Read Achang YOHAN 9 Bible Online

YOHAN 9 - Achang bible

YOHAN 9

¹Nyang lai loh nyeis lyis, khoeu los masyah nyoqjet soeu dvyuk lyis nyvng.

²Nyah changlo jens nyang lyis taiq zis gas, Svra eh, haih soeu nyoqjet zis khoeu los zis gas yobos kuot soeu ka hank nghuot lah? Haih dius yuk lah? Nyah ungwes uwus lah, ge.

³Yesu phuk taiq zis gas, Haih soeu yobos kuot zis ma nghuot, nyah nyhiphoq eq ma nghuot, Mangso dah muh, hauh soeu mhayah chixoeuq das xiklyis dvnghuot.

⁴Ngos lyis nhang kat soeu dah muhzoh lyis nyeihyo nyoq nyvng shih uhlyis ngos wons wuq chah. Muh hank eq ma yoh wons wuq das dah nyenhyo jweh los das.

⁵Ngos mungkvn mas nyeis shih dah uhlyis ngos mungkvn dah bvng zis nghuot, ge.

⁶Housoeh dye taiq thang lhyi, nyang nyeisjvng mas svkanh dyeh kat, tsohnyhon lhoeuq yoeus las hauh soeu dah nyoq mas juot dyei las,

⁷nyang lyis taiq zis gas, Silom thomh mas loh cheih aq, ge. Houyah dvyhangteh nyang loh cheih lyis nyoq nyvng los las loh lo. (Silom vjyuk gas, Nhang kat, ge zis nghuot.)

⁸Housoeh las yhen kyoh yahge xik pheh nyang nyoqjet zis lyis nyvng yoeuh bang gas, Haih soeu ka tsung lha dung zo soeu ma nghuot lhyeh, ge.

⁹Dvyhamh gas, Haih soeu nyang nghuot, ge. Tsai dvyhamh gas, Hauh soeu yah doeusgoh, ge. Nyang taiq zis gas, Ngos hauh soeu nyang nghuot goeus, ge.

¹⁰Housoeh yvmvyah nyamoq, nyang lyis taiq zis gas, Housoeh lyis nah nyoq khasoeh yoh nyvng los lah, ge.

¹¹Nyang phuk taiq zis gas, Yesu ge soeu tsohnyhon lhoeuq las ngah nyoq mas juot dyei lho lha, Silom thomh mas loh cheih aq, ge zis yah dvyhangteh ngos loh cheih lyis nyoq nyvng los, ge.

¹²Nyamoq, nyang lyis taiq zis gas, Hauh soeu khamha nyeis, ge nyei. Nyang phuk taiq zis gas, Ngos ma seq, ge.

¹³Nyamoq gas vkhang nyoqjet soeu lhyi Pharishe jens jyank mas shwih e.

¹⁴Yesu tsohnyhon lhoeuq las hauh soeu lhyi nyoq nyvng nhang nyeih gas Yuda No Buisnyeis nghuot.

¹⁵Pharishe moq eq, nyah nyoq khasoeh nyvng los cho doms nyei lyis hauh soeu taiq zis gas, Nyang ngah nyoq mas tsohnyhon kat dyei las, ngos nyoq cheih lho lhyi nyvng los, ge.

¹⁶Pharishe dvyhamh gas, Haih soeu ka No Buisnyeis lyis ma phauh yvmvyah, nyang gas Mangso jyank masyah jweh lyih soeu ma nghuot, ge. Gohtoeu dvyhamh gas, Yaunos wons soeu ka heiteh dah vlho khasoeh yoh kuot das, ge tsain gang loh.

¹⁷Housoeh las nyamoq gas nyoqjet khoq soeu lhyi, Nah nyoq nyvng nhang soeu lhyi nvng khasoeh oen nghamh, ge nyei. Nyang phuk taiq zis gas, Hauh soeu ka lvpe nghuot, ge.

¹⁸Yuda jens gas, nyang gas nyoqjet soeu nghuot zis nyoq doms nyvng los zis lyis ma jingh yvmvyah, nyoqjet khoq soeu dah nyhiphoq lyis khi lha,

¹⁹nyamoq lyis nyei zis gas, Khoeu los masyah nyoqjet dah haih soeu ka nah zomh dah lo nghuot lhyeh, ge.

²⁰Hauh soeu dah nyhiphoq nyamoq lyis phuk taiq zis gas, Hauh soeu ka ngah zomh dah lo nghuot, khoeu los masyah nyoqjet zis ngah zomh seq.

