Read Achang YOHAN 14 Bible Online

YOHAN 14 - Achang bible

YOHAN 14

¹Namoq ehnyet vnyo goh: Mangso lhyi lomsjingh geh, ngos lyis eq lomsjingh geh.

²Ngah Uwus dah yhen mha joqyos nyoshoq bos: hauh zis ma joq lyis gas, Ma joq oen ngos namoq lyis taiq goeus jvng goeus; khasoeh ge lyis namoq nyhenshang joqyos sont das xiklyis ngos loh das.

³Ngos loh las namoq xiklyis joqyos sont toh las, ngos nyeis jang mas namoq eq yoh nyeis shoq, ngos doms lyih las namoq lyis ngah jyank mas shwih yoeus das.

⁴Ngos loh dah joqyos mas loh das cho namoq seq, ge.

⁵Thoma nyang lyis taiq zis gas, Yhensain eh, nvng khapheh loh das zis eq ngamoq ma seq zis, cho khasoeh seq das lah, ge.

⁶Yesu nyang lyis taiq zis gas, Ngos gas cho eq, jyoeng zis eq, kang eq nghuot. Ngos masyah ma nghuot lyis gas ngah Uwus jyank mas hank eq ma yoh jweh.

⁷Namoq ngos lyis seq goeus lyis gas, ngah Uwus lyis eq seq goeus. Gvshih masyah namoq, nyang lyis seq goeus, nyvng eq tsain nyvng goeus, ge.

⁸Philip nyang lyis taiq zis gas, Yhensain eh, ngamoq lyis Uwus Chixoeuq aq, housoeh lyis ngamoq nhaiqtap das, ge.

⁹Yesu nyang lyis taiq zis gas, Yuda eh, ngos namoq yah heinyhank nyangh shoq nyeis los goeus lyis eq nvng ngos lyis ma seq lhyeh? Ngos lyis nyvng ku soeu ka Uwus lyis eq nyvng ku goeus. Housoeh lyis, Ngamoq lyis Uwus Chixoeuq aq, oen khasoeh taiq lah?

¹⁰Ngos gas Uwus mas nyeis zis yahge Uwus eq ngos mas nyeis zis lyis nvng ma jingh lhyeh? Ngos namoq lyis taiq dah dang gas ngah ehnyet yah taiq dah dang ma nghuot, ngos mas bos dah ngah Uwus gas, hauh muh lyis nyang kuot nyeis.

¹¹Ngos gas Uwus mas nyeis zis yahge Uwus gas ngos mas nyeis zis lyis lomsjingh nyeis geh, nghuot ya hauh muh masyah khvlangh ngos lyis lomsjingh geh.

¹²Ngos namoq lyis jyoengh taiq bah, ngos lyis lomsjingh soeu ka, ngos kuot dah muh lyis nyang eq yoh kuot das. Hauh thoq lyis zes dah muh eq yoh kuot das: khasoeh ge lyis ngos gas ngah Uwus jyank mas loh das.

¹³Housoeh Uwus gas Lo mas phunk yoh chungh shoq, ngah nyings yoeus las namoq cha dung lyis ngos kuot dyei das.

¹⁴Namoq ngah nyings yoeus las ngah jyank mas dvja ja dung lyis ngos kuot dyei das.

¹⁵Namoq ngos lyis jyetdap nghuot lyis gas, ngah tyingtoh dang lyis chank kuot geh.

¹⁶Ngos gas Uwus jyank masyah dung das. Uwus gas namoq yah vcaiq vto nyeis das dah gohtoeu Nhaiqtaink Soeu dvyuk namoq lyis dyei das.

¹⁷Mungkvn gas hau jyoeng dah Dyos lyis ma nyvng ma seq yvmvyah ma tsain lhom yoeus. Namoq gas nyang lyis seq: khasoeh ge lyis nyang gas namoq yah dvgeh nghuot, namoq mas nyeis das.

¹⁸Ngos namoq lyis chauhlo lyis teh she tyamp toh das zis ma nghuot, ngos namoq jyank mas doms lyih das.

¹⁹Dvsoq lyis mungkvn gas ngos lyis ma nyvng kat das. Nghuot laus eq namoq gas ngos lyis nyvng shih das: khasoeh ge lyis ngos dwis nyeis yvmvyah namoq eq dwis nyeis das.

²⁰Ngos gas ngah Uwus mas nyeis, namoq eq ngos mas nyeis las, ngos eq namoq mas nyeis zis lyis hauh nyeihyo namoq yoh seq das.

²¹Ngah tyingtoh dang yoh yoeus las chank kuot soeu ka ngos lyis jyetdap soeu nghuot. Ngos lyis jyetdap soeu lhyi ka ngah Uwus eq jyetdap das. Ngos eq nyang lyis jyetdap zis yah ngvnyang gungs nyang, nyang lyis chixoeuq das, ge.

²²Iskarot ma nghuot dah soeu Yuda nyang lyis taiq zis gas, Yhensain eh, nah gungs nvnyang ngamoq lyis Chixoeuq las mungkvn lyis ma chixoeuq das zis gas chamus lah, ge.

²³Yesu nyang lyis phuk taiq zis gas, Ngos lyis jyetdap soeu nghuot lyis gas, ngah dang lyis chank kuot das: ngah Uwus eq hauh soeu lhyi jyetdap das. Ngamoq gas hauh soeu jyank mas e lha nyang yah dvgeh nyeis das.

²⁴Ngos lyis ma jyetdap soeu ka, ngos taiq toh dang ma yoh chank: namoq xauhgyo yoeus dah dang gas ngah dang ma nghuot, ngos lyis nhang kat soeu, ngah Uwus dah dang dvnghuot.

²⁵Ngos namoq yah dvgeh nyeis shih uhlyis ngos namoq lyis haih dang taiq toh.

²⁶Ngah Uwus ngah nyings masyah nhang kat das dah Nhaiqtaink soeu ge dah Gyingshang Dyos gas, namoq lyis dvnganh yah jyauh las, namoq lyis ngos taiq toh dang dvnganh yah soh nhang das.

²⁷Nyenstap cho ngos namoq lyis toh toh dyei. Ngah nyenstap zis ngos namoq lyis dyei goeus: mungkvn mas bang dyei yhangteh ngos namoq lyis dyei zis ma nghuot. Namoq ehnyet vnyo goh, gyuk eq vgyuk goh.

²⁸Ngos loh las namoq jyank mas doms lyih das oen lha, ngos namoq lyis taiq zis gas, namoq xauhgyo goeus. Namoq ngos lyis jyetdap nghuot lyis gas, Uwus jyank mas ngos loh yvmvyah namoq gaus das: khasoeh ge lyis Uwus gas ngah thoq lyis zes kuh.

²⁹Hauh muh bweh thuq los uhlyis namoq yoh lomsjingh bas jungh oen, ma bweh los shih lyis yah ngos namoq lyis taiq toh.

³⁰Gvshih masyah ngos namoq yah dang nyangh shoq ma xauh jis goh lo das: khasoeh ge lyis mungkvn zau gas jweh los nyeis. Hauh soeu ngah thoq mas chah yomsoq eq ma bos.

³¹Ngos ngah Uwus vmingh dyei zis yah dvyhangteh kuot zis gas, ngos ngah Uwus lyis jyetdap cho mungkvn yoh seq das xiklyis nghuot. Toq geh, hei mhayah loh lo goh, ge.