Read Achang YOHAN 8 Bible Online

YOHAN 8 - Achang bible

YOHAN 8

¹Nghuot laus eq Yesu gas Tsanlun boms pheh doq loh.

²Nvpsangh yah nyang gas yhenmuh mas doms loh lyis, dius nyoshoq nyah jyank mas zain los yvmas nyang tsung lha jyauh nyeis.

³Hauh uhlyis maussauh lhaih bang yahge Pharishe jens gas, nyi lvng shuot goh nyeis dah vmesbih dvyuk lyis nyamoq vgungs mas loh shwih lhyap toh las

⁴nyamoq nyang lyis taiq zis gas, Svra eh, haih vmesbih lyis nyi lvng shuot goh nyeis uhlyis ngamoq loh nyhik goeus.

⁵Heisoeh teh dah vmesbih lyis lukzains yah yoh doeuh, ge Moshe ka Lyi mas ngamoq lyis vmingh dyei toh. Gvshih nvng gas khasoeh oen das lah, ge.

⁶Housoeh ge nyei zis gas, nyang lyis yobos huon das zis nyvng das xiklyis nyang lyis shi yoeuh zis nghuot. Yesu gas ma xauhgyo guons kuot las gop las tsoh mas loqnyhauh yah lhaih nyeis.

⁷Nyamoq housoeh doms tsank nyei nyei kuot yvmvyah, nyang nghank las nyamoq lyis taiq zis gas, Namoq mas yobos ma yoh soeu shih nyang lyis lukzains yah doeuh aq, ge.

⁸Housoeh dye taiq yah dvyih nyang doms gop las tsoh mas lhaih nyeis.

⁹Nyamoq hauh dang xauhgyo lyis nyamoq dah ehnyet mas zangh las, logis jens uhshe lha dvyuk thang lhyi dvyuk thuq loh. Housoeh Yesu nyang kyingh nyet joq las, hauh vmesbih eq vgungs mas yap joq.

¹⁰Yesu nghank yoeuh lyis vmesbih mas lai las gohtoeu hank lyis eq ma nyvng yvmvyah, nyang lyis taiq zis gas, Vmesbih eh, nvng lyis zau kauq bang khapheh loh goeus lah? Nvng lyis hank eq dang thang ma thyet lhyeh, ge.

¹¹Vmesbih gas, Yhensain eh, hank ma thyet ge toeuh lyis, Yesu taiq zis gas, Ngos eq nvng lyis dang thang ma thyet, loh lo aq, yaunos vkuot lo, ge.

¹²Housoeh las Yesu nyang lyis doms taiq zis gas, Ngos gas mungkvn dah bvng zis nghuot. Ngah thang mha chank soeu ka chuot yvmas khanhamp eq ma suh las kang dah bvng cho yoh das.

¹³Housoeh las Pharishe jens nyang lyis taiq zis gas, Nah cho lhyi nvnyang kanghjyoeng kat las, nah kanghjyoeng ka ma jyoeng, ge.

¹⁴Yesu nyamoq lyis taiq zis gas, Ngah cho lhyi ngvnyang kanghjyoeng kat laus eq jyoeng. Ngos khapheh yah los las khapheh loh das zis ngvnyang seq: nghuot laus eq namoq gas ngos khapheh yah thuq los las khapheh loh das zis ma seq.

¹⁵Namoq gas gungsshoh khyvpheh yah soetuon. Ngos gas hank lyis eq soe ma tuon.

¹⁶Soetuon nghuot laus eq ngos tuon khyvlyis jus joq. Khasoeh ge lyis, ngos gas dvyuk kyingh ma nghuot, ngos eq, ngos lyis nhang kat soeu, ngah Uwus eq dvgeh nghuot.

¹⁷Namoq dah Lyi mas eq, kanghjyoeng aiq yuk dah dang gas jyoeng, ge lhaih toh.

¹⁸Ngos gas vsainnyang xiklyis kanghjyoeng kat soeu nghuot. Ngos lyis nhang kat soeu ngah Uwus eq ngah cho kanghjyoeng kat dyei nyeis, ge.

¹⁹Nyamoq nyang lyis taiq zis gas, Nah Uwus gas khalhye nyeis, ge. Yesu phuk taiq zis gas, Namoq gas ngah Uwus lyis eq, ngos lyis eq ma seq. Ngos lyis seq ya, ngah Uwus lyis eq seq das, ge.

²⁰Dang haih zis gas yhenmuh mas jyauh nyeis uhlyis vlu yvp mas taiq dah dang nghuot. Nyah shishenh ma jweh shih yvmvyah, nyang lyis hank eq ma nyhik.

