Read Achang LVGYO 11 Bible Online

LVGYO 11 - Achang bible

LVGYO 11

¹Lvgyo jens yahge Yuda mau mas dah lomsjingh bang dvyhamh gas, Gohnyau bang eq Mangso dah dang lhom yoeus, ge dah cho xauhgyo.

²Petru Yerusalem mas jweh lyis vthyoh tyomh cho chank bang gas, nyang lyis yobos huon.

³Nvng chamus vthyoh tyomh cho ma chank bang jyank mas loh las, nyamoq yah dvgeh zo shuk lah, ge.

⁴Hauh uhlyis Petru gas hauh cho vzoh yah dvkoeuq thang lhyi dvkoeuq heisoeh ge, taiq kyoh.

⁵Ngos gas Yopa wus mas shvmanh dung nyeis; hauh uhlyis ngos muih loh lyis nyoqnyvng nyvng yvmas, kha iq teh jangthunk dvkhyvp maukhung masyah khyoq kat zis gas ngah jyank mas jweh los.

⁶Ngos doms soq yoeuh lyis, nyeisjvng thoq mas dah nyei khyei dap gaunyhauq, yewus, shweh loh ja yahge maudang nghoq vja ja tsain bos zis nyvng.

⁷Hou kyingh ma nghuot, Petru eh, toq las sat zo aq, ge ngos lyis taiq dah thwe eq xauhgyo.

⁸Ngos gas, Ma nghuot, Yhensain eh, vwot v-oeu yahge ma lhoq ma shang ja ngah nhuot mas khanhamp eq ma wvng ku, oen taiq.

⁹Nghuot laus eq tsai dvlhain maukhung mas dah thwe ka, Mangso lhoqshang nhang goeus dah vyhang lhyi, Ma lhoq oen ma gis sang, ge.

¹⁰Housoeh somh lhain bweh thang lhyi hau dvnganh maukhung pheh doms yoeus tyamp.

¹¹Hauh uhlyis nyang Kesare wus masyah ngah jyank mas nhang kat dah dius somh yuk, ngos nyeis dah yhen ganthoq mas yap joq.

¹²Ma khamkhvv khvv nyamoq yah chank loh das xiklyis Dyos gas ngos lyis taiq. Hauh thoq lyis hai boekyis khyuk yuk moq eq ngos yah dvgeh loh las Korneli yhen mas wvng loh.

¹³Hauh uhlyis hauh soeu ka, nyang loeuswons soeu dvyuk nyah yhen mas los yap yvlyis nyvng; hau loeuswons soeu nyang lyis taiq zis gas, Yopa wus mas dius nhang las Petru ge dah Simon lyis khi aq.

¹⁴Nyang gas nvng yahge nah yhenbang dvnganh khyuot yoeus zis xauh dah gausyis dang nvng lyis dyei das ge los taiq cho ngamoq lyis taiq kyoh.

¹⁵Ngos dang zoh phank las taiq nyeis lyis, cangxeih lyis, yah thoq mas Gyingshang Dyos gyoh lyih yhangteh nyamoq thoq mas eq gyoh lyih.

¹⁶Yohan gas jeis yah jeisnyhop dyei, namoq lyis gas Gyingshang Dyos yah jeisnyhop xauh kham yoeus das, ge Yhensain nyang taiq toh dang lyis ngos soh.

¹⁷Housoeh las Yhensain Yesu Khristu lyis lomsjingh bang yang lyis dyei dah jyungshuk yah dvyhangteh, Mangso nyamoq lyis dyei nghuot lyis gas, ngos gas hank nghuot las Mangso lhyi yoh tomp toh das lah, ge.

¹⁸Hauh cho tsain xauhgyo lyis, nyamoq samlo nyeis las, Housoeh lyis gas, Mangso ka gohnyau bang lyis eq kang dwis yvpheh yoh shwih loh dah ehnyet thaiq cho dyei goeus nyvng, ge.

¹⁹Stephan masyah vzoh xi dah vshoh vjyen shoeuhshih cho gvng masyah tsain dyos loh bang gas, Phoenisia, Kupru mau yahge Antiok wus jweh shoq loh las Yuda dius nyau lyis kyingh Dang tsain taiq kyoh.

²⁰Nghuot laus eq Kupru yahge Kureni mau mas bang dvyhamh, Antiok mas jweh lyis Yhensain Yesu dah gausyis dang Heleni dius lyis eq tsain taiq kyoh.

²¹Yhensain dah loq nyamoq yah dvgeh nghuot yvmvyah, nyoshoq tsain lomsjingh las Yhensain jyank pheh lhain los.

²²Haih loeus gas, Yerusalem mas dah phung jens dah no mas tsain taiq jweh loh zis yah nyamoq gas Barnaba lyis Antiok jweh shoq nhang kat.

²³Houmha jweh las Mangso ka dius jens lyis khasoeh shvmanh dyei cho nyvng lyis nyang svsoh gausyis zis yah nyamoq gas Yhensain mas lomluk luk goeng goeng kuk tap toh das xiklyis dvnganhmoq lyis yomdyei taiq kyingh goeus.

²⁴Khasoeh ge lyis hauh soeu ka dius gis nghuot yvmvyah, Gyingshang Dyos yah eq, lomsjingh zis yah eq, dyingh joq soeu dvyuk nghuot. Dius nyoshoq lyis Yhensain jyank pheh shwih los.

²⁵Barnaba gas Saulo lyis loh xo das ge Tarshu pheh thuq loh. Nyang lyis nyvng lyis Antiok mas shwih los.

²⁶Nyah aiq yuk gas dvzvn dyingh shoq hauh phung yah dvgeh huom nyeis yvmvyah, dius nyoshoq lyis xauh jyauh. Antiok gas changlo jens lyis Khristan ge cangxeih nyhink dah joqyos nghuot.

²⁷Hauh uhlyis Yerusalem mas dah lvpe jens gas Antiok mas jweh e.

²⁸Hauh moq mas Agabu ge soeu toq las mungkvn gonh mas yuot panghkhauq zainsmuh los das cho Dyos Chixoeuq zis yah dvyhangteh lvpe pe. Hauh zis Klodi Kesar zaih lyis bweh goeus.

²⁹Housoeh las changlo jens gas Yuda mau mas dah boekyis jyank mas vsainnyang yoh nyhoq bos pangh kat das ge tsain nghamh thyet toh.

³⁰Housoeh toeuq toh zis yah dvyhangteh nyamoq kuot las Barnaba yahge Saulo dah loq masyah logis jens jyank mas huon kat.