Read Achang YOHAN 16 Bible Online

YOHAN 16 - Achang bible

YOHAN 16

¹Namoq ehnyet ma dyet bas jungh oen, haih goeu ngos namoq lyis taiq.

²Nyamoq gas namoq lyis lyi jungs masyah khat thuq tyamp das: jyoengh nyang namoq lyis yoh sat soeu hank laus eq Mangso lhyi phuqsoe dah muh wons nyeis ge nghamh dah shishenh jweh los das.

³Nyamoq namoq lyis housoeh tsain kuot zis gas, nyamoq gas ngah Uwus lyis eq ma seq, ngos lyis eq ma seq yvmvyah nghuot.

⁴Nghuot laus eq shishenh jweh lyis ngos namoq lyis taiq toh zis soh bas jungh oen, haih dang ngos namoq lyis taiq. Xikpheh gas ngos namoq yah dvgeh nyeis shih yvmvyah ngos namoq lyis heisoeh ma taiq ku.

⁵Gvshih gas ngos lyis nhang kat soeu jyank mas ngos loh das: namoq gas dvyuk eq ngos lyis, Nvng khapheh loh das lah, ge ma nyei.

⁶Nghuot laus eq haih cho ngos namoq lyis taiq kyoh yvmvyah, namoq nhaiqlom mas nhaiqngis zis yah tsain dyingh joq.

⁷Heisoeh oen laus eq, ngos namoq lyis jyoeng cho dvtaiq. Ngos loh zis gas namoq xiklyis zes gis cho nghuot: khasoeh ge lyis, ngos ma loh lyis gas hau Nhaiqtaink soeu namoq jyank mas jweh los das zis ma nghuot. Ngos loh khau yah, ngos nyang lyis namoq jyank mas dvyoh nhang kat das.

⁸Hauh soeu jweh lyis, nyang gas, yobos cho, dan cho, soetuon cho, mungkvn lyis dede chixoeuq das.

⁹Yaunos yoh cho chixoeuq das zis gas, nyamoq ngos lyis ma lomsjingh yvmvyah nghuot.

¹⁰Dan cho chixoeuq das zis gas, ngos ngah Uwus jyank mas loh las namoq ngos lyis ma nyvng lo yvmvyah nghuot.

¹¹Soetuon cho chixoeuq das zis gas, haih mungkvn zau lyis soetuon goeus yvmvyah nghuot.

¹²Ngos namoq lyis taiq khoq das cho nyoshoq bos shih, nghuot laus eq gvshih namoq ma thoq kham yoeus shih.

¹³Nghuot laus eq hai jyoeng dah Dyos jweh lyih lyis, nyang gas jyoeng cho dvnganh namoq lyis cho she das. Hauh soeu ka nyah ehnyet yah taiq zis ma nghuot, nghuot laus eq xauhgyo yoeus nyhoq taiq kyoh das. Bweh los das zis lyis nyang namoq lyis chixoeuq das.

¹⁴Nyang ngos lyis chungh das: khasoeh ge lyis, nyang gas ngah jyank masyah lhom yoeus zis lyis namoq lyis taiq kyoh das.

¹⁵Ngah Uwus yoh ya yoh zis gas ngos yoh zis nghuot. Housoeh las nyang ngah jyank masyah yoeus las namoq lyis taiq kyoh das, oen ngos taiq goeus.

¹⁶Dvsoq lho lhyi namoq ngos lyis ma nyvng lo das, dvsoq lho lhyi doms nyvng das: khasoeh ge lyis ngos Uwus jyank mas loh das.

¹⁷Housoeh nyah changlo jens dvyhamh nyang changh nyang taiq goh zis gas, Dvsoq lho lhyi namoq ngos lyis ma tsain nyvng lo das, dvsoq lho lhyi doms nyvng das ge eq, Uwus jyank pheh ngos loh das ge las eq, nyang yang lyis taiq zis gas cha ge dah dang nghuot au lhyeh, ge.

¹⁸Tsai, nyamoq gas, Dvsoq lho lhyi ge taiq zis eq, cha ge dah dang nghuot au lhyeh? Nyang taiq dang lyis yang ma seqgyo, ge.

¹⁹Nyang lyis tsain nyei mes yvlyis Yesu seq las nyang gas, Dvsoq lho lhyi namoq ngos lyis ma nyvng lo das, dvsoq lho lhyi doms nyvng das, oen ngos namoq lyis taiq dang lyis namoq nyang changh nyang tsain nyei goh nyeis goh lhyeh?

²⁰Ngos namoq lyis jyoengh taiq bah, namoq gas ngausdyeis ngausnhvp yah kuk nyeis uhlyis mungkvn gas gaus nyeis das. Namoq nhaiqkuk nhaiqngis zis xauh laus eq, namoq dah kuk cho ka gaus yvpheh lhain los das.

²¹Vmesbih gas lo khoeu das lyis nyah shishenh jweh las nos nyeis; nghuot laus eq lo dye khoeu thang lhyi, haih mungkvn mas dius lo dvyuk khoeu toh goeus yvmvyah, gaus las xik lyis dah nos zis, chiqjyen zis tohnyhik tyamp.

²²Houyah dvyhangteh namoq gvshih nhaiq tsain kuk nyeis. Nghuot laus eq namoq yah ngos doms xauhgoh las, namoq gausyis das. Hau namoq dah gausyis zis lyis hank yoh lhuot yoeus das zis ma nghuot.

²³Hauh buisnyeis lyis namoq ngos lyis cha eq ma nyei chah lo das. Ngos namoq lyis jyoengh taiq bah, ngah nyings masyah Uwus jyank mas dvja ja dung lyis, nyang namoq lyis dyei das.

²⁴Gvshih jweh shoq namoq ngah nyings yoeus las cha eq ma dung yoeuh ku shih. Namoq dah gausyis cho dyingh nyuk los shoq yoh bas jungh, dung nyeis geh.

²⁵Haih cho ngos namoq lyis dangtoeuq yah taiq kyoh ku goeus: Dangtoeuq yah ma nghuot nghuot, Uwus dah cho namoq lyis bvng bvng taiq kyoh das shishenh gas jweh los goeus:

²⁶Hauh buisnyeis lyis namoq ngah nyings yoeus las tsain dung das. Namoq dah xiklyis ngos ngah Uwus jyank mas dung das oen lha ma taiq.

²⁷Khasoeh ge lyis, namoq ngos lyis jyetdap las ngos gas Uwus jyank masyah los yvlyis namoq lomsjingh yvmvyah Uwus nyang namoq lyis jyetdap.

²⁸Ngos gas Uwus jyank masyah mungkvn mas jweh los goeus: Tsai, mungkvn lyis tyamp las Uwus jyank mas loh das, ge.

²⁹Nyah changlo jens nyang lyis taiq zis gas, Yoeuh aq, gvshih gas dangtoeuq yah ma nghuot, nvng bvng bvng taiq goeus:

³⁰Nvng dvnganh zis seq nyeis zis eq, hank eq nvng lyis cha ma nyei chah zis eq, gvshih ngamoq seq goeus. Housoeh las nvng Mangso jyank masyah jweh lyih zis lyis ngamoq jingh goeus, ge.

³¹Yesu phuk taiq zis gas, Namoq gvshih jingh goeus lah?

³²Yoeuh aq, namoq nyang yuk nyang toeu yhen pheh dyos loh das las, ngos lyis kyingh toh khoq das dah shishenh jweh los das. Gvshih nyang jweh joq goeus, nghuot laus eq ngos gas ngvnyang kyingh ma nghuot, Uwus gas ngos yah dvgeh nghuot.

³³Namoq ngos mas nyenstap zis yoh yoeus bas jungh oen, haih dang ngos namoq lyis taiq. Namoq gas mungkvn mas shanghsenh zis tsain xauh das, nghuot laus eq gaus nyeis geh. Ngos gas mungkvn lyis ung tyamp goeus, ge.