Read Achang YOHAN 12 Bible Online

YOHAN 12 - Achang bible

YOHAN 12

¹Lhuiq Kat Pwe jweh das zis khyuk nyeih chah shih lyis, shei masyah dwis los nhang dah Lazaru nyeis joqyos Bethani mas jweh e.

²Nyamoq gas nyang lyis nyenhcon tsain lhom tsoh langh yvmas, Matha gas wom bos dwis tsoh nyeis. Lazaru gas nyang yah tsung lha wom zo bang mas bos.

³Hauh uhlyis Mari gas phauhdap dah mura nadu coeu gyingh kyatthah 30 yoeus las, Yesu dah khyei mha juot lho lha nyah cam yah buot dyei. Hauh nadu coeu ka dvyhen khau yah nhoenk toh.

⁴Housoeh nyah changlo dvyuk nghuot las nyang lyis phanhlyen das dah, Simon dah lo Yudas Iskarot taiq zis gas,

⁵Hau nadu coeu lhyi ngwis somhxo yah ungh las, nyungs bang lyis chamus ma gvm dyei, ge.

⁶Nyang housoeh ge zis gas nyungs bang xiklyis nghamh dyei las taiq zis ma nghuot: nyang gas ngwis thung chi soeu nghuot las, kat toh dah ngwis masyah gyangh lap zo dah khauh soeu nghuot las taiq zis dvnghuot.

⁷Housoeh las Yesu taiq zis gas, Nyang kuot zis nghuot goeus jungh, hauh zis gas ngos lyis nyhop dah buisnyeis xiklyis nghuot.

⁸Nyungs bang gas namoq yah vjangh dvgeh nyeis: ngos gas namoq yah vjangh ma nyeis, ge.

⁹Yesu houmha nyeis zis lyis Yuda jens nyoshoq moq seq: nyamoq lyih zis gas, Yesu lyis kyingh nyvng mes las ma nghuot, shei masyah nyang dwis los nhang dah Lazaru lyis eq nyvng mes las nghuot.

¹⁰Housoeh las phudyei uhjyung jens gas, Lazaru lyis eq sat das zis tsain xamgoh nyeis.

¹¹Khasoeh ge lyis nyah cho gvng mas, Yuda nyoshoq moq tsain thuq loh las Yesu lyis tsain lomsjingh goeus.

¹²Hauh thang lhyi nyeihyo Yesu gas Yerusalem mas los nyeis zis lyis, hauh pwe mha jweh nyeis dah moqjens xauhgyo lyis,

¹³nyamoq gas dyoms ko zan chi lha nyang lyis zes das xiklyis thuq los uhjyangh kaiq las, Hosana! Yhensain nyings mas jweh los soeu, Israel Hwankti ka ngelhoq, ge.

¹⁴Yesu gas mauhlyihzoe lo nyvng las ji. Hauh zis gas lhaihtoh dang mas:

¹⁵Zion lonyi eh, vgyuk, yoeuh aq nah hwankti ka mauhlyihzoe lo ji las jweh los nyeis, ge zis yah dvyhangteh nghuot.

¹⁶Hauh cho lhyi nyah changlo jens gas vsaiq yoq lyis ma seqgyo. Nghuot laus eq Yesu gas phunk lyis chungh zis xauh thang lhyi, nyang lyis toeuq las lhaih toh zis lyis eq, nyamoq soh.

¹⁷Hauh cho bweh zis gas, Lazaru lyis lop masyah lui las, shei masyah lhoeu toq yoeus uhlyis nyang yah dvgeh nyeis dah moqjens yah kanghjyoeng kat dyei.

¹⁸Hauh cho gvng mas moqjens gas nyang lyis e tsain zes zis nghuot. Khasoeh ge lyis nyang kuot vlho lhyi nyamoq xauhgyo goeus.

¹⁹Housoeh las Pharishe jens nyamoq nyang changh taiq goh zis gas, Namoq khasoeh eq ma yoh kuot lo zis vsoh goh lah? Yoeuh aq, jyoengh nyang dvmau gonh bang nyah thang mha dye chank loh goeus, ge.

²⁰Haih pwe mha shvmanh dung das zis doq los bang mas Heleni eq dvyhamh bos.

²¹Hauh bang gas, Galile mau, Betsaida wugungs dius Philip jyank mas e lha taiq zis gas, Nhaiqbos eh, ngamoq gas Yesu lyis nyvng mes, ge.

²²Philip gas Andre lyis taiq kyoh las, Andre yahge Philip gas Yesu lyis e taiq kyoh.

²³Yesu nyamoq lyis phuk taiq zis gas Cangsoeu Lo dah phunk lyis chungh das shishenh jweh los nyeis.

²⁴Namoq lyis ngos jyoengh taiq zis gas, Gukchvp gas nyeisjvng mas gyoh las ma dyoq tyamp lyis gas dvkoeuq kyingh dvnghuot joq: shei tyamp lyis gas vshih nyoshoq shih los.

²⁵Vsainnyang kang lhyi yu soeu ka kang som das: haih mungkvn mas vsainnyang kang lhyi hoeng soeu ka vcaiq vto kang xauh yoeus shoq, vsainnyang kang lhyi yoh tsomh toh das.

²⁶Ngos lyis phuqsoe soeu hank laus eq ngah thang mha chank bas jungh; ngos nyeis jang mas ngah jyeidwis eq nyeis das. Ngos lyis phuqsoe soeu nghuot lyis gas, ngah Uwus hauh soeu lhyi chungh das.