²¹Nyang nyamoq lyis dvlhain doms taiq zis gas, Ngos loh das, hauh uhlyis namoq ngos lyis xo das. Vsainnyang yaunos mas eq namoq shei das. Ngos loh das joqyos mas eq namoq ma yoh jweh das, ge.

²²Housoeh las Yuda jens gas, ngos loh das joqyos mas namoq ma yoh jweh das, ge nyang taiq zis gas, nyang gungs nyang sat das nvdoeus, tsain ge.

²³Yesu tsoq taiq zis gas, Namoq gas nyhen mha dah bang nghuot. Ngos gas nyhang mha dah soeu dvnghuot. Namoq gas haih mungkvn mas bang nghuot, Ngos gas haih mungkvn mas zis ma nghuot.

²⁴Housoeh yvmvyah ngos namoq lyis, Namoq gas vsainnyang yaunos mas shei das, oen taiq goeus: khasoeh ge lyis, ngos hauh soeu nghuot zis lyis namoq ma jingh yvmvyah, namoq vsainnyang yaunos mas shei das, ge.

²⁵Housoeh nyamoq taiq zis gas, Nvng hank nghuot lah, ge nyei. Yesu nyamoq lyis taiq zis gas, Ngos gas xik pheh yah ngos namoq lyis taiq toh soeu, hauh soeu nyang nghuot.

²⁶Ngos namoq dah cho mha bos taiq soetuon dyei das zis nyoshoq bos. Nghuot laus eq ngos lyis nhang kat soeu ka jyoeng nyeis yvmvyah, nyah jyank masyah ngos xauhgyo zis mungkvn lyis taiq kyoh zis nghuot, ge.

²⁷Uwus dah cho taiq yvlyis nyamoq ma seq.

²⁸Housoeh las Yesu nyamoq lyis taiq zis gas, Hauh cangsoeu Lo lyis namoq toeu shap toh uhlyis, ngos gas hauh soeu nghuot zis eq, ngos gas ngah ehnyet yah cha eq ma kuot, nghuot laus eq ngah Uwus ngos lyis jyauh zis yah dvyhangteh, hauh dang ngos taiq nyeis zis lyis eq namoq seq los das.

²⁹Ngos lyis nhang kat soeu ka ngos yah dvgeh nyeis. Uwus gas ngvnyang kyingh lyis ma toh khoq: khasoeh ge lyis, nyang o dah muh lyis ngos vjangh kuot nyeis, ge.

³⁰Hauh dang taiq nyeis lyis dius nyoshoq nyang lyis lomsjingh.

³¹Yesu gas, nyang lyis lomsjingh dah Yuda jens lyis taiq zis gas, Namoq ngah dang mas goeng toenk joq lyis, namoq ngah changlo gyingh nghuot joq.

³²Jyoeng cho namoq seq das las, hauh jyoeng cho ka namoq lyis lhuiq kat das, ge.

³³Nyamoq, nyang lyis phuk taiq zis gas, Ngamoq gas Abraham dah vnyau nghuot las khanhamp eq hank jyank mas jons ma mus ku dvnghuot lyis, luiq ge khasoeh yoh taiq das lah, ge.

³⁴Yesu nyamoq lyis phuk taiq zis gas, Ngos namoq lyis jyoengh taiq bah, yaunos kuot bang hank laus eq yaunos dah jons nghuot joq.

³⁵Jons gas yhen mha vjangh yoh nyeis zis ma nghuot: lo gas vjangh nyeis.

³⁶Housoeh las Lo yah namoq lyis lhuiq kat lyis gas, namoq jyoengh luiq das.

³⁷Namoq Abraham dah vnyau nghuot zis ngos seq: nghuot laus eq ngah dang namoq mas ma bos yvmvyah, namoq ngos lyis sat das zis xo nyeis.

³⁸Ngos gas ngah Uwus jyank mas nyvng zis yah dvyhangteh taiq. Namoq eq namoq dah uwus jyank masyah nyvng zis yah dvyhangteh tsain kuot nyeis, ge.

³⁹Nyamoq, nyang lyis phuk taiq zis gas, Abraham gas ngamoq dah uwus nghuot, ge. Yesu nyamoq lyis taiq zis gas, Namoq Abraham dah lo nghuot lyis gas, Abraham kuot dah muh tsain chank kuot das.

⁴⁰Nghuot laus eq gvshih gas namoq lyis Mangso jyank masyah ngos xauhgyo las hau jyoeng dah cho taiq kyoh soeu ge dah ngos lyis sat das zis tsain xo: Abraham gas housoeh teh soeu ma nghuot.

