Read Achang YOHAN 18 Bible Online

YOHAN 18 - Achang bible

YOHAN 18

¹Yesu hauh dang dye taiq lyis, nyah changlo jens yah dvgeh thuq las, Kidron lvng thyitvp pheh tsain goeu e. Hauh yvmas khyam bos las, nyang gas changlo jens yah houmha wvng loh.

²Yesu gas nyah changlo jens yah dvgeh houmha nyoshoq lhain e ku lha, nyang lyis phanhlyen dah Yudas eq hauh joqyos lyis seq toh.

³Housoeh las Yudas gas jes dvphung yah, phudyei bang yahge Pharishe moq jyank masyah jeszau jens lyis xauh shwih lho lhyi, nyibung, nyiduk, jeszis chi lha hou pheh tsain e loh.

⁴Yesu gas nyang mas bweh los nyeis dah cho dvnganh seq yvmvyah, e lha nyamoq lyis taiq zis gas, Namoq hank lyis xo goh lah, ge.

⁵Nyamoq, nyang lyis phuk taiq zis gas, Nazaret Yesu lyis xo, ge. Nyang nyamoq lyis taiq zis gas, Ngos gas hauh soeu nghuot, ge. Nyang lyis phanhlyen dah Yudas eq hauh bang yah dvgeh yap joq.

⁶Nyang nyamoq lyis, Ngos hauh soeu nghuot goeus ge las taiq yah dvyih hauh bang gas nungsjik jik las nyeisjvng mas lains loh.

⁷Nyang gas, Hank lyis xo goh lah, ge nyamoq lyis doms nyei. Nyamoq gas, Nazaret Yesu lyis xo, ge doms tsain taiq.

⁸Yesu phuk taiq, Ngos hauh soeu nghuot goeus oen ngos namoq lyis taiq goeus: ngos lyis xo nghuot lyis gas, haih bang gas loh lo bas jungh, ge.

⁹Hauh zis gas, Nvng ngos lyis dyei goeus yvmas, dvyuk lyis eq ma dyuk nhang, ge taiq dah dang nyuk los das xiklyis nghuot.

¹⁰Simon Petru gas moengsa wons toh las, moengsa she lha Phudyei Zainsmuh jyeidwis dah loqyos no lyis zan thyet khyoq kat. Hauh jyeidwis dah nyings gas Malkho, ge.

¹¹Yesu Petru lyis taiq zis gas, Nah moengsa lhyi dyvng mas cank toh aq: ngah Uwus ngos lyis dyei toh kom lhyi ngos ma shuk das lhyeh, ge.

¹²Hauh uhlyis jeslo jens, jeszau phoq yahge Yuda jens dah vgyis moq gas Yesu lyis nyhik las twih she loh.

¹³Housoeh hauh zvnyo Phudyei Zainsmuh bweh los dah Anna jyank mas cangxeih shwih loh. Khasoeh ge lyis nyang gas Kayapa dah yukphoq nghuot.

¹⁴Hau Kayapa ka, Vnyau xiklyis dius dvyuk shei lhyi zes gis, ge Yuda jens lyis joeui dyei soeu nghuot.

¹⁵Simon Petru yahge gohtoeu changlo dvyuk gas, Yesu thang mha chank loh. Hau gohtoeu changlo lyis Phudyei Zainsmuh seq las, Yesu yah dvgeh Phudyei Zainsmuh dah ganthoq mas wvng loh.

¹⁶Petru gas nghe shot pheh khomhdwang mas yap joq khoq. Housoeh las Phudyei Zainsmuh yah seq goh dah changlo gas thuq loh las, khomh zungh vmesbih lyis taiq lho lha Petru lyis shwih hwank kat.

¹⁷Khomh zungh vmesbih gas Petru lyis, Nvng eq hauh soeu dah changlo mas zis dvyuk nghuot lhyeh, ge. Petru gas, Ma nghuot, ge toeuh.

¹⁸Hauh uhlyis ngamh las vgyis moq dah jyeidwis jens gas nyi khat las nyi tsain gvng yap joq. Petru eq hauh bang yah dvgeh yap las nyi bos gvng nyeis.

¹⁹Phudyei Zainsmuh gas Yesu lyis nyah changlo dah cho yahge nyang jyauh cho nyei yoeuh.

²⁰Yesu nyang lyis phuk taiq zis gas, Mungkvn mas ngos debangh taiq goeus. Yuda jens huom dah lyi jungs mas eq, yhenmuh mas eq ngos vjangh jyauh goeus: ngos vkhauh vguis cha eq ma jyauh.

²¹Nvng ngos lyis chamus nyei? Ngos khasoeh jyauh zis gas xauhgyo bang lyis nyei yoeuh aq, ngos taiq dang lyis nyamoq seq, ge.

