Read Achang LVGYO 10 Bible Online

LVGYO 10 - Achang bible

LVGYO 10

¹Gvshih Kesare wus mas Korneli ge soeu dvyuk nyeis. Nyang gas Itali ge dah thoenkgus jesdvp mas jes dvxo guon zau nghuot.

²Hauh soeu ka lomsjingh cho mas wontang lha nyah yhenbang dvnganh yah dvgeh, Mangso lhyi gyuk woms zis yah svbih lyis vlu nyoshoq dyei uhjyangh Mangso lhyi vjangh dung nyeis.

³Dvnyeih gas, somh shishenh ko lhyi Mangso dah loeuswons soeu nyah jyank mas jweh las, Korneli eh, ge nyang lyis taiq zis gas nyoq mas gyoq gyoq nyvng.

⁴Nyang gas hauh soeu lyis gyuk zoh lyis gyaus gyaus yoeuh tsuk toh las, Yhensain eh, chah cho nghuot lah, ge nyang lyis nyei. Hauh soeu ka, Nah shvmanh dung zis yahge vlu dyei cho ka, Mangso xikkhonh mas nyoqnyhank dvkoeuq khyvlyis bangh los goeus.

⁵Gvshih Yopa wus mas dius nhang las, Petru ge dah Simon lyis khi aq.

⁶Nyang gas shohyeis muh kuot soeu Simon yhen mas nyeis; nyah yhen ka thomh yvm mas nghuot, ge.

⁷Korneli yah dang jis goh dah loeuswons soeu loh thang lhyi, nyah yhen mas dah uhkung dvzomh yahge nyah thang mas vjangh chank yenh moq mas lomsjingh cho mas wontang soeu jeslo dvyuk lyis khi yoeus las,

⁸nyamoq lyis hauh cho dvnganh taiq kyoh lho las, Yopa wus mas nhang kat.

⁹Nyamoq eq nungs nyeih loh las, Yopa nvm mas jweh lyis, Petru gas nyeihgungs dvci aiq shishenh ko lhyi shvmanh dung das ge yhenkhung thoq mas doq loh.[5]

¹⁰Housoeh wom ba nyeis uhlyis nyang wom yuot las zonoms dvja ja zo mes nyeis. Hauh uhlyis nyang yhet muih loh las nyoqnyvng nyvng.

¹¹Maukhung phank las kha iq teh jangthunk dvkhyvp nyeisjvng mas khyoq kat yvlyis nyang nyvng.

¹²Hauh yvmas nyeisjvng thoq mas dah nyei khyei dap gaunyhauq, yewus, shweh loh ja yahge maudang nghoq vja ja tsain bos.

¹³Petru eh, toq las sat zo aq, ge thwe nyings thuq los zis nyang xauhgyo.

¹⁴Petru phuk taiq zis gas, Ma nghuot, Yhensain eh, ma gis zo zis yahge ma lhoq ma shang vyhang lhyi ngos khanhamp eq ma zo yoeuh, ge.

¹⁵Aiq vlhain dah thwe ka, Mangso cheihshang goeus vyhang lyis ma lhoq oen vsang, ge.

¹⁶Somh lhain shilo housoeh bweh las, hauh thang lhyi hauh yvlyis maukhung pheh dvlhaindvm doms yoeus tyamp.

¹⁷Petru gas nyang nyvng dah nyoqnyvng gas cha nghuot au, ge mauh khamkhvv nyeis uhlyis, Korneli nhang kat bang Simon yhen xo nyeis las khomh nvm mas yap joq.

¹⁸Hauh yhen mas Petru ge dah Simon nyeis ma nyeis tsain kaiq nyei nyeis.

¹⁹Petru gas nyoqnyvng hauh dah cho lhyi nghamh yoeuh nyeis shih lyis, Dyos gas, Yoeuh aq, dius somh yuk nvng lyis xo nyeis.

²⁰Housoeh yvmvyah nvng toq las gyoh e aq; nyamoq yah dvgeh chank loh aq, khamkhvv chank ma bos: khasoeh ge lyis nyamoq lyis ngos nhang kat, ge.

²¹Petru eq Korneli yah nyah jyank mas nhang kat bang jyank mas gyoh e las nyei zis gas, Yoeuh aq, namoq xo nyeis soeu ngos nghuot, chah soe bos las xo goh lah, ge.

²²Nyamoq taiq zis gas, Dan las Mangso lhyi gyukwoms zis yahge Yuda dvnyau gonh dah xikkhonh mas nyoqnho ngelang bos las jes dvxo guon zau Korneli gas nvng lyis nyah yhen mas khi hwank las nah dang gyo yoeus das cho, Mangso jyank masyah Gyingshang loeuswons soeu lyih taiq kyingh zis xauh, ge.

²³Housoeh nyang nyamoq lyis khi hwank las thoeng nhang. Nungs nyeih Petru toq las nyamoq yah dvgeh loh. Yopa wus mas dah boekyis dvyhamh eq nyang yah dvgeh bos loh.

²⁴Hauh thang lhyi nyeihyo Kesare wus mas wvng loh. Korneli gas nyah vmang vnoeuh moq yahge buisnoms sainhchangh jens lyis shwih huom lha nyamoq lyis langh nyeis.

²⁵Gvshih Petru wvng loh lyis, Korneli gas lhom zes zis yah nyah khyeiyang mas dupaiq.

²⁶Nghuot laus eq Petru gas, Toq aq, ngos eq seq shei dah dius dvnghuot, ge taiq uhjyangh nyang lyis she toq kat.

