq, ge.

³⁵Yesu ngaus.

³⁶Housoeh las Yuda jens gas, Yoeuh aq, nyang hauh soeu lhyi kha iq jyetdap, ge.

³⁷Tsai dvyhamh taiq zis gas, Nyoqjet soeu lhyi nyoq yoh phank dyei dah haih soeu ka, Lazaru lyis eq ma shei das khyvlyis ma yoh kuot das lhyeh, ge.

³⁸Housoeh las Yesu gas nyah ehnyet mas nhaiq doms ngis zis yah lop pheh e loh. Hauh lop gas lukkhyung nghuot las lukzains yah cheiq toh.

³⁹Yesu taiq zis gas, Hauh luk toeu tyamp geh, ge. Shei soeu dah nhamhmuh Matha taiq zis gas, Yhensain eh, gvshih gas nvm hah das, nyang shei zis nyei nyeih bos goeus, ge.

⁴⁰Yesu gas, Nvng lomsjingh lyis gas, Mangso dah phunk xauh nyvng das oen ngos taiq toh goeus ma nghuot lhyeh, ge.

⁴¹Housoeh las nyamoq gas hau mvng toh yvmas dah luk lyis toeu tyamp. Hauh uhlyis Yesu gas maukhung mha nghank yoeuh las, Uwus eh, nvng ngah dang gyo dyei yvmvyah ngos nvng lyis chungh.

⁴²Nvng vjangh ngah dang gyo dyei yvlyis ngos seq. Nghuot laus eq nvng ngos lyis nhang kat goeus zis gas, haih vyvm vwi mas dah dius jens lomsjingh bas jungh, oen ngos taiq zis nghuot, ge.

⁴³Housoeh dye taiq thang lhyi, Lazaru eh, thuq lyih aq, ge thwe zainsmuh yah kaiq kat.

⁴⁴Hauh uhlyis shei goeus soeu ka, nyah khyei nyah loq mas misseh lyet las, nyoqnho mha eq shuhkyenh lyet zis thuq lyih. Yesu nyamoq lyis taiq zis gas, Nyang lyis phui kat geh, ge.

⁴⁵Housoeh las Mari jyank mas nhaiqtaink lyih bang Yuda jens nyoshoq moq Yesu kuot zis lyis nyvng las nyang lyis tsain lomsjingh.

⁴⁶Dvyhamh gas Pharishe moq jyank mas loh las, Yesu kuot cho lhyi tsain taiq kyoh.

⁴⁷Housoeh las Pharishe moq yahge phudyei uhjyung jens gas, hauh nhaiqbos huom khi tsainh las taiq zis gas, Yang cha kuot das au lhyeh? Hauh soeu ka vlho nyoshoq chixoeuq nyeis.

⁴⁸Nyang lyis heisoeh dvnyhei toh lyis gas dius dvnganh nyang lyis dye tsain lomsjingh das las, Roma dius jens lyih las yah joqyos, yah vnyau lyis lhuot yoeus loh das, ge.

⁴⁹Nghuot laus eq nyamoq mas hauh zvnyo dah Phudyei Zainsmuh Kayapa ge vyuk taiq zis gas, Namoq cha ma seq.

⁵⁰Dius dvnyau gonh dyoqbis zis ma xauh shoq, haih vnyau xiklyis dius dvyuk shei kham lhyi yah xiklyis shonsi das yvlyis namoq ma nghamh yoeuh nyvng, ge.

⁵¹Dang hauh zis gas nyah ehnyet yah nyang taiq zis ma nghuot: hauh zvn lyis Phudyei Zainsmuh nghuot yvmvyah, Yesu gas vnyau xiklyis shei kham chah das, ge pe zis nghuot.

⁵²Hauh vnyau xiklyis kyingh ma nghuot, joqyos khyiq khanghmuh mas dyos joq, Mangso dah lo jens lyis tsain shwih tsainh das xiklyis shei kham chah das, ge zis nghuot.

⁵³Hauh nyeihyo masyah nyang lyis sat das cho, nyamoq joeui da nyeis.

⁵⁴Housoeh las Yesu gas Yuda jens dah xikkhonh mas debangh ma suh xoeuq, hou mhayah thuq las mhanhdyvp yvm, Ephraim wukhau mha nyah changlo jens yah dvgeh nyeis.

⁵⁵Gvshih Yuda jens dah Lhuiq Kat Pwe ni los nyeis las, dius nyoshoq moq pwe ma jweh shih lyis, vsainnyang gungs cheihshang das xiklyis wukhau mhayah Yerusalem wugungs pheh tsain doq loh.

⁵⁶Nyamoq gas Yesu lyis xo lha, Yhenmuh mas yap las dvyuk yah dvyuk nyei goh zis gas, Namoq khasoeh nghamh goh? Nyang haih pwe mha ma los das lhyeh, ge.

⁵⁷Hauh uhlyis phudyei uhjyung jens yahge Pharishe moq gas, nyang lyis yoh yoeus shoq, Hank laus eq nyang nyeis joqyos seq lyis gas taiq kyoh chah, ge las vmingh dyei toh.