Read Achang YOHAN 7 Bible Online

YOHAN 7 - Achang bible

YOHAN 7

¹Hauh thang lhyi Yesu gas Galile mau mas suh yenh: Yuda jens nyang lyis sat das zis xo yvmvyah, Yuda mau mas ma mes suh yenh.

²Hauh shishenh lyis Yuda jens dah Phunk pwe ge dah pwe jweh los goeus las,

³Nyah vnoeuh moq nyang lyis taiq zis gas, Nvng kuot dah muhzoh lyis nah changlo jens nyvng bas jungh, haih mau masyah thuq las Yuda mau pheh loh aq.

⁴Khasoeh ge lyis vsainnyang gungs lyis moeng hoeuh das zis xo soeu hank laus eq nyang kuot muh lyis nghop shung lha cha eq ma kuot. Nvng heinyhoq yoh kuot nyeis nghuot lyis gas mungkvn lyis nah gungs chixoeuq aq, ge.

⁵Khasoeh ge lyis nyah vnoeuh moq yangh nyang lyis ma lomsjingh.

⁶Yesu nyamoq lyis taiq zis gas, Ngah shishenh ma jweh shih, namoq dah shishenh vjangh yah nghuot joq.

⁷Mungkvn gas namoq lyis ma yoh hoeng, ngos lyis dvhoeng: khasoeh ge lyis hauh bang kuot cho ma shop zis lyis ngos kanghjyoeng kat yvmvyah nghuot.

⁸Hauh pwe mha namoq doq loh geh; ngah shishenh ma jweh shih yvmvyah, ngos gas ma doq loh shih das, ge.

⁹Nyang dang hauh goeu nyamoq lyis taiq lho lha, Galile mas nyeis khoq shih.

¹⁰Nghuot laus eq nyah vnoeuh moq hauh pwe mha doq loh thang lhyi, nyang eq debangh ma nghuot, gauh doq loh khyvlyis doq loh.

¹¹Housoeh las Yuda jens gas, hauh pwe mha nyang lyis xo lha, Haih dius yuk khalhye nyeis, ge.

¹²Moqjens mas nyah cho tsain moengs goh las dvyhamh gas, Nyang gas dius gis dvnghuot, ge. Tsai dvyhamh gas, Ma nghuot, nyang gas dius lyis mhuih jyomh soeu nghuot, ge.

¹³Nghuot laus eq Yuda jens lyis gyuk yvmvyah, nyah cho lhyi debangh hank eq ma taiq.

¹⁴Hauh pwe shishenh dvgohyih nghuot loh lyis, Yesu gas yhenmuh mas wvng las jyauh nyeis.

¹⁵Housoeh las Yuda jens mauh zis yah taiq zis gas, Haih dius yuk maussauh eq ma xuq ku zis heinyhoq khasoeh seq au lhyeh, ge.

¹⁶Yesu nyamoq lyis phuk taiq zis gas, ngos jyauh cho ka ngah zis ma nghuot, ngos lyis nhang kat soeu zis dvnghuot.

¹⁷Hauh soeu dah ehnyet chank mes soeu nghuot lyis gas, jyauh dah cho haih zis gas, Mangso jyank masyah lah, ngah ehnyet yah taiq zis nghuot lah, ge zis seq khyen yoeuh das.

¹⁸Vsainnyang dah ehnyet yah taiq soeu ka vsainnyang dah nyoqnho ngelang xo zis nghuot. Vsainnyang lyis nhang kat soeu dah nyoqnho ngelang lyis xo soeu ka, jyoeng lha nyang mas ma dan cho ma bos.

¹⁹Moshe ka namoq lyis lyi dyei toh goeus ma nghuot lah? Nghuot laus eq namoq hauh zis lyis dvyuk eq ma chank shih lhyeh? Chamus namoq ngos lyis sat das zis xo goh lah, ge.

²⁰Moqjens phuk taiq zis gas, Nvng yius kuq, nvng lyis sat das zis hank xo nyeis lah, ge.

²¹Yesu nyamoq lyis phuk taiq zis gas, Ngos muh dvja kuot goeus las namoq dvnganhmoq eq mauh goeus.

²²Moshe ka namoq lyis vthyoh tyomh cho dyei toh goeus. Hauh zis gas Moshe masyah ma nghuot, phauh thyeih moq masyah dvnghuot. Housoeh las namoq gas No Buisnyeis lyis dius lyis vthyoh tyomh cho tsain kuot nyeis.

²³No Buisnyeis lyis loshang lhyi vthyoh tyomh cho lhom yoeus laus eq Moshe dah lyi gas ma dyoqbis loh nghuot lyis gas, No Buisnyeis lyis ngos dius dvgungs gonh lyis lhoq gis gvng mas namoq ngos lyis nhaiqyo lhyeh?

²⁴Thoqlosbaus lyis yah soe vtuon goh, dan khyvlyis dvtuon geh, ge.

²⁵Yerusalem mas dah dius dvyhamh taiq zis gas, Sat das xiklyis nyamoq xo dah dius yuk haih zis ma nghuot lhyeh?

²⁶Yoeuh aq, nyang gas debangh taiq kyoh nyeis yvmvyah, nyang lyis cha ma yoh taiq. Haih soeu nyang Khristu nghuot zis lyis guon bang nyang jyoengh vseq au?