²⁷Housoeh nyang jisgoh zoh lyis yah wvng loh yoeuh lyis dius nyoshoq huom joq yvlyis nyvng.

²⁸Petru nyamoq lyis taiq zis gas, Yuda dius ge soeu ka gohnyau dius yah thuq wvng zomh goh dah lyi thungh ma bos zis lyis namoq nyang seq. Nghuot laus eq, hank lyis eq ma mon ma yih, ma gying ma shang oen ma gis sang cho ka Mangso ngos lyis chixoeuq goeus.

²⁹Housoeh nghuot yvmvyah, ngos lyis khi lyis ngos ma he he chank los. Housoeh las ngos lhyi chamus khi goh lah, oen nyei mes, ge.

³⁰Korneli taiq zis gas, Lai loh goeus nyei nyeih nyenhthang somh nayi lyis ngos ngah yhen mas shvmanh dung nyeis lyis, yoeuh aq, kyi kyi bvng dah dyimis wuot soeu dvyuk ngah xikkhonh mas nyetlos nyettant yap xoeuq las,

³¹Nyang taiq zis gas, Korneli eh, nah shvmanh dung dang gyo yoeus goeus. Nah vlu dyei zis eq Mangso comh toh goeus.

³²Housoeh yvmvyah Yopa mas Petru ge dah Simon lyis e shwih nhang aq; hauh soeu ka thomh nvm mas nyeis, shohyeis muh kuot soeu Simon yhen mas nyeis, ge.

³³Housoeh yvmvyah houjang ngos nah jyank mas dius nhang las, gvshih nvng jweh los zis gas svsoh gis. Housoeh las Mangso nvng lyis taiq nhang kat dang lyis gyo yoeus das xiklyis gvshih ngamoq dvnganh Mangso xikkhonh mas nghuot joq, ge.

³⁴Petru dang zoh yoeus las taiq zis gas, Mangso ka dius nyoqnho ma khyen zis gvshih ngos jyoengh seq goeus.

³⁵Dius nyau khanghmuh mas nyang lyis gyukwoms phauh nyang zis yah dan dah muh kuot soeu lyis gas nyang yoh lhom yoeus.

³⁶Mangso ka Israel dius jens lyis gausyis Dang dyei yvlyis namoq seq. Hauh dang mas nyang gas dvnganh dah Yhensain nghuot dah Yesu Khristu masyah nyenstap gausyis Dang lyis taiq kyoh nyeis.

³⁷Yohan jeisnyhop cho lhyi taiq kyoh thang lhyi, Dang haih zis gas Galile mau masyah Yuda mau gonh mas dyos loh goeus.

³⁸Mangso ka Nazaret phoq Yesu lyis Gyingshang Dyos yah eq, yomsoq yah eq nyang lyis coeu juot dyei goeus zis namoq seq. Yesu Khristu gas vwi vyvm mas loh las, gis dah muh kuot zis yahge yius yah nhiq zaiq toh bang dvnganhmoq lyis lhoq gis dyei. Khasoeh ge lyis Mangso ka nyang yah dvgeh nghuot.

³⁹Housoeh Yuda jens dah mau mas eq, Yerusalem wus mas eq, nyang kuot yenh muhzoh dvnganh dah kanghjyoeng jens gas ngamoq nghuot. Hauh soeu lyis nyamoq tapzains mas lhangh sat.

⁴⁰Nghuot laus eq Mangso nyang somh vnyeih lyis hauh soeu lyis dwis toqh kat las,

⁴¹Nyah gungs lyis dius dvnganh lyis ma nghuot, Mangso yah kanghjyoeng duot das xiklyis khyen toeuq toh bang nghuot las Yesu shei masyah dwis toq los thang lhyi, nyang yah dvgeh zo shuk nyeis dah ngamoq lyis nyvng xoeuq.

⁴²Yhensain nyang nyang eq dwis bang yahge shei goeus bang dah soetuon soeu kuot das xiklyis, Mangso toeuq toh soeu nghuot goeus cho dius jens lyis taiq kyoh las kanghjyoeng kat das xiklyis nyang ngamoq lyis taiq toh.

⁴³Lvpe jens dvnganh eq nyah cho kanghjyoeng kat zis gas, Nyah nyings lyis loms ya lomsjingh bang yaunos khyuot dyei zis xauh das, ge.

⁴⁴Petru hauh cho taiq nyeis shih lyis, hauh dang xauhgyo bang dvnganhmoq thoq mas Gyingshang Dyos gyoh los.

⁴⁵Gyingshang Dyos ge dah jyungshuk gas, gohnyau bang thoq mas huot khyoq yvmvyah Petru yah dvgeh chank bang, vthyoh tyomh cho chank goeus bang yahge lomsjingh bang mauh hangh toh.

⁴⁶Khasoeh ge lyis nyamoq dang vja ja taiq zis yahge Mangso lhyi chungh zis tsain xauhgyo.

⁴⁷Housoeh Petru taiq zis gas, Yang teh Gyingshang Dyos xauh yoeus bang lyis jeis yah jeisnyhop kham das xiklyis hank tomp toh chank bos lah, ge.

⁴⁸Housoeh nyang nyamoq lyis Yesu Khristu dah nyings mas jeisnyhop kham das cho taiq kat. Hauh thang lhyi nyamoq gas Petru lyis, dvyoq nyeis khoq das xiklyis dung.