Read Achang YOHAN 20 Bible Online

YOHAN 20 - Achang bible

YOHAN 20

¹Dvdaus dah cangxeih vnyeih, nvpsangh nyoq ma nyvng shih lyis Magdala Mari gas, lop pheh e loh las lop mas dah lukzains ywi joq yvlyis nyvng.

²Housoeh las nyang gas Simon Petru yahge Yesu jyetdap dah changlo jens jyank mas wuih loh las nyamoq lyis taiq zis gas, Yhensain lhyi lop masyah nyamoq yoeus las khalhye toh tyamp zis eq ngamoq ma seq, ge.

³Housoeh las Petru yahge gohtoeu changlo gas lop pheh tsain e.

⁴Nyah aiq yuk dvgeh tsain wuih loh lyis hau gohtoeu changlo gas Petru lyis wuih lhyweq las nyang shih lop mas jweh e.

⁵Nyang gop yoeuh lyis misseh joq zis lyis dvnyvng. Nghuot laus eq nyang gas vkhau mha ma wvng e.

⁶Simon Petru eq nyah thang mha chank loh las houmha jweh lyis, vkhau pheh wvng yoeuh laus eq, joq dah misseh lyis kyingh dvnyvng.

⁷Jeimuh mis joq zis eq, uhloms mas dah shoeuhkyenh gas misseh yah dvgeh ma nghuot nghuot, gohtoeu nap toh zis eq nyang nyvng.

⁸Housoeh las lop mas cangxeih jweh e dah hau gohtoeu changlo eq chank wvng loh las, nyvng vgus jingh.

⁹Khasoeh ge lyis nyang gas shei masyah dwis toq das, ge lhaihtoh dang lyis nyah aiq yuk ma seq shih.

¹⁰Housoeh las hauh changlo aiq yuk gas yhen pheh doms tsain loh.

¹¹Mari gas hau lop nghe mha ngaus yap joq. Housoeh ngaus zoh lyis yah gop las lop khau mha doms yoeuh yoeuh kuot.

¹²Hauh uhlyis bang bang thyoeu dyi wuot dah loeuswons aiq yuk gas Yesu gungs toh dah uhloms shot pheh dvyuk, khyei thang shot pheh dvyuk tsung toh zis lyis nyvng.

¹³Hauh aiq yuk nyang lyis taiq, Nyelo eh, nvng chamus ngaus nyeis lah, ge. Nyang taiq, Ngah Yhensain lhyi yoeus loh las khalhye toh toh zis ma seq las nghuot, ge.

¹⁴Housoeh ge nyang nungsthank pheh lhain yoeuh kat lyis, Yesu yap joq zis lyis nyvng. Nghuot laus eq hauh zis Yesu nghuot yvlyis ma seq.

¹⁵Yesu nyang lyis taiq, Vmesbih eh, chamus ngaus nyeis? Nvng hank lyis xo, ge. Nyang gas hauh soeu lhyi khyam kuot soeu jyo lha nyang lyis taiq zis gas, Yhensain eh, nvng nyang lyis dvng tyamp nghuot lyis gas, khamha toh zis ngos lyis jenh taiq kyoh aq, ngos yoeus loh das, ge.

¹⁶Hauh uhlyis Yesu gas, Mari eh, ge lui. Nyang eq nyah jyank pheh lhain los las, Hebre nyingh pheh yah Raboni, ge. (Houka, Svra ge zis nghuot.)

¹⁷Yesu nyang lyis taiq zis gas, Ngos lyis vtanh, khasoeh ge lyis ngos Uwus jyank mas ma doq loh shih nghuot laus eq ngah vnoeuh moq jyank mas loh las, Ngos gas ngah Uwus yahge namoq dah Uwus, ngah Mangso yahge namoq dah Mangso jyank pheh doq loh lo das ge oen, nyamoq lyis taiq kyoh aq, ge.

¹⁸Magdala Mari eq loh las, Yhensain lhyi nyang nyvng goeus cho yahge, nyang gas nyang lyis housoeh taiq kat dah cho changlo jens lyis taiq kyoh.

¹⁹Housoeh las dvdaus dah cangxeih vnyeih nyenhthang mau shomp shomp chuot los lyis, Yuda jens lyis gyuk yvmvyah, changlo jens nyeis dah yhen mha khomh nyheih tyamp thang lhyi, Yesu nyamoq dah vgungs mas jweh yap las taiq zis gas, Namoq nyenstap nyeis bas jungh, ge.

²⁰Housoeh dye taiq lyis nyang nyamoq lyis nyah loq yahge nyah nvmjaus chixoeuq. Changlo jens eq Yhensain lhyi nyvng las gaus.

²¹Yesu nyamoq lyis taiq zis gas, Namoq nyenstap nyeis bas jungh, Ngah Uwus ngos lyis nhang kat teh ngos eq namoq lyis nhang kat, ge.

²²Housoeh taiq lho lha, changlo jens thoq mas soq kat dyei las taiq zis gas, Gyingshang Dyos lhom yoeus geh:

²³Hank yobos lyis laus eq namoq khyuot tyamp dyei lyis gas gyuot das; hank yobos lyis eq namoq huon toh lyis gas, bos joq das, ge.

²⁴Housoeh Yesu jweh uhlyis changlo dvci aiq yuk mas bos dah Didimu ge soeu Thoma gas nyamoq yah dvgeh ma nyeis jus.

²⁵Housoeh las gohtoeu changlo jens nyang lyis, Ngamoq gas Yhensain lhyi xauh nyvng goeus, ge taiq kyoh. Nghuot laus eq nyang nyamoq lyis taiq, Nyah loq mas tyinghzoe yos ma nyvng, hauh tyinghzoe yos mas ngah loqnyhauh yah ma thauh yoeuh, nyah nvmjaus mas ngah loq ma xauh lap yoeuh lyis gas ngos ma jingh, ge.

²⁶Hauh thang lhyi xet nyeih lyis changlo jens yhen khau mha doms tsain lungh joq las, Thoma eq nyamoq yah dvgeh nyeis. Khomh kyank toh lyis eq, Yesu nyamoq jyank mas los yap las taiq zis gas, Namoq nyenstap nyeis bas jungh, ge.

²⁷Hauh uhlyis nyang gas Thoma lyis, Nah loqnyhauh heimha yhuonh kat las ngah loq lyis yoeuh aq, nah loq tuont kat las ngah nvmjaus mas eq lap yoeuh aq, ma jingh vmus, lomsjingh nyeis aq, ge.

²⁸Thoma nyang lyis phuk taiq zis gas, Ngah Yhensain yahge ngah Mangso eh, ge.

²⁹Yesu nyang lyis taiq zis gas, Thoma eh, nvng ngos lyis nyvng las dvlomsjingh, ma nyvng laus eq lomsjingh bang gas ngelhoq, ge.

³⁰Haih maussauh mas ma lhaih toh dah gohtoeu vlho nyoshoq eq Yesu nyah changlo jens xikkhonh mas kuot xoeuq.

³¹Nghuot laus eq heinyhoq lhaih toh zis gas, Mangso dah Lo ge dah Khristu nghuot zis lyis, namoq yoh lomsjingh las, nyah nyings mas lomsjingh yvmvyah kang xauh yoeus bas jungh oen lhaih toh.