Read Achang YOHAN 3 Bible Online

YOHAN 3 - Achang bible

YOHAN 3

¹Pharishe jens mas Nikodimu ge soeu Yuda jens lyis guon dah dius dvyuk nyeis.

²Nyenh lyis Yesu jyank mas lyih las, Svra eh, nvng gas Mangso jyank masyah jweh lyih dah svra dvyuk nghuot yvlyis ngamoq seq. Khasoeh ge lyis Mangso nvng yah dvgeh ma nyeis nghuot lyis gas nvng chixoeuq dah vlho dius hank eq ma yoh kuot, ge.

³Yesu nyang lyis phuk taiq zis gas, Ngos nvng lyis jyoengh taiq bah, hank laus eq dvlhain ma doms khoeu[2] lhyi ka, nyang Mangso munghdan lyis ma yoh nyvng, ge.

⁴Nikodimu nyang lyis taiq zis gas, Dius gas kuh thang lhyi khasoeh yoh doms khoeu das lah? Ungwes ung mas doms wvng las khoeu das lah, ge.

⁵Yesu phuk taiq zis gas, Ngos nvng lyis jyoengh taiq bah, hank laus eq jeis yahge Gyingshang Dyos mas ma khoeu soeu ka, Mangso munghdan mas ma yoh wvng das.

⁶Gungsshoh mas khoeu zis gas gungsshoh nghuot; Dyos masyah khoeu zis gas dyos nghuot.

⁷Ngos taiq dah dang gvng mas vmauh: nvng dvlhain doms khoeu chah.

⁸Lyeis gas nyang muot loh mes yvpheh muot loh las, lyeis thwe lhyi nvng xauhgyo laus eq, khapheh yah muot los las khapheh muot loh zis ma seq: Dyos masyah khoeu bang dvnganhmoq eq houyah dvyhangteh nghuot, ge.

⁹Nikodimu phuk taiq zis gas, Haih cho khasoeh yoh bweh das lah, ge.

¹⁰Yesu nyang lyis taiq zis gas, Nvng gas Israel vnyau dah svra dvyuk nghuot joq las haih zis yangh ma seq lhyeh?

¹¹Ngos nvng lyis jyoengh taiq zis gas, Ngamoq gas ngamoq seq dah vyhang lhyi taiq; ngamoq nyvng zis lyis kanghjyoeng kat, nghuot laus eq ngamoq dah kanghjyoeng lhyi namoq ma tsain lhom yoeus.

¹²Ngos namoq lyis nyeisjvng yah sen zis taiq lyis namoq ma jingh zis, maukhung dah cho taiq lyis namoq khasoeh lomsjingh goh das lah?

¹³Maukhung mhayah gyoh los dah cangsoeu Lo mas lai las gohyuk hank eq maukhung mha doq loh ku soeu ma bos.

¹⁴Moshe ka mhanhdyvp mas lhangnoq lyis toeushap toh zis yah dvyhangteh, cangsoeu Lo gas toeushap toh zis xauh das.

¹⁵Houka nyang lyis lomsjingh bang dvnganhmoq gas, dyoqbis zis ma xauh, vcaiq vto kang yoh das xiklyis nghuot.

¹⁶Khasoeh ge lyis nyang lyis 4 lomsjingh bang dvnganhmoq gas dyoqbis zis ma xauh, vcaiq vto kang yoh das xiklyis, Mangso ka nyah Loteh lyis dyei tyamp shoq mungkvn lyis jyetdap.

¹⁷Khasoeh ge lyis Mangso ka nyah Lo lyis mungkvn mas nhang kat zis gas, mungkvn lyis soetuon das xiklyis ma nghuot, nyang masyah mungkvn lyis khyuot yoeus das xiklyis dvnghuot.

¹⁸Nyang lyis lomsjingh soeu ka, soetuon zis ma xauh; ma lomsjingh soeu ka, Mangso dah Loteh nyings lyis ma lomsjingh yvmvyah, gvshih yangh soetuon zis xauh goeus.