²⁷Nghuot laus eq haih soeu khalhye yah nghuot zis hank eq seq das zis ma nghuot ge.

²⁸Housoeh las Yesu yhenmuh mas jyauh zoh lyis yah kaiq las taiq zis gas, Namoq ngos lyis seq, ngos khalhye yah zis eq seq. Ngos gas ngvnyang los zis ma nghuot, ngos lyis nhang kat soeu ka jyoeng, hauh soeu lhyi namoq ma seq.

²⁹Ngos gas nyang lyis seq: khasoeh ge lyis ngos gas nyah jyank masyah nghuot las nyang ngos lyis nhang kat goeus, ge.

³⁰Housoeh las nyamoq gas nyang lyis nyhik das zis sont laus eq nyah shishenh ma jweh shih yvmvyah, nyang lyis hank eq ma yoh nyhik.

³¹Moqjens mas dius nyoshoq nyang lyis lomsjingh las taiq zis gas, Khristu los las nyang gas haih soeu thoq lyis vlho zes yoh chixoeuq das lah, ge.

³²Dius jens gas nyah cho moengs goh nyeis zis lyis Pharishe jens xauhgyo las, phudyei uhjyung jens yahge Pharishe moq gas nyang lyis nyhik das xiklyis zungh bang lyis nhang kat.

³³Yesu nyamoq lyis taiq zis gas, ngos namoq yah dvyoq kyingh nyeis las, ngos lyis nhang kat soeu jyank mas doms loh das.

³⁴Namoq ngos lyis xo laus eq ma nyvng das. Ngos nyeis jang mas eq namoq ma yoh jweh los, ge.

³⁵Housoeh las Yuda jens nyamoq nyang changh taiq goh zis gas, Yang ma yoh xo nyvng shoq haih dius yuk khapheh loh bah ge au? Dyos loh dah Heleni jens jyank mas loh las, hauh bang lyis jyauh das nvdoeus.

³⁶Namoq ngos lyis xo laus eq ma nyvng das, ngos nyeis jang mas eq namoq ma yoh jweh los das, ge dah dang gas cha ge mes dah dang nghuot au lhyeh, ge.

³⁷Hau pwe dah thang thank buisnyeis zainsmuh mas Yesu yap las taiq zis gas, Jeis shet soeu bos lyis ngah jyank mas los shuk bas jungh.

³⁸Ngos lyis lomsjingh soeu ka lhaihtoh dang mas taiq zis yah dvyhangteh, hauh soeu dah ungkhau mhayah kang bos dah jeislvng yaus thuq nyeis das, ge.

³⁹Nyang housoeh taiq zis gas, nyang lyis lomsjingh bang xauh yoeus das dah Dyos lyis toeuq las taiq zis nghuot. Khasoeh ge lyis Yesu gas nyah phunk ma pank shih yvmvyah Gyingshang Dyos ma dyei shih zis nghuot.

⁴⁰Housoeh taiq dang moqjens mas nyoshoq moq xauhgyo las nyamoq taiq zis gas, Haih soeu ka lvpe jyoengh nghuot, ge.

⁴¹Dvyhamh gas, Haih soeu ka Khristu nyang nghuot goeus, ge. Nghuot laus eq dvyhamh gas, Khristu gas Galile mau masyah thuq los das lah?

⁴²Khristu gas Dawi dah vnyau vshih masyah dyos las, Dawi dah joqyos ge dah Betlehem wukhau mhayah dvthuq los das, ge lhaihtoh dang mas bos ma nghuot lhyeh, ge.

⁴³Housoeh las moqjens gas nyah gvng mas gang loh.

⁴⁴Nyamoq mas dvyhamh gas nyang lyis nyhik mes laus eq, hank eq nyang lyis ma nyhik.

⁴⁵Housoeh las zungh bang gas phudyei uhjyung jens yahge Pharishe moq jyank mas doms jweh loh lyis nyamoq gas, Nyang lyis chamus ma shwih los goh lah, ge lhom nyei langh.

⁴⁶Zungh bang phuk taiq zis gas, Khayhoq eq haih soeu teh taiq soeu ma bos, ge.

⁴⁷Housoeh las Pharishe jens nyamoq lyis taiq zis gas, Namoq lyis eq mhuih goeus lhyeh?

⁴⁸Guon bang nghuot ya Pharishe mas zis hauh soeu lhyi lomsjingh soeu bos lah?

⁴⁹Haih dius jens gas lyi ma seq las nhoengh zis xauh goeus, ge.

⁵⁰Nikodimu nyamoq lyis taiq zis gas, (nyamoq mas dvyuk nghuot soeu nyenh lyis Yesu jyank mas lyih soeu nghuot.)

⁵¹Nyang cha kuot goeus zis ma xauhgyo, ma seq shih lyis yah Lyi gas dvyuk yuk lyis soe gyangh tuon lhyeh, ge.

⁵²Nyamoq phuk taiq zis gas, Nvng eq Galile mas zis nghuot lhyeh? Nvng dvxo choq yoeuh aq, Galile masyah lvpe hank eq ma thuq los ku, ge.

⁵³Hauh thang lyis nyamoq yuk khanghmuh, nyang yuk nyang toeu yhen pheh tsain loh lo.