²²Housoeh ge taiq lho lhyi, vyvm mas yap joq dah vgyis dvyuk gas Yesu lyis tyuk las, Phudyei Zainsmuh iq yvlyis nvng housoeh toeuh das lhyeh, ge.

²³Yesu nyang lyis phuk taiq zis gas, Ngos taiq dang ma gis lyis gas ma gis oen kanghjyoeng kat aq. Ngos dang gis dvtaiq lyis, ngos lyis chamus tyuk, ge.

²⁴Housoeh las Anna gas, Nyang lyis Phudyei Zainsmuh Kayapa jyank mas she kat nhang.

²⁵Simon Petru gas nyi gvng yap joq. Hauh uhlyis nyamoq gas, Nvng eq nyah changlo jens mas zis dvyuk vnghuot lah, ge nyang lyis nyei. Nghuot laus eq Petru gas, Ngos ma nghuot, ge he.

²⁶Petru no hwe thyet dyei soeu yah vmang vnoeuh doeusgoh soeu Phudyei Zainsmuh dah jyeidwis dvyuk eq nyang lyis, Khyam mha ngos nvng lyis hauh soeu yah dvgeh nyvng khoq ma nghuot lhyeh, ge nyei.

²⁷Housoeh las Petru doms he nyeis lyis houjang gyoq tuon los.

²⁸Tsai, nyamoq gas Yesu lyis Kayapa jyank masyah Pretori soetuon yvpmuh pheh e shwih kat. Hauh shishenh gas nvpsangh noq yah nghuot. Nyamoq gas hau Lhuiq Kat Pwe zo das zis nghuot yvmvyah, nyamoq dah gungs vwot v-oeu ma bweh das xiklyis nyamoq nyang gas hauh yvpmuh mas ma wvng.

²⁹Housoeh las Pilat gas, nyamoq nyeis yvmas thuq loh las, Namoq haih soeu lhyi kauq zis cha nghuot goh lah, ge nyei.

³⁰Nyamoq, nyang lyis phuk taiq zis gas, Haih soeu ma gis dah muh kuot soeu ma nghuot lyis gas ngamoq nah jyank mas shwih lyih das zis ma nghuot, ge.

³¹Pilat nyamoq lyis taiq zis gas, Namoq, nyang lyis shwih yoeus las namoq dah lyi yah dvyhangteh soetuon geh, ge. Yuda jens nyang lyis taiq zis gas, Ngamoq gas hank lyis sat das dah lyi ma bos, ge.

³²Nyamoq housoeh ge zis gas, Yesu nyang khasoeh teh dah cho yah xauh shei kham das, ge dah vlho chixoeuq las taiq toh dang nyuk los das xiklyis nghuot.

³³Housoeh las Pilat gas Pretori soetuon yvpmuh khau mha doms wvng loh las Yesu lyis khi yoeus, nyei zis gas, Nvng Yuda hwankti nghuot lhyeh, ge.

³⁴Yesu nyang lyis phuk taiq zis gas, Hauh zis gas nvnyang nyei lah? Gohyuk yah ngah cho nvng lyis taiq kyoh lah, ge.

³⁵Pilat phuk taiq zis gas, Ngos Yuda dius nghuot lhyeh? Nah dius jens yahge phudyei uhjyung jens gas nvng lyis ngah jyank mas lyih kyauh toh. Nvng cha zangh kuot lah, ge.

³⁶Yesu phuk taiq zis gas, Ngah munghdan haih mungkvn mas zis ma nghuot. Ngah munghdan haih mungkvn mas zis nghuot lyis gas, ngos Yuda dius loq mas ma wvng shoq ngah changlo jens zau das: gvshih gas ngah munghdan heimha ma nghuot, ge.

³⁷Housoeh las Pilat nyang lyis taiq zis gas, Housoeh lyis nvng hwankti nghuot lhyeh, ge nyei. Yesu gas, Nvng taiq zis yah dvyhangteh ngos hwankti nyang nghuot. Housoeh jyoeng shot pheh kanghjyoeng kat das xiklyis ngos khoeu los, mungkvn mas jweh los. Jyoeng cho yah sen bang dvnganh gas ngah thwe tsain gyo, ge.

³⁸Pilat nyang lyis taiq zis gas, jyoeng ge zis cha nghuot lah, ge. Housoeh Yuda jens jyank pheh doms thuq loh las, ngos haih soeu mha cha yobos eq ma nyvng.

³⁹Nghuot laus eq Lhuiq Kat Pwe mha namoq lyis ngos dius dvyuk lyis lhuiq kat dyei dah thungh namoq mas joq zis yah dvyhangteh, Yuda hwankti lhyi vlhuiq kat dyei nhang mes lah, ge.

⁴⁰Nyamoq kaiq sang zis gas, Hauh soeu lhyi ma nghuot, Baraba lyis lhuiq kat dyei aq, ge. Baraba gas khyanktau nghuot.