²¹Nghuot laus eq gvshih hank yah khasoeh kuot dyei las nyoq nyvng los zis gas ngah zomh ma seq. Nyang lyis nyei yoeuh geh, nyang nyenhkyi bos goeus las nyah cho nyang taiq das, ge.

²²Nyah nyhiphoq housoeh ge zis gas, Yuda jens lyis gyuk yvmvyah nghuot. Khasoeh ge lyis, Yesu gas Khristu nghuot ge las lhom yoeus soeu hank lyis laus eq lyi jungs mhayah khat thuq das zis gvshih yangh dye xam nyoq toh goeus.

²³Housoeh las hauh soeu dah nyhiphoq gas, Nyang nyenhkyi bos goeus, nyang lyis nyei yoeuh geh, ge zis nghuot.

²⁴Housoeh las hauh nyoqjet khoq soeu lhyi doms khi lha nyang lyis taiq zis gas, Mangso lhyi chungh aq, hauh soeu ka yaunos wons soeu nghuot zis ngamoq seq, ge.

²⁵Hauh soeu phuk taiq zis gas, Nyang yaunos wons soeu nghuot ma nghuot zis ngos ma seq: ngos seq zis gas, ngos xikpheh nyoqjet, gvshih gas nyvng goeus, hounyhoq kyingh dvnghuot, ge.

²⁶Nyamoq, nyang lyis doms taiq zis gas, Nyang nvng lyis cha kuot dyei? Nah nyoq khasoeh phank dyei lah, ge.

²⁷Hauh soeu phuk taiq zis gas, Gvshih shih ngos namoq lyis taiq kyoh goeus; namoq nyang ma tsain seqgyo. Chamus doms tsain gyo mes goh lah? Namoq eq nyah changlo duot mes goh vnghuot lah, ge.

²⁸Housoeh las nyamoq gas, nyang lyis jwangh zoh lyis yah taiq zis gas, Nvng yuk nyah changlo nghuot, ngamoq gas Moshe dah changlo jens dvtsain nghuot.

²⁹Mangso ka Moshe lhyi eq dang jis zis ngamoq seq. Haih soeu khalhye yah nghuot zis gas ngamoq ma seq, ge.

³⁰Hauh soeu phuk taiq zis gas, Nyang gas nyoq yoh phank dyei goeus lyis eq, nyang khalhye yah nghuot zis namoq ma seq zis gas mauhphoh nghuot.

³¹Yaunos kuot bang lyis Mangso ma gyo dyei zis gas ngamoq seq: nghuot laus eq Mangso lhyi paiq soeu nghuot las, nyah ehnyet lyis chank nghuot lyis gas Mangso nyang lyis gyo dyei.

³²Khoeu los lyis yah jet goeus dah nyoq lyis dvyuk eq yoh phank dyei ge mungkvn gvnkhanh masyah ma xauhgyo ku.

³³Haih soeu ka Mangso jyank masyah ma nghuot lyis gas, cha eq yoh kuot das zis ma nghuot, ge.

³⁴Nyamoq nyang lyis phuk taiq zis gas, Gungs gonh yaunos thomh masyah dvkhoeu los zis ngamoq lyis jyauh nyeis lhyeh, ge nyang lyis khat thuq kat.

³⁵Hauh soeu lhyi khat thuq cho Yesu xauhgyo las, nyang lyis xo nyvng lyis taiq zis gas, Mangso dah Lo lyis lomsjingh lah, ge.

³⁶Nyang phuk taiq zis gas, Yhensain eh, ngos lomsjingh das soeu ka hank nghuot lah, ge.

³⁷Yesu nyang lyis taiq zis gas, Hauh soeu lhyi nvng nyvng ku goeus, nvng yah jis goh soeu ka hauh soeu nyang nghuot, ge.

³⁸Hauh soeu ka, Yhensain eh, ngos lomsjingh nyeis, ge nyang lyis paiq.

³⁹Yesu taiq zis gas, Haih mungkvn mas ngos jweh lyih zis gas, soetuon das xiklyis nghuot las, nyoqjet bang nyoq nyvng los das xiklyis eq, nyoq nyvng nyeis bang ma nyvng das xiklyis eq nghuot, ge.

⁴⁰Nyang yah dvgeh nyeis dah Pharishe jens hauh dang lyis xauhgyo las nyang lyis taiq zis gas, Ngamoq eq nyoqjet lhyeh, ge.

⁴¹Yesu nyamoq lyis taiq zis gas, Namoq nyoqjet ya yaunos ma tsain yoh das, gvshih namoq taiq zis gas, Ngamoq nyoq nyvng ge yvmvyah namoq yaunos bos joq shih, ge.