¹⁹Hauh soetuon zis gas, Bvng zis gas haih mungkvn mas wvng laus eq, dius jens gas nyamoq kuot zis ma gis yvmvyah, bvng zis lyis ngwis thoq lyis chuot zis lyis zes ngwis yvmvyah nghuot.

²⁰Ma gis zis kuot soeu ka bvng zis lyis hoeng lha, nyang kuot dah muhzoh lyis ma mes kyink yvmvyah bvng yvmas ma los.

²¹Jyoeng zis kuot bang gas, nyang kuot dah muhzoh gas Mangso xikkhonh mas phi thoeuq zis lyis yoh chixoeuq das xiklyis bvng yvmas los, ge.

²²Hauh thang lhyi Yesu gas changlo jens yah dvgeh Yuda mau mas nyeis las, jeisnyhop dyei nyeis.

²³Yohan eq Salim nvm mas dah Enon mas jeis nyoshoq joq yvmvyah, jeisnyhop dyei nyeis. Dius nyoshoq jeisnyhop los kham.

²⁴Khasoeh ge lyis Yohan gas thung ma gyoh shih.

²⁵Yohan dah changlo jens gas Yuda jens yah cheihshang cho lhyi tsain taiq phyen-goh nyeis las,

²⁶nyamoq Yohan jyank mas lyih las nyang lyis taiq zis gas, Svra eh, yoeuh aq, Yodan lvng thyitvp pheh, nvng yah dvgeh nyeis ku lha nvng kanghjyoeng kat dyei soeu ka, nyang nyang jeisnyhop dyei nyeis las, dius dvnganhmoq nyah jyank jweh los, ge.

²⁷Yohan phuk taiq zis gas, Maukhung mhayah ma dyei lyis gas dius hank eq cha ma xauh lhom yoeus, ge.

²⁸Ngos gas Khristu ma nghuot, ngos gas nyah xik pheh nhang kat dah soeu dvnghuot oen ngos taiq dang lyis namoq nyang kanghjyoeng bos kat dyei goeus.

²⁹Nyi hwank pwe mha lonyi saiq lyis yoh soeu ka, loloeu saiq nghuot: dyenschangh phoq gas loloeu saiq vyvm mas yap las, hauh soeu dah dang thwe xauhgyo yvmvyah gaus nyeis. Housoeh ngos gaus zis gas ngah jyank mas nyuk los.

³⁰Nyang gas je los das, ngos gas yoms loh das.

³¹Nyhang mhayah los soeu ka dvnganh thoq mas zes soeu nghuot: nyeisjvng masyah bweh los soeu ka nyeisjvng yah sen lha, nyeisjvng cho lhyi kyingh dvseq taiq. Maukhung mhayah jweh los soeu ka dvnganh dah vzainsmuh nghuot.

³²Nyoqjeih yah nyvng zis, no yah gyo zis dvnganh yvlyis kanghjyoeng kat nyeis. Nyang kanghjyoeng kat zis lyis hank eq ma lhom yoeus.

³³Nyah kanghjyoeng cho lhyi lhom yoeus soeu ka, Mangso ka jyoeng zis nghuot yvlyis kyihau tap zis nghuot.

³⁴Mangso nhang kat soeu ka, Mangso dah dang lyis taiq: Khasoeh ge lyis nyang gas Gyingshang Dyos lyis laiq dyei, toeuq dyei zis ma nghuot.

³⁵Uwus gas Lo lyis jyetdap las dvnganh zis lyis nyah loq khau mha dyei toh.

³⁶Lo lyis lomsjingh soeu ka vcaiq vto kang lhyi yoh: Lo lyis ma lomsjingh soeu ka kang dwis cho ma nyvng, Mangso dah nhaiqlom dyis zis gas hauh soeu thoq mas joq.