²⁷Gvshih ngos ehnyet nyo nyeis: ngos cha taiq das lah? Uwus eh, ngos lyis lhuiq kat aq, nghuot laus eq haih cho gvng mas ngos haih shishenh mas jweh nyeis.

²⁸Uwus eh, nah nyings lyis chungh aq ge. Hauh uhlyis maukhung mha dah thwe ka, Ngos chungh goeus, chungh shih das, ge taiq thuq los.

²⁹Hauh joqyos mas yap huom joq bang, hauh cho xauhgyo bang gas, Maujau jau nyeis, ge. Dvyhamh bang gas, Nyang lyis loeuswons soeu taiq nyeis, tsain ge.

³⁰Yesu phuk taiq zis gas, Thwe haih zis gas ngah xiklyis nyings thuq los zis ma nghuot, namoq xiklyis dvnghuot.

³¹Haih mungkvn lyis soetuon zis gas gvshih nghuot: haih mungkvn zau lyis khat tyamp das zis gas gvshih nghuot.

³²Ngos gas nyeisjvng masyah toqh kat zis xauh goeus ya, dius dvnganh lyis ngah shot pheh lang yoeus das, ge.

³³Housoeh ge zis gas nyang khasoeh shei kham das vlho chixoeuq uhlyis yah taiq zis nghuot.

³⁴Moqjens nyang lyis phuk taiq zis gas, Khristu gas vcaiq vto goeng joq das ge las Lyi mas bos zis dvxauhgyo ku. Housoeh dvnghuot zis nvng gas, Cangsoeu Lo toqh kat zis xauh das, ge zis gas cha ge zis nghuot lah, cangsoeu Lo gas hank nghuot lah, ge.

³⁵Yesu nyamoq lyis taiq zis gas, Haih bvng zis gas namoq mas dvsoq dvnyeis lo das; Hau chuot zis gas namoq lyis ma chank duons bas jungh, namoq mas bvng zis joq shih lyis suh e geh; chuot yvmas suh e soeu ka vsainnyang kha pheh loh zis eq ma seq.

³⁶Namoq gas bvng nyeis shih lyis bvng dah lo jens yoh bweh bas jungh, bvng zis lyis lomsjingh nyeis geh, ge. Yesu haih dang dye taiq thuq las nyamoq jyank masyah gang dyuk loh.

³⁷Heinyhoq dah yomsoq muh nyamoq xikkhonh mas kuot xoeuq laus eq, nyamoq gas nyang lyis ma lomsjingh.

³⁸Hauh zis gas, Yhensain eh, ngamoq loeus lyis hank lomsjingh lah? Yhensain ka nyah yomsoq hank lyis chixoeuq ku lah, ge lvpe Esaia taiq dah dang nyuk los das xiklyis nghuot.

³⁹Housoeh yvmvyah nyamoq gas nyang lyis ma lomsjingh: Khasoeh ge lyis, Esaia doms taiq zis gas,

⁴⁰Nyamoq nyoq ma nyvng, ehnyet mas eq ma seq gyo, nhaiqlom ma thaiq las ngos nyamoq lyis lhoq gis dyei zis ma xauh bas jungh, ge nyang nyamoq dah nyoq lyis jet nhang, nhaiqlom lyis eq than nhang, ge.

⁴¹Esaia gas nyah phunk lyis nyvng las nyah cho housoeh taiq zis nghuot.

⁴²Housoeh ge laus eq guon bang yangh nyoshoq moq nyang lyis lomsjingh. Nghuot laus eq Pharishe jens yah nyamoq lyis lyi jungs masyah khat thuq das zis chiq las nyamoq gas nyang lyis ma rhen.

⁴³Khasoeh ge lyis, nyamoq gas Mangso jyank mas dah nyoqnho ngelang yoh das thoq lyis dius jyank mas dah nyoqnho ngelang yoh das zis lyis ngwis.

⁴⁴Yesu kaiq las taiq zis gas, Ngos lyis lomsjingh soeu ka, ngos lyis loms zis ma nghuot, ngos lyis nhang kat soeu lhyi lomsjingh zis dvnghuot, ge.

⁴⁵Ngos lyis nyvng soeu ka ngos lyis nhang kat soeu lhyi nyvng zis nghuot.

⁴⁶Ngos lyis lomsjingh soeu hank laus eq chuot yvmas ma lungh joq bas jungh, oen ngos bvng zis duot las mungkvn mas jweh lyih.

⁴⁷Ngah dang xauhgyo las ma lomsjingh soeu hank lyis laus eq ngos soetuon das zis ma nghuot: Khasoeh ge lyis ngos haih mungkvn mas jweh lyih zis gas soetuon das xiklyis ma nghuot, khyuot yoeus das xiklyis dvnghuot.

⁴⁸Ngos lyis peq tyamp las ngah dang ma lhom yoeus soeu lhyi soetuon das zis soetuon soeu nyang nyeis. Ngos taiq dah dang mas nyang, thang thank buisnyeis lyis hauh soeu lhyi soetuon das.

⁴⁹Ngos gas ngah ehnyet yah taiq zis ma nghuot. Ngos khasoeh jyauh das zis gas ngos lyis nhang kat, ngah Uwus gas ngos lyis tyingtoh dang dyei kat goeus.

⁵⁰Nyah tyingtoh dang gas vcaiq vto kang nghuot zis ngos seq. Housoeh yvmvyah ngos taiq ya taiq zis gas, ngah Uwus taiq kat khyvlyis taiq, ge.