Read Achang YOHAN 2 Bible Online

YOHAN 2 - Achang bible

YOHAN 2

¹Hauh thang lhyi somh vnyeih lyis Galile mau Kana wukhau mha nyihwank pwe bos. Yesu dah ungwes eq houmha nyeis.

²Yesu yahge nyah changlo jens lyis eq hauh nyihwank pwe mha tsain khi.

³Zvbiq thank tyamp las Yesu ungwes gas nyang lyis, Nyamoq zvbiq ma bos lo ge taiq kyoh.

⁴Yesu nyang lyis taiq zis gas, Vmesbih eh, nvng ngos lyis chamus los taiq lah? Ngah shishenh ma jweh shih, ge.

⁵Yesu dah ungwes eq, Nyang kuot nhang zis dvnganh yah kuot geh, ge jyeidwis jens lyis taiq toh.

⁶Yuda thungh yah dvyhangteh cheihshang das xiklyis aiq somhci galan wvng dah luk yammuh khyuk lom joq.

⁷Yesu nyamoq lyis taiq zis gas, Haih yammuh goeu mas jeis tyink geh, ge. Nyamoq eq yammuh mas jeis dyingh shoq tsain kham kat.

⁸Nyang nyamoq lyis taiq zis gas, Gvshih pwe jangzoe lyis loh khoeuh dyei aq, ge zis yah dvyhangteh tsain kuot.

⁹Pwe jangzoe gas hauh zvbiq jeis bweh nhang dah jeis lyis chaq yoeuh las, hauh jeis khoeuh los dah jyeidwis jens gas zvbiq jeis kha mhayah yoh zis seq laus eq pwe jangzoe gas ma seq yvmvyah, loloeu saiq lyis khi lha,

¹⁰Yuk khanghmuh zvbiq jeis nghamh shih jo shoq gvm shuk thang lhyi zvbiq jeis phih dvgyangh dyei; nvng gas zvbiq jeis nghamh lyis gvshih jweh shoq tsomh toh, ge.

¹¹Yesu gas cangxeih vlhain dah vlho lhyi hai Galile, Kana mha Chixoeuq las, nyah phunk nyvng nhang lha, nyah changlo jens eq nyang lyis lomsjingh.

¹²Hauh thang lhyi Yesu yahge nyah ungwes, nyah vnoeuh moq, nyah changlo jens yah dvgeh Kaperna-um wus pheh loh las houmha dvyoq dvnyeis.

¹³Yuda jens dah Lhuiq Kat Pwe ni los nyeis goeus las, Yesu gas Yerusalem pheh doq loh.

¹⁴Yesu gas yhenmuh mas noeu, yvng yahge khotjyauh ungh bang, ngwis thaiq zo bang tsung toh yvlyis nyvng lyis,

¹⁵twih lvxuk kuot las, houmha ungh bang, noeu, yvng, khotjyauh dvnganh zis lyis yhenmuh masyah khat thuq tyamp; kihgus lyis eq toeu phanh tyamp.

¹⁶Khotjyauh ungh bang lyis taiq zis gas, Haih zisyos lyis yoeus loh geh, ngah Uwus dah yhen lhyi soenghi yhen vtsain kuot nyeis goh, ge.

¹⁷Yhensain dah yhen mha nhaiq kank wvng dah ehnyet gas ngos lyis zo tyamp das ge lhaih toh zis lyis hauh uhlyis changlo jens nghamh soh los.

¹⁸Yuda jens nyang lyis phuk taiq zis gas, Heisoeh teh kuot zis gas, ngamoq lyis chah vlho chixoeuq lah, ge.

¹⁹Yesu nyamoq lyis taiq zis gas, Haih yhenmuh lyis thyoq tyamp geh; ngos somh nyeih lyis doms toeu toq das, ge.

²⁰Yuda jens nyang lyis taiq zis gas, Haih yhenmuh lyis nyeici khyuk zvn tsuk zis lyis nvng gas somh nyeih lyis yoh toeu shap das lah, ge.

²¹Nyang housoeh taiq zis gas, nyah gungs ge dah yhenmuh lyis toeuq las taiq zis nghuot.

²²Housoeh yvmvyah, shei yvmvyah dwis toq los thang lhyi, nyah changlo jens gas nyang taiq toh dang lyis doms soh las, lhaihtoh dang lyis eq, Yesu taiq dang lyis eq tsain lomsjingh.

²³Lhuiq Kat Pwe yoq lyis Yesu gas Yerusalem mas nyeis uhlyis nyang chixoeuq dah vlho lhyi tsain nyvng las, nyoshoq moq nyah nyings mas lomsjingh.

²⁴Nghuot laus eq Yesu gas nyamoq lyis ma loms: Khasoeh ge lyis nyang gas dius dvnganhmoq lyis seq toh.

²⁵Dius dah ehnyet khau mha bos zis lyis nyang seq yvmvyah, dius cho lhyi kanghjyoeng hank eq ma kat dyei noh.