Read Achang YOHAN 13 Bible Online

YOHAN 13 - Achang bible

YOHAN 13

¹Gvshih hau Lhuiq Kat Pwe ma jweh shih lyis Yesu gas, haih mungkvn masyah nyah Uwus jyank mas loh das shishenh jweh goeus zis seq. Haih mungkvn mas nyah dius jens lyis nyang jyetdap zis gas mungkvn goms shoq nghuot.

²Nyenhcon dye zo lyis yius gas Simon dah lo Yudas Iskarot dah ehnyet mas, nyang lyis phanhlyen das joeui dye da las,

³Nyang gas Mangso jyank masyah los las Mangso jyank mas tauh loh das zis yahge, dvnganh zis lyis Uwus yah nyah loq mas kyauh toh yvlyis nyang seq yvmvyah,

⁴wom zo nyeis masyah Nyang toq loh las, nyah dyi khyuot tyamp lho lha buot misseh dvkoeuq thyikdom mas chih toh.

⁵Hauh thang lhyi jeislang mas jeis kat yoeus las, changlo jens dah khyei cheih dyei lho lha, nyang chih toh dah misseh yah buot dyei dyei kuot.

⁶Nyang Simon Petru jyank mas jweh lyis, Petru nyang lyis taiq zis gas, Yhensain eh, nvng ngah khyei cheih das lah, ge.

⁷Yesu nyang lyis phuk taiq zis gas, Ngos kuot cho lhyi nvng gvshih ma seq laus eq thang pheh seq das, ge.

⁸Petru gas, Ngah khyei lhyi nvng khanhamp eq ma yoh cheih das, ge. Yesu nyang lyis taiq zis gas, Ngos nvng lyis ma yoh cheih dyei lyis gas nvng ngos yah ma sen, ge.

⁹Simon Petru nyang lyis taiq zis gas, Yhensain eh, ngah khyei kyingh ma nghuot, loq yahge uhloms eq cheih dyei aq, ge.

¹⁰Yesu nyang lyis taiq zis gas, Gungs cheih goeus soeu ka khyei mhayah lai las gohtoeu cha cheih chank ma bos lo: hauh soeu dah gungs gonh gas shang joq goeus, namoq eq shang goeus, nghuot laus eq namoq dvnganhmoq gyingshang zis ma nghuot, ge.

¹¹Khasoeh ge lyis nyang lyis phanhlyen das soeu hank nghuot yvlyis nyang seq toh. Housoeh las, Namoq dvnganh gyingshang zis ma nghuot, ge taiq zis nghuot.

¹²Housoeh nyamoq dah khyei dye cheih dyei las, nyah dyi yoeus wuot lho lha doms tsung uhlyis yah nyang nyamoq lyis taiq zis gas, Gvshih namoq lyis ngos kuot cho namoq vseqgyo goh lah?

¹³Namoq ngos lyis, Svra ge eq, Yhensain ge eq tsain lui. Houyah dvyhangteh ngos nghuot yvmvyah namoq dah dang eq jus.

¹⁴Housoeh Svra eq, Yhensain eq nghuot joq las ngos yangh namoq dah khyei cheih dyei lyis gas, namoq eq nyang changh nyang dah khyei gis cheih dyei goh.

¹⁵Namoq lyis ngos kuot yhangteh namoq eq chank kuot bas jungh oen, ngos namoq xiklyis yikhyoh toh zis nghuot.

¹⁶Ngos namoq lyis jyoengh taiq bah, jyeidwis gas yhensain thoq lyis zes zis ma nghuot; mang suh soeu eq jyeinhang kat soeu thoq lyis zes zis ma nghuot.

¹⁷Haih cho lhyi namoq seq las, hauh yvlyis chank kuot lyis gas, namoq ngelhoq.

¹⁸Namoq dvnganh lyis toeuq las taiq zis ma nghuot: ngos khyen yoeus bang lyis gas ngos seq: nghuot laus eq, Ngos yah wom zo soeu ka nyah thyvthank lvnhaiq yah ngos lyis thoenk, ge lhaihtoh dang nyuk los das xiklyis nghuot.

¹⁹Hauh cho bweh los uhlyis ngos hauh soeu nghuot zis gas namoq lomsjingh bas jungh oen, ma bweh shih lyis taiq toh.