⁴¹Namoq gas namoq dah uwus kuot zis yah dvyhangteh kuot nyeis, ge. Nyamoq, nyang lyis taiq zis gas, Ngamoq deslos ma nghuot, ngamoq gas Uwus dvyuk kyingh dvyoh: hauh soeu ka Mangso nyang nghuot, ge.

⁴²Yesu nyamoq lyis taiq zis gas, Namoq Uwus gas Mangso nghuot lyis, namoq ngos lyis jyetdap das. Khasoeh ge lyis ngos gas Mangso mhayah thuq los soeu nghuot: Ngah ehnyet yah ngos jweh los zis ma nghuot, nyang gas ngos lyis nhang kat.

⁴³Chamus ngah dang lyis ma seqgyo goh lah? Khasoeh ge lyis ngah dang lyis ma kamp gyo las ngah dang ma seqgyo.

⁴⁴Namoq gas namoq dah uwus ge dah yius masyah tsain dyos lyih las namoq uwus nyetnau khyvlyis chank mes. Yius gas cangxeih yoq lyis yah dius sat soeu nghuot. Nyah jyank mas jyoeng zis ma yoh bos las jyoeng cho mha ma yoh nyeis. Nyang dyoq dah dang taiq lyis nyang nyah ungkhau mha bos zis yah dvyhangteh taiq nyeis. Khasoeh ge lyis nyang gas dyoq soeu nghuot, lvdyoq dah uwus eq nghuot.

⁴⁵Ngos dang jyoeng taiq yvmvyah namoq ma lomsjingh.

⁴⁶Ngos mas yobos bos oen namoq mas hank yoh tuonh shet das lah? Ngos dang jyoeng taiq nghuot lyis gas, chamus ngos lyis ma lomsjingh goh lah?

⁴⁷Mangso yah sen soeu ka nyah dang lyis gyo nyeis. Namoq gas Mangso dah bang ma nghuot las, nyah dang lyis ma tsain gyo, ge.

⁴⁸Yuda jens nyang lyis phuk taiq zis gas, Nvng gas Samari dius nghuot las yius wvng soeu nghuot, oen ngamoq taiq zis gas jus ma nghuot lhyeh, ge.

⁴⁹Yesu phuk taiq zis gas, ngos yius wvng nyeis soeu ma nghuot, ngah Uwus lyis phauh nyang zis dvnghuot. Namoq yuk ngos lyis ma phauh ma nyang kuot.

⁵⁰Ngos gas ngvnyang nyoqnho ngelang lyis ma xo; xo lha soetuon dyei soeu dvyuk nyeis.

⁵¹Ngos namoq lyis jyoengh taiq bah, ngah dang lyis chank soeu ka khanhamp eq ma shei lo, ge.

⁵²Yuda jens nyang lyis taiq zis gas, Nvng yius wvng soeu nghuot yvlyis gvshih ngamoq seq goeus. Abraham yahge lvpe jens dye shei goeus. Nghuot laus eq nvng taiq zis gas, Ngah dang lyis chank soeu ka shei zis khanhamp eq ma bos das, ge.

⁵³Nvng gas shei loh goeus ngamoq uwus Abraham thoq lyis ma zes kuh ma nghuot lhyeh? Lvpe jens eq shei khoq goeus, nvng hank nghuot oen nghamh zo, ge.

⁵⁴Yesu phuk taiq zis gas, Ngah gungs lyis ngvnyang chungh nghuot lyis gas, ngah nyoqnho ngelang cha eq ma bos; nghuot laus eq ngos lyis chungh soeu ka, namoq dah Mangso nghuot, ge namoq taiq dah ngah Uwus nyang nghuot, ge.

⁵⁵Nghuot laus eq namoq gas nyang lyis ma seq, ngos gas seq. Ma seq oen lhyi ka ngos eq namoq teh hwah soeu bweh das: nghuot laus eq ngos gas nyang lyis seq las nyah dang lyis eq chank kuot.

⁵⁶Namoq dah uwus Abraham gas, ngah buisnyeis nyvng das yvlyis gaus las, nyang hauh zis lyis nyvng las gaus goeus, ge.

⁵⁷Yuda jens nyang lyis taiq zis gas, Nvng oengci zvn yangh ma bos shih zis Abraham lyis nyvng ku lhyeh, ge.

⁵⁸Yesu nyamoq lyis phuk taiq zis gas, Ngos namoq lyis jyoengh taiq bah, Abraham dah xik lyis yah ngos nyeis, ge.

⁵⁹Housoeh las nyamoq gas nyang lyis doeuh das ge lukgoq tsain kui. Yesu gas nyah gungs shung lha yhenmuh masyah nyamoq jo chank thuq loh.