Read Achang LVGYO 1 Bible Online

LVGYO 1 - Achang bible

LVGYO 1

¹Theophilu eh, ngah maussauh cangxeih vbuk mas Yesu muh kuot xi masyah nyang lyis maukhung pheh toqh yoeus loh shishenh jweh shoq gyo lyis nyang kuot cho, jyauh cho dvnganh lyis lhaih toh goeus.

²Nyang toqh kat zis ma xauh shih shishenh lyis nyang khyen toh lvgyo jens lyis Gyingshang Dyos dah yomsoq yah tyingtoh dang tsain taiq toh.

³Nyang shanghsenh kham thang lhyi, nyeici nyeih top nyamoq lyis nyah gungs nyoshoq lhain chixoeuq las, nyang dwis nyeis cho ma yoh he dah kanghjyoeng vja ja yah Chixoeuq. Nyamoq gas nyang lyis nyvng las nyang nyamoq lyis maukhung munghdan cho taiq kyoh.

⁴Housoeh nyamoq yah dvgeh huom nyeis lyis, nyang nyamoq lyis taiq zis gas, Yerusalem masyah ma thuq thuq, namoq ngah jyank masyah xauhgyo yoeus das, Uwus dah dangthoengh lyis langh nyeis geh.

⁵Khasoeh ge lyis Yohan gas jeis yah jeisnyhop dyei, namoq gas ma nyangh lyis Gyingshang Dyos yah jeisnyhop dyei zis xauh das, ge.

⁶Housoeh nyamoq dvgeh tsain huom toh shih uhlyis, nyamoq gas nyang lyis, Yhensain eh, gvshih Israel dius jens lyis hauh munghdan doms dyei das lah, ge.

⁷Nyang nyamoq lyis taiq zis gas, Uwus gas nyah vmingh yah toeuq toh dah shishenh yahge yoq lyis namoq ma seq noh.

⁸Nghuot laus eq Gyingshang Dyos namoq thoq mas jweh lyis, namoq yomsoq yoh yoeus das las, namoq gas Yerusalem wugungs yahge Yuda mau gonh, Samari yahge nyeisjvng goms shoq ngah kanghjyoeng tsain duot das, ge.

⁹Haih zis dye taiq las, nyamoq yoeuh nyeis lyis, nyang lyis nyhang mas toqh yoeus loh las, jyommauh dvbungh gas nyamoq xikkhonh masyah nyang lyis po loh.

¹⁰Nyang doq loh tyamp las, nyamoq maukhung mas yoeuh tsuk toh shih lyis, yoeuh aq, dyi thyoeu wuot dah dius aiq yuk nyamoq nvm mas yap thuq los las,

¹¹Galile bang eh, chamus maukhung mas yoeuh tsuk toh shih goh lah? Namoq dah xikkhonh masyah maukhung mas toqh kat zis xauh soeu, Yesu gas namoq nyvng nyeis lyis loh zis yah dvyhangteh, housoeh doms jweh lyih das, ge.

¹²Nyamoq gas Tsanlun boms masyah Yerusalem wugungs pheh tauh loh. Hauh boms gas Yerusalem masyah nyei falong dvwe joq.[1]

¹³Jweh lyis nyamoq gyangh nyeis dah thoq yvp mas tsain doq loh. Hauh moq gas, Petru, Yohan, Yaku, Andre, Philip yahge Thoma, Bartholomeu yahge Mathe, Alphe dah lo Yaku, Zelot Simon yahge Yaku dah vnoeuh Yuda moq nghuot.

¹⁴Nyamoq gas, vmesbih jens yahge Yesu ungwes Mari, nyah vmang vnoeuh moq yah dvgeh ehnyet dvlom yah wontang shvmanh dung las tsain nyeis.

¹⁵Hauh buisnyeis gyo lyis Petru gas changlo dvxo aiqci ko dah vgungs mas toq yap las taiq zis gas,

¹⁶Boekyis eh, Yesu lyis nyhik bang dah cho she soeu, Yudas lyis toeuq las gohlhain Dawi dah nhuot masyah Gyingshang Dyos taiq toh las, lhaihtoh dang gas nyuk los chah goeus.

¹⁷Khasoeh ge lyis yamoq mas bos suon kat las, haih muh mas nyang eq muh xauh yoeus goeus.

¹⁸Hauh soeu ka nyah dah ma shop muh phauh yah maunyeis dvchuq wis toh goeus: houmha nyang gas vtauh pheh yah gyoh shei las, womdau thauh phuk las, oeu eq dvyos dvzoq mus tyamp.

¹⁹Hauh cho lhyi Yerusalem bang dvnganh seq loh goeus; housoeh las hauh maunyeis chuq lyis nyamoq nyingh pheh yah Akeldama ge nyhink toh. Houka Suih yos, ge zis nghuot.

²⁰Hauh cho ka Chungh Dang mas, Nyah joqyos jyamhjyuklhyuk mus bas jungh, houmha hank eq ma nyeis bas jungh, ge eq. Nyah dah uhshe muh lyis gohyuk xauh yoeus bas jungh, ge eq bos.

²¹Housoeh las Yohan jeisnyhop dyei xi masyah, Yesu lyis yamoq jyank masyah toqh yoeus jweh shoq, Yhensain Yesu yamoq mas suh e nyeis.

²²Hauh shishenh top mas yang yah dvgeh suh e soeu, dvyuk gas yang yah dvgeh nyah dah dwis toq cho kanghjyoeng bweh chah, ge.

²³Hauh uhlyis nyamoq gas, Yustu eq ge, Barsaba ge dah Yosep yahge Mathia lyis tsain khyen kat.

²⁴nyamoq shvmanh dung zis gas, Dius yuk khanghmuh dah ehnyet lyis seq nyeis dah Yhensain eh, Yudas gas nyang yah sen joqyos pheh loh lo das ge, toh tyamp dah muh yahge,

²⁵Lvgyo muh xiklyis haih aiq yuk mas nvng hank lyis khyen yoeus toh cho ngamoq lyis tuonh shet aq, ge.

²⁶Nyamoq doeugoh lyis hauh zis gas Mathia lyis vvng loh. Hou mhayah nyang gas hau lvgyo dvci dvyuk mas lung los.