²⁰Ngos namoq lyis jyoengh taiq zis gas, Ngos nhang kat soeu lhyi lhom yoeus zis gas ngos lyis lhom yoeus zis nghuot. Ngos lyis lhom yoeus soeu eq ngos lyis nhang kat soeu lhyi lhom yoeus zis nghuot, ge.

²¹Yesu gas housoeh ge dye taiq lyis, nyah dyos mas chiqjyen zis yah, Ngos namoq lyis jyoengh taiq bah, namoq mas dvyuk ngos lyis phanhlyen das ge kanghjyoeng kat nyeis.

²²Housoeh las changlo jens gas hank lyis toeuq las taiq zis eq ma seq, khamkhvv lha nyang changh nyang nyei goh nyeis.

²³Hauh uhlyis Yesu jyetdap dah changlo dvyuk gas, Yesu dah sainhkhonh mas nges toh las,

²⁴Simon Petru gas, Nyang hank lyis toeuq las taiq nyeis lah? Ngamoq lyis taiq kyoh aq, ge nyang lyis vsoh yah nyei.

²⁵Hauh changlo gas Yesu dah sainhkhonh mas doms lhain nghe lha, Yhensain eh, khayuk nghuot lah, ge nyei.

²⁶Yesu phuk taiq zis gas, Ngos ohlhyoq dvkoeuq jen las dyei soeu nghuot, ge lho lha hau ohlhyoq dvkoeuq jen las Simon dah lo Yudas Iskarot lyis dyei.

²⁷Hauh soeu ka ohlhyoq dvnhuot yoeus zo thang lhyi Satan ka nyah jyank mas wvng. Housoeh las Yesu nyang lyis taiq zis gas, Nvng kuot chah muh lvnyap kuot aq, ge.

²⁸Nyang lyis chamus housoeh taiq zis gas kihgus mas bang hank eq ma seq.

²⁹Yesu nyang lyis housoeh taiq zis gas, Yudas gas ngwis zom soeu nghuot las, Yesu gas nyang lyis pwe xiklyis yang chi chah zis e wis aq, nghuot ya nyungs bang lyis dvja ja dyei aq, ge soh bos ge nyamoq dvyhamh nghamh.

³⁰Yudas hauh ohlhyoq dvkoeuq lhom yoeus yah dvyih thuq loh. Hauh shishenh gas nyenhyo nghuot.

³¹Hauh soeu thuq loh thang lhyi Yesu gas, Gvshih cangsoeu Lo gas chungh zis xauh nyeis las, Mangso eq nyang mas phunk lyis chungh zis xauh goeus.

³²Mangso ka, nyang mas phunk lyis chungh zis xauh goeus ya, Mangso eq nyang lyis nyang nyang mas phunk lyis chungh zis xauh las, nyang lyis gvshih nyang chungh dyei das.

³³Loshang jens eh, ngos namoq yah dvsoq nyeis shih das: Namoq ngos lyis tsain xo das: ngos loh joqyos mas namoq ma yoh jweh das oen Yuda jens lyis taiq teh, gvshih ngos namoq lyis eq taiq.

³⁴Housoeh namoq dvyuk yah dvyuk jyetdap goh nyeis geh, oen tyingtoh dang saiq ngos namoq lyis dyei toh. Ngos namoq lyis jyetdap zis yah dvyhangteh, namoq eq nyang changh nyang jyetdap goh nyeis das.

³⁵Housoeh namoq dvyuk yah dvyuk jyetdap ehnyet bos nyeis lyis gas, namoq ngah changlo jens nghuot nyeis zis gas, dius dvnganh yoh seq los das, ge.

³⁶Simon Petru nyang lyis taiq, Yhensain eh, nvng khapheh loh lo das lah, ge. Yesu nyang lyis phuk taiq zis gas, Ngos loh das joqyos mas nvng gvshih ma yoh chank das, thang pheh dvyoh chank das, ge.

³⁷Tsai, Petru gas, Yhensain eh, ngos nvng yah dvgeh gvshih chamus ma yoh chank das lah? Ngos nah xiklyis ngah kang yoh dyei tyamp, ge.

³⁸Yesu nyang lyis phuk taiq zis gas, Nvng ngah xiklyis nah kang yoh dyei das lhyeh? Ngos nvng lyis jyoengh taiq bah, gyoq ma tuon shih lyis nvng ngos lyis somh lhain he tyamp das, ge.