Read Achang YOHAN 17 Bible Online

YOHAN 17 - Achang bible

YOHAN 17

¹Yesu hauh dang dye taiq lyis, maukhung mha nghank yoeuh las taiq zis gas, Uwus eh, shishenh jweh goeus.

²Nvng Lo lyis dyei toh zis dvnganh lyis vcaiq vto kang dyei das xiklyis suihshoh bos bang dvnganh thoq mas guon das vmingh dyei toh zis yah dvyhangteh, nah Lo gas nah phunk lyis chungh bas jungh, nah Lo dah phunk lyis chungh dyei aq.

³Dvyuk kyingh nghuot las jyoeng dah Mangso nvng lyis eq, nvng nhang kat dah Yesu Khristu lyis eq, nyamoq yoh seq yoeus zis gas, vcaiq vto kang nghuot.

⁴Ngos wons wuq das xiklyis nvng ngos lyis kyauh toh dah muhzoh lyis ngos dye wons wuq goeus yvmvyah, nyeisjvng thoq mas nah phunk lyis chungh dyei goeus.

⁵Uwus eh, mungkvn ma joq shih lyis, nvng yah dvgeh ngos yoh joq dah phunk yah gvshih ngos lyis phunk chungh dyei aq.

⁶Mungkvn mas nvng ngos lyis kyauh toh dah dius jens lyis ngos nah nyings chixoeuq goeus. Nyamoq gas nah dius jens nghuot las, nvng ngos lyis nyamoq dyei toh. Nyamoq nah dang tsain chank kuot goeus.

⁷Nvng ngos lyis dyei ya dyei zis dvnganh nah jyank masyah nghuot zis gas gvshih nyamoq seq goeus.

⁸Khasoeh ge lyis nvng ngos lyis dyei kat dang, ngos nyamoq lyis dyei goeus las, nyamoq eq hauh yvlyis lhom yoeus goeus yvmvyah, nah jyank masyah ngos lyih zis nyamoq vlhomuh seq las, nvng ngos lyis nhang kat zis lyis eq lomsjingh goeus.

⁹Ngos nyamoq dah xiklyis dung: mungkvn xiklyis dung zis ma nghuot; nvng ngos lyis dyei bang xiklyis dvdung. Khasoeh ge lyis nyamoq gas nah dius tsain nghuot.

¹⁰Ngos yoh ya yoh zis gas nah zis nghuot; nvng yoh ya yoh zis eq ngah zis nghuot las, ngah phunk gas nyamoq mas chungh zis xauh goeus.

¹¹Gvshih masyah ngos gas mungkvn mas ma nyeis lo: nghuot laus eq haih moq gas mungkvn mas nyeis nyeis das bang nghuot, ngos gas nah jyank mas los das zis nghuot. Gyingshang dah Uwus eh, yamoq gas dvkoeuq kyingh dvnghuot teh, haih bang nghuot nyeis bas jungh. Nvng ngos lyis dyei bang lyis nah nyings mas goeng toenk nhang toh aq.

¹²Haih mungkvn mas ngos nyamoq yah dvgeh nyeis uhlyis, nvng ngos lyis dyei bang mas nah nyings goeng toenk nhang lha, nyamoq lyis gomh kat goeus. Nyamoq mas dyoqbis soeu dah lo masyah lai las gohyuk gas dvyuk eq ma dyoq ma bis loh zis nghuot. Hauh soeu dyoqbis loh zis gas lhaihtoh dang nyuk los das xiklyis nghuot.

¹³Gvshih gas ngos nah jyank mas los das las, ngah gausyis zis gas nyamoq mas nyuk los bas jungh oen lha, mungkvn mas ngos haih dang taiq toh.

¹⁴Nah dang ngos nyamoq lyis dyei toh goeus: ngos gas mungkvn mas zis ma nghuot zis yah dvyhangteh, hauh moq eq mungkvn mas zis ma nghuot yvmvyah mungkvn gas nyamoq lyis hoeng.

¹⁵Haih bang lyis mungkvn masyah tyungh yoeus das xiklyis ngos dung nyeis zis ma nghuot, ma gis ma shop yvmvyah gomh das xiklyis ngos dvdung.

¹⁶Ngos gas mungkvn mas zis ma nghuot zis yah dvyhangteh, nyamoq eq mungkvn mas zis ma tsain nghuot.

¹⁷Nah dang gas jyoeng zis nghuot, nah dah jyoeng cho mha nyamoq lyis gyingshang nhang aq.

¹⁸Nvng ngos lyis mungkvn mas nhang kat yhangteh ngos eq nyamoq lyis mungkvn mas tsain nhang kat.

¹⁹Nyamoq nyang jyoeng cho mha gyingshang nyeis bas jungh oen lha, ngos gas nyamoq xiklyis ngvnyang gungs ngvnyang gyingshang nhang toh goeus.

²⁰Haih bang xiklyis kyingh ngos dung zis ma nghuot: nyamoq taiq kyoh dah dang gvng masyah ngos lyis lomsjingh los das bang xiklyis eq ngos dung.

²¹Uwus eh, nvng gas ngos mas nghuot las, ngos eq nvng mas nghuot zis yah dvyhangteh hauh bang dvnganhmoq gas yamoq mas dvkoeuq kyingh duot las, nvng ngos lyis nhang kat cho lhyi haih mungkvn yoh lomsjingh das xiklyis nyamoq dvnganhmoq gas dvkoeuq kyingh duot los bas jungh.

²²Yang gas dvkoeuq kyingh dvnghuot teh nyamoq eq dvkoeuq kyingh bweh las, nvng ngos lyis dyei toh dah nyoqnho ngelang gas ngos nyamoq lyis dyei toh.

²³Ngos gas nyamoq mas nghuot las, nvng gas ngos mas nghuot yhangteh, nyamoq lyis eq dvkoeuq kyingh mas goeng toenk zis xauh las, nvng ngos lyis jyetdap teh nyamoq lyis eq jyetdap las, nvng ngos lyis nhang kat zis haih mungkvn yoh seq bas jungh.

²⁴Uwus eh, mungkvn ma joq shih lyis yah nvng ngos lyis jyetdap nyeis yvmvyah, nvng ngos lyis dyei toh phunk lyis, nvng ngos lyis dyei toh bang eq yoh nyvng bas jungh. Ngos nyeis joqyos mas nyamoq ngos yah dvgeh yoh nyeis das xiklyis ngos o mes.

²⁵Dan dah Uwus eh, mungkvn gas nvng lyis ma seq laus eq, ngos gas seq nyeis. Nvng ngos lyis nhang kat zis gas haih bang eq seq.

²⁶Nvng ngos lyis jyetdap ehnyet gas, nyamoq jyank mas joq joq bas jungh, oen eq, ngos nyamoq jyank mas vjangh nyeis nyeis das xiklyis eq, nah nyings ngos nyamoq lyis seq nhang goeus las, seq nhang nyeis